Azərbaycan Respublikası Ali Məhkəməsinin plenumu olmuşdur

Ramiz Rzayevin sədrliyi ilə yanvarın 23-də Azərbaycan Respublikası Ali Məhkəməsinin növbəti plenumu keçirilmişdir.

Ali Məhkəmənin sədri plenumu açaraq son illər Prezident İlham Əliyevin rəhbərliyi ilə ölkəmizdə bütün sahələrdə aparılan əsaslı islahatlardan danışmış və bildirmişdir ki, bu islahatlar məhkəmə-hüquq sahəsinə də öz müsbət təsirini göstərməkdədir. Bunun nəticəsidir ki, son illərdə Ali Məhkəmədə baxılan işlərin keyfiyyəti yaxşılaşmış və əvvəlki illərlə müqayisədə 2008-ci ildə vətəndaşların hüquqlarının məhkəmə müdafiəsinin səviyyəsi yüksəlmişdir.

Ali Məhkəmənin sədri qanunun aliliyinin və məhkəmə hakimiyyətində şəffaflığın təmin olunması, insan hüquq və azadlıqlarının müdafiəsi sahəsində məhkəmələrin qarşısında duran vəzifələrdən danışmışdır.

Plenumda Ali Məhkəmənin məhkəmə kollegiyaları sədrlərinin 2008-ci ildə ədalət mühakiməsinin həyata keçirilməsi vəziyyətinə dair məlumatları dinlənilmiş, bu məlumatlarla əlaqədar geniş müzakirə və təhlillər aparılmışdır.

Bildirilmişdir ki, Ali Məhkəmənin iqtisadi mübahisələrə dair işlər üzrə məhkəmə kollegiyası istisna olmaqla, digər kollegiyalarda 2008-ci ildə baxılmış işlər və daxil olmuş müraciətlər 2007-ci illə müqayisədə artmışdır. İqtisadi mübahisələrə dair işlər üzrə məhkəmə kollegiyasnda 7,1 faiz azalma müşahidə olunduğu halda, mülki işlər üzrə məhkəmə kollegiyasında 22,8, cinayət işləri üzrə məhkəmə kollegiyasında 22,8, hərbi işlər üzrə məhkəmə kollegiyasında isə 9 faiz artım olmuşdur. Bütün bunlar Ali Məhkəməyə daxil olan işlərin sayının 19 faiz artdığını göstərir. Əgər 2007-ci ildə Ali Məhkəmədə cəmi 3 min 639 işə baxılmışdırsa, 2008-ci ildə bu rəqəm 4 min 333 olmuşdur. Bu da ötən illə müqayisədə 694 iş çoxdur.

Qeyd edilmişdir ki, Ali Məhkəmənin Plenumunun 2007-ci ildə olduğu kimi, 2008-ci ildə də 6 iclası keçirilmişdir. 2007-ci ildə plenum iclaslarında konkret işlər üzrə 26 qərar, 2008-ci ildə isə 41 qərar çıxarılmışdır.

Vurğulanmışdır ki, ötən il Ali Məhkəmədə vətəndaşların ərizə və şikayətlərinə, digər müraciətlərinə baxılmasına, onlara hüquqi cəhətdən əsaslı və düzgün cavab verilməsinə diqqət artmışdır. Ali Məhkəməyə edilən müraciətlərdə artım müşahidə olunmuşdur. 2007-ci ildə Ali Məhkəməyə 18 min 663, 2008-ci ildə isə 22 min 320 müraciət edilmişdir. Bu, 2007-ci illə müqayisədə 19,5 faiz çoxdur. Əlavə kassasiya şikayəti ilə bağlı müraciətlər isə 2,6 faiz azalmışdır. 2008-ci ildə 2007-ci illə müqayisədə respublika apellyasiya məhkəmələrinin qəbul etdiyi məhkəmə aktlarının Ali Məhkəmənin kollegiyalarında baxılmış işlərin ümumi sayına görə ləğvi 2,5 faiz azalmışdır.

Plenumda qeyd edilmişdir ki, bütün bunlar aşağı instansiya məhkəmələrinin əvvəlki illərə nisbətən çıxardıqları qərarlarda qanunvericiliyin daha düzgün tədqiq edilməsi və iş prinsipinin sabitliyi sayəsində mümkün olmuşdur.

Plenumda Ali Məhkəmənin 2009-cu ilin birinci yarısına dair iş planı təsdiq edilmiş, konkret cinayət və mülki işlərə də baxılmışdır. Müzakirə olunan məsələlər və baxılmış işlər barədə müvafiq qərarlar qəbul edilmişdir.

Azərbaycan.-2009.-24 yanvar.-S.3.