Xəzər İnteqrasiya İşgüzar Klubu ən böyük neft-qaz şirkətlərini birləşdirir

Yanvarın 23-də "Avropa" mehmanxanasında Xəzər İnteqrasiya İşgüzar Klubuna (XİİK) daxil olan müxtəlif şirkət və cəmiyyətlərin təmsilçiləri Milli Məclis sədrinin müavini Valeh Ələsgərovla görüşmüşlər.

Tədbirdə XİİK-in prezidenti və baş icraçı direktoru Telman Əliyev qurum haqqında məlumat vermişdir. Bildirmişdir ki, XİİK 2002-ci ilin iyununda, "Caspian Energy" Beynəlxalq Nəşriyyat Evinin iştirakı və ən böyük neft-qaz şirkətlərinin dəstəyi ilə təsis edilmişdir.

Təşkilatın əsas məqsədi iqtisadiyyat, siyasət, energetika, gömrük, vergi və s. sahələrə dair ümumi proqramın hazırlanması üçün şəraitin yaradılması, regional əhəmiyyətli müxtəlif informasiya layihələrinin həyata keçirilməsi və dövlət strukturları ilə özəl bölmə arasında dialoqun dəstəklənməsidir. XİİK üzvlərinin sayı 2002-ci ildəki 16 şirkətdən bu gün 30-dan çox ölkəni təmsil edən 500-dən artıq şirkətə çatmışdır. Prezident İlham Əliyev təşkilatın fəxri sədridir.

Valeh Ələsgərov ötən il Milli Məclisdə qanunvericilik sahəsində görülmüş işlərdən danışmış, yaz sessiyasında baxılacaq qanun layihələri və qəbul ediləcək qanunlar barədə qısa məlumat vermişdir.

Milli Məclis sədrinin müavini iştirakçıların neft-qaz sektoru, maşınqayırma, tikinti, elm, investisiya və sair məsələlərlə bağlı çoxsaylı suallarını cavablandırmışdır.

AzərTAc

Azərbaycan.-2009.-24 yanvar.-S.3.