Azərbaycan-Estoniya əlaqələri yeni mərhələdə uğurla inkişaf edir

Azərbaycan Cənubi Qafqazda regional və qlobal əməkdaşlıq üçün çox mühüm əhəmiyyətə malik dövlət kimi tanınır. Ölkəmizdə möhkəm ictimai-siyasi sabitliyin, davamlı iqtisadi inkişafın təmin edilməsi, əhalinin rifahının ildən-ilə yüksəlməsi, bölgədə təhlükəsizlik və sabitliyin bərqərar olunması üçün atılan ardıcıl addımlar nüfuzlu beynəlxalq qurumlar və dövlətlər tərəfindən də təqdir edilir.

Dəqiq hədəflərə hesablanmış xarici siyasət strategiyasının uğurla həyata keçirilməsi nəticəsində ölkəmizin dünya siyasətindəki rolu və yeri son illər daha da möhkəmlənmişdir. Prezident İlham Əliyevin milli maraqlarımıza uyğun davam etdirdiyi xarici siyasət xətti bugünkü uğurlarımızı şərtləndirmişdir.

Azərbaycan Cənubi Qafqazın aparıcı dövləti olaraq regionda gerçəkləşdirilən bütün transmilli layihələrin fəal iştirakçısıdır. Ölkəmizin zəngin təbii ehtiyatları xalqın milli rifahının təmin olunması üçün yeni perspektivlər açır, onu beynəlxalq əhəmiyyətli enerji mənbəyi və enerji təchizatı şəbəkəsinin mühüm tərkib hissəsinə çevirir. Azərbaycan Respublikasının və tərəfdaş ölkələrin iqtisadiyyatlarının inkişafına artıq töhfə verən beynəlxalq əhəmiyyətli nəqliyyat və kommunikasiya dəhlizlərinin inkişaf etdirilməsi, neft və qaz boru kəmərlərinin inşası region ölkələrinin əməkdaşlığının bariz nümunəsidir. Avropanın mütərəqqi dəyərlərini paylaşan və Avratlantik təhlükəsizlik arxitekturasının ayrılmaz bir hissəsinə çevrilən Azərbaycan Respublikası bu məkanın təhlükəsizliyinə öz töhfəsini verməkdədir. Rəsmi Bakı bütün beynəlxalq və regional məsələlərə münasibətdə beynəlxalq norma və prinsiplərə əsaslanaraq ayrı-ayrı dövlətlərlə sivil, bərabərhüquqlu və qarşılıqlı hörmətə əsaslanan əlaqələrə üstünlük verir.

Azərbaycanın Avropada etibarlı tərəfdaş kimi münasibətlərinin ildən-ilə inkişafına çalışdığı ölkələrdən biri də Estoniyadır. Rəsmi Bakı Avratlantik məkana inteqrasiya və Avropa Birliyi ilə sıx əməkdaşlıq sahəsində Estoniyanın dəstəyinə xüsusi önəm verir. Estoniya bu gün dünya iqtisadiyyatında və siyasətində mühüm rol oynamaqla yanaşı, sülhün, əmin-amanlığın qorunub saxlanması prosesinə də imkanı daxilində töhfə verir.

Azərbaycan Estoniya ilə Avropa Şurası, NATO-nun "Sülh naminə tərəfdaşlıq" (SNT) proqramı və "Fərdi Tərəfdaşlıq üzrə Əməliyyat Planı" (FTƏP) çərçivəsində sıx əməkdaşlıq edir. Ölkəmizin Avratlantik strukturlara inteqrasiyası prosesində yeni mərhələ olan "Daha geniş Avropa: yeni qonşuluq" siyasəti təşəbbüsünə daxil edilməsinə Estoniya dövləti dəstək vermiş və hazırda da Azərbaycan Respublikasının Fəaliyyət Planını dəstəkləyir.

Estoniya Prezidenti Toomas Hendrik İlvesin bu günlərdə Azərbaycana rəsmi səfəri də iki dövlət arasında münasibətlərin yeni mərhələdə inkişafı baxımdan mühüm əhəmiyyət kəsb edir. Səfər çərçivəsində Estoniya və Azərbaycanın dövlət başçıları iki ölkə arasında əlaqələrin siyasi, iqtisadi sahələrdə daha da genişləndirilməsinin perspektiv imkanları barədə fikir mübadiləsi apardılar.

Estoniya Prezidentinin ölkəmizə ilk rəsmi səfəri ikitərəfli əlaqələrin möhkəmlənməsinə yeni töhfə verəcəkdir.

Estoniya Prezidentinin ölkəmizə səfəri zamanı Bakıda Azərbaycan-Estoniya biznes forumu da keçirildi. Biznes forumda Estoniya tərəfdən 30 nəfər iş adamı iştirak edirdi. Estoniya biznesmenləri informasiya-kommunikasiya texnologiyaları, maliyyə, daşınmaz əmlak, nəqliyyat, loqistika sektorlarını təmsil edirdilər. Xatırladaq ki, Estoniya informasiya-kommunikasiya texnologiyaları sahəsində son illər böyük uğurlar qazanmışdır.

Estoniya dövləti Avropanın enerji təhlükəsizliyinin təmin olunmasında Azərbaycanın mühüm rolunu yüksək dəyərləndirərək bu potensialdan səmərəli istifadə etmək niyyətindədir. Xatırladaq ki, Azərbaycan tərəfi Xəzər dənizinin karbohidrogen ehtiyatlarını Avropa bazarlarına yeni marşrutlar vasitəsilə çatdırılması istiqamətində iş aparır. Ötən ilin noyabrında Bakıda 21 ölkənin nümayəndələrinin iştirakı ilə IV Enerji sammiti keçirilmişdi. Beynəlxalq enerji təhlükəsizliyi problemlərinə həsr olunmuş tədbirdə Xəzər hövzəsində hasil edilən enerji daşıyıcılarının Qara dəniz, Baltik dənizi regionlarına və Mərkəzi Avropaya çatdırılması üçün Odessa-Brodı neft kəmərinin yaradılması məsələsi müzakirə olunmuşdur. Enerji sammitinin yekunu olaraq Bakı Bəyannaməsi imzalanmışdır. Tədbirdə Estoniyanın Baş naziri də iştirak etmiş və bəyannaməni təsdiqləmişdir.

Enerji təhlükəsizliyi məsələsində Azərbaycan və Estoniya dövlətləri arasında əməkdaşlıq yeni mərhələdə uğurla inkişaf edir. Prezident İlham Əliyev Estoniyanın dövlət başçısı ilə görüşündə bütün sahələrdə əməkdaşlığın daha da genişləndiriləcəyini bildirmişdi: "Siz öz regionunuzda, biz isə öz regionumuzda güclü mövqelərə malikik. Müxtəlif enerji təşəbbüsləri sayəsində bu gün biz artıq Xəzər-Qara dəniz və Baltik dənizi regionları arasında güclü əlaqələr haqqında danışa bilərik. Biz enerji nəqli marşrutları üzərində sıx işləyirik. Enerji təchizatının şaxələndirilməsi sahəsində planlaşdırdığımız işlərə artıq nail olmuşuq. Lakin eyni zamanda, Xəzər dənizindən çıxarılan neft və qazın Baltik regionunun bazarlarına yeni marşrutlar vasitəsilə çatdırılması üzərində düşünə bilərik. Bu məsələ ilə bağlı biz Estoniya ilə, o cümlədən digər tərəfdaşlarımız və dostlarımızla ciddi şəkildə işləməyə hazırıq. Fikrimcə, bu gün imkanları araşdırmaq üçün münasib fürsət yaranıb və biz əməkdaşlığımızın real perspektivlərini nəzərdən keçirə bilərik".

Azərbaycanın son illər iqtisadi, siyasi sahədə, beynəlxalq enerji təhlükəsizliyi məsələlərində qabaqcıl dövlətlər sırasına çıxması ölkəmizə olan marağı daha da artırıb. İndi Azərbaycanın Avropanın enerji təhlükəsizliyində mühüm rola malik olması birmənalı qəbul olunur. Avropa ittifaqına üzv olan dövlətlərin ölkəmizlə bütün sahələrdə əməkdaşlığa böyük önəm vermələri və konkret layihələrin həyata keçirilməsi üçün göstərilən təşəbbüslər bunları deməyə əsas verir. Avropa İttifaqının üzvü olan Estoniya ilə də qarşılıqlı faydalı əməkdaşlıq tərəfdaş dövlətlərə böyük dividentlər gətirəcəkdir.

E.HACIALIYEV

Azərbaycan.-2009.-24 yanvar.-S.1-3.