Əcnəbilərdən tələb olunan sənədlərin sayı artırılacaq

Yanvarın 22-də Milli Məclisin İnsan hüquqları daimi komissiyasının iclası keçirildi. İclasda "İmmiqrasiya haqqında" və "Dövlət rüsumu haqqında" Azərbaycan Respublikasının qanunlarına əlavə və dəyişikliklər edilməsi barədə" qanun layihəsi müzakirə edildi. Komissiyanın sədri Rəbiyyət Aslanova adı çəkilən qanunlara əlavə və dəyişikliklər barədə məlumat verdi. Bildirdi ki, "İmmiqrasiya haqqında" qanuna təklif edilən əlavə zamanın tələbindən irəli gəlir. Qanuna əsasən respublikamıza gələn əcnəbilər və ya vətəndaşlığı olmayan şəxslər vəsatətlərində Azərbaycana immiqrasiyasını əsaslandırmalıdırlar. Bunun üçün notarial və ona bərabər tutulan qaydada təsdiq edilən bir neçə sənəd tələb olunur. Layihəyə əsasən əcnəbilər Azərbaycanda müvəqqəti yaşamaq üçün icazə alınmasına əsas olmuş halların aradan qalxmadığını sübut edən sənədləri də təqdim etməlidirlər.

"Dövlət rüsumu haqqında" qanuna təklif olunan əlavə və dəyişikliklər isə əcnəbilərin ölkəmizdə qeydiyyatı ilə bağlı müddəaları əhatə edir.

Qanun layihəsi Milli Məclisin plenar iclasının müzakirəsinə tövsiyə edildi.

Azərbaycan.-2009.-23 yanvar.-S.4.