"Dəyirmi masa"da "Avropa Şurası və Azərbaycan: insan hüquqlarının müdafiəsində yeni mərhələ" mövzusu müzakirə olunmuşdur

İnsan hüquqları üzrə müvəkkil Elmira Süleymanova Avropa Şurasının (AŞ) Bakıdakı nümayəndəliyi ilə birgə "Avropa Şurası və Azərbaycan: insan hüquqlarının müdafiəsində yeni mərhələ" mövzusunda "dəyirmi masa" keçirmişdir.

Ombudsman Aparatından bildirmişlər ki, Milli Məclis deputatlarının, dövlət orqanları, qeyri-hökumət təşkilatları və beynəlxalq qurumların - YUNİSEF-in və AŞ-ın Azərbaycandakı nümayəndəlikləri rəhbərlərinin, ATƏT-in Bakı ofisi və KİV təmsilçilərinin iştirak etdikləri tədbir Avropa Şurasının yaranmasının 60 illiyi və Avropa İnsan Hüquqları Məhkəməsinin fəaliyyətə başlamasının 50-ci ildönümünə həsr olunmuşdur.

Ombudsman E.Süleymanova çıxışında ölkəmizlə AŞ arasında əlaqələrin daha da möhkəmləndirilməsi məqsədi ilə gələcək perspektiv istiqamətlərin müəyyənləşdirilməsinin zəruriliyini vurğulamışdır. Müvəkkil 2001-ci il yanvarın 25-dən etibarən Avropa Şurasının üzvü olan və həmin il dekabrın 25-də Avropa İnsan Hüquqları Konvensiyasını ratifikasiya edən Azərbaycanın insan hüquqlarının təmini sahəsində üzərinə götürdüyü öhdəlikləri uğurla yerinə yetirdiyini söyləmişdir.

Milli Məclisin Hüquq siyasəti və dövlət quruculuğu məsələləri daimi komissiyasının sədri Əli Hüseynov "Avropa İnsan Hüquqları Konvensiyasının implementasiyası" mövzusunda çıxış etmişdir. Komissiya sədri respublikamızın Avropa strukturlarına inteqrasiya prosesinə fəal surətdə qoşulduğunu, insan hüquq və azadlıqlarının prioritetliyinə əsaslanan sistemin formalaşdırılması sahəsində önəmli addımlar atdığını bildirmişdir.

Ədliyyə Nazirliyi insan hüquqları və ictimaiyyətlə əlaqələr idarəsinin rəisi Faiq Qurbanov AŞ ilə əməkdaşlıq kontekstində ölkəmizdə aparılan məhkəmə-hüquq islahatları barədə danışmış, Əmək və Əhalinin Sosial Müdafiəsi Nazirliyinin şöbə müdiri Vüqar Həsənov Azərbaycanda əhalinin sosial müdafiəsi sisteminin təkmilləşdirilməsi məqsədi ilə Avropa standartlarına uyğun mexanizmlərin yaradılması sahəsində islahatların həyata keçirildiyini diqqətə çatdırmışdır.

"Dəyirmi masa"da Xarici İşlər Nazirliyi insan hüquqları, demokratikləşdirmə və humanitar problemlər idarəsinin məsul əməkdaşı Zaur Əhmədov, Milli QHT Forumu idarə heyətinin sədri Aydın Kərimov, Azadlıqdan Məhrumetmə Yerlərinin Müşahidəsi İctimai Birliyinin sədri Kamil Səlimov müzakirə edilən məsələ ilə bağlı mülahizələrini söyləmişlər.

AzərTAc

Azərbaycan.-2009.-24 yanvar.-S.3.