Qiyamətin
əlamətlərindən biri də Ərəbistanda atəşin
peyda olmasıdır
Demokratiyanı öz
ölkələrinin maraqlarının qurbanına çevirən
bu ölkələr dərk edirlər ki, buradakı sosial
problemlər - aclıq, səfalət, insan haqq və
azadlıqlarına qəsd nəticə etibarilə bumeranq
effekti verərək, artıq onların özünə
qarşı çevrilməkdədir. Buraya anti-demokratik rejimlərdə
qlobal terror şəbəkələrinin fəaliyyətinin
ümumdünya əmin-amanlığı üçün
daha təhlükəli olmasını və miqrasiya problemini də
əlavə etsək, BMT və dünyanın aparıcı
ölkələrinin əks reaksiyası başa
düşüləndir.
"Ümmətimin
başına onu doğru yoldan sapdıran adamların keçməsindən
qorxuram" (Həz.Məhəmməd)
Ərəb
dünyasını məhvərindən çıxara bilən
bu üsyanlar bəzi maraqlı super dövlətlərin
ssenarisi üzrə olsa belə, səbəbi yenə də
"demokratiya" fitnəsinə tuş gələn həmin
müsəlman ölkələrindəki rejimlərdə
axtarmaq lazımdır. Anti-hümanist rejimlərilə
"demokratiya" daşıyıcılarına bu fürsəti
verənlər arasında 30-40-il dövlət
başçıları olan mübarək, kabus, bin əli və
qəddafiləri xüsusilə qeyd etmək lazımdır.
Sözdə müsəlman, əməldə isə Quran ayələrinə
zidd gedən bu diktatorlar uzun müddət özlərini həm
də İslam liderləri kimi qələmə veriblər.
İslamı, Rəbb kəlamlarını zədələyən
müasir fironlar mahiyyətcə 5000-il bundan qabaqkı fironlar
kimi xalqlarına qənim kəsilən diktatorlardır. Həmin
səbəbdən İngiltərə və Misir muzeylərində
nümayiş etdirilən fironlara baxmağa dəyməz.
Çünki indiki fironların aqibəti alacağımız
ibrətin dəyərini daha aktual edir. Rəbbin əta etdiyi
yeraltı və yerüstü sərvətlərə rəğmən
xalqın məşəqqətli əməyinə gündə
maksimum 2 dollar verən, doğma dilində nazil olan "Allah hər
şeyə qadirdir" kəlamına məhəl qoymayan, məsul
olduğu millətin qanına susayan bu kəslər vətəndəş
müharibəsinə - müsəlmanın müsəlmana
qılınc qaldırmasına, sünni-şiə
qarşıdurmasına da rəvac veriblər. Bu isə
artıq kafirlik əlamətidir. Çünki Peyğəmbər(ə)
buyurub: "Müsəlmanın müsəlmanla
savaşması kafirlikdir".
Sözügedən
postinqilab məkanlarında büdcənin 30-40 faizini mənimsəyən,
İslami dəyərlərə zidd olaraq hərəmxanalar
saxlayan və bu... xanalara milyonlarla pul xərcləyən başabəla
şeyxlər çox vaxt özlərini Həz.Peyğəmbər
ardıcılları, İslamın qoruyucuları qismində təqdim
edirlər. Halbuki, İslam və Onun Rəsulu belə fasiqləri
şiddətli əzabla müjdələyiblər. Peyğəmbər(ə)sünnəsindən
fərqli "gözoxşayan" saqqalları, piylə kilidlənən
ürəkləri, maddilikdən başqa bir şey görməyən
gözləri, Xaliq və xalq sözü eşitməyən
qulaqları, yetim və yoxsulun haqqından doymayan mədələri,
İslamda müəyyən şərtlər daxilində
maksimum 4-ə qədər qadınla evlənmək əmrinə
məhəl qoymamaları bu "xalq atalarını" özlərini
hətta Peyğəmbər(ə) ilə müqayisəyə
də sövq edib. Qəddafilər, bin əlilər, əmirlər,
şeyxlər çox gözəl bilirlər ki, Məhəmməd(ə)-nin
çox qadınla evlənməsi Rəbb kəlamı ilə
(yalnız Həz.Peyğəmbərə məxsus, bax: Quran, Əhzab
50) təsbit olunub. Rəbbimizin bu tövsiyəsindən məqsəd
İslamın digər dinlərlə əməkdaşlığını,
bir-birinə düşmən kəsilən tayfaların əmin-amanlığını
təmin etmək üçün idi. Digər tərəfdən,
o dövrdə müharibələr nəticəsində
kişilərin öldürülməsi ərsiz
qadınların çoxluğunu təmin edirdisə, indi bu
göstərici 49-un 50-yə nisbətindən artıq deyil.
Hicabı Rəbb əmri hesab edən, fəqət günlərini
İslamda olmayan göbək rəqslərinə baxmaqla və
40 qızın masajı ilə keçirən müsəlman
rəhbərlərinin XXI əsrdə hərəmxana
saxlamaları, müasir dillə desək, insan - qadın alverilə
məşğul olmaları nə dərəcədə
İslamidir?! Bu yaxınlarda "Wikileaks" saytında bəzi
şeyxlərin hərəmxanası barədə verilən
açıqlamalar fikrimizi bir daha təsdiq edir. Belə
fironlara, irodlara, əbu ləhəblərə xitabən Rəbbimiz
buyurub: "And olsun ki, Biz sizin kimiləri (çox) məhv
etmişik. Amma heç ibrət alan varmı?!" (Qamər
51).
İnsan haqq və
azadlıqlarına qəsd edən, mənsub olduğu
xalqı, onun zəif və qarnıac övladlarının
qanını zəli kimi soran bu piylənmiş cəsədlər
çox şükür ki, bir adı Sabur olan Allahın da səbr
kasasını daşdırdı. Və nəticədə Rəbbimiz
həddini aşan zalımlar üçün xalqı və
fürsəti fövtə verməyən "demokratiya"
qoruyucularını Özünün qılıncı etdi.
"Allah insanların bir qismini digər bir qismi ilə dəf
etməsəydi, yer üzü fitnə-fəsada
uğrayardı" (Bəqara 251). Quranı mənəviyyat
qaynağı və həyat düsturu, Peyğəmbər(ə)-nin
həyat və fəaliyyətini örnək göstərən
Rəbbimiz belələrinə xitabən dəfələrlə
buyurub: "Bir-birinizin malını haqqınız
olmadığı halda yeməyin" (Bəqara 188);
"Özlərindən sonra aciz və zəif övladlar
qoyub gedən olan şəxslər, onlardan ötrü necə
qorxurlarsa (xalqdan ötrü də) o cür qorxsunlar" (Nisə
9).
Zahiri İslamı, daxili
qeyri - İslami olan belə kəslər əslində VIII əsrdən
başlayaraq ibadəti unudub, Mədinənin mütrüb
qadınlarına və şəraba uyanlarla eyni səviyyədədir.
Rəbbin səbrini bir xilas, şans kimi qəbul etməyən
o dövrün Mədinə sakinləri rəhbərlərilə
birlikdə 1256-cı ildə "Hicaz atəşinə" məruz
qaldı. Səlnaməçilər yazıblar ki, o zaman
Peyğəmbər(ə) şəhərini - Mədinəni
qaya və daşları əridən lava seli
bürüdü. Şəhər əhli günahları
üçün dua və tövbə edərək, Həzrət
Məhəmmədin məzarı yanındakı Məscidə
- Peyğəmbər(ə) məscidinə
sığındılar. İlahi qüdrət və mərhəmət
ilə lava nə məscidə, nə də oraya
sığınan əhli - keflərə toxundu.
Fransanın keçmiş Xarici İşlər naziri
Rolan Düma - Qəddafinin şəxsi müşaviri
İslama, onun ümumbəşəri
dəyərlərinə kölgə salan, şahlıq
tacını fitratdan gətirən dəyər kimi heç kəsə
vermək istəməyən qəddafilər xalqı aldatmaq
üçün artistlik etməyi də yaxşı
bacarırlar. Fransanın keçmiş Xarici İşlər
naziri Rolan Dümanı özünə məsləhətçi
götürən Qəddafi, demokratik dünyaya bir mesaj da verir
ki, baxın, mən demokratiya sahəsində örnək olan
bir ölkənin keçmiş rəhbərini müşavir
götürmüşəm. Digər tərəfdən,
"demokrat" Dümanın Qəddafi "əmziyindən"
imtina etməyib, həmin rejimlə işləməsi çox
mətləblərdən xəbər verir.
Polkovnik Qəddafi rejimini
saxlamaq naminə özünü Səlahəddin Əyyubiyə
də oxşadır. Məlumdur ki, S.Əyyubi İslam
torpaqlarını səlibçilərdən xilas etmək
üçün hara gedibsə çadırda yaşayıb.
Qəddafi isə əksinə, çadırını Avropa səyahətləri
zamanı qurub. Və bununla da özünü
yaşadığı regionun ağsaqqalı kimi təqdim etməyə
çalışıb. İndi o, növbəti fəndlərə
əl ataraq 42 il xalqdan oğurladığı sərvətin
(hər bir liviyalı ailəsinə 800 dollara qədər)
cüzi hissəsini ona qaytarmaq barədə əmr verib. Məqsəd
aydındır: Özünü və rejimini qorumaq. Lakin xeyri
yoxdur. Çünki Qəddafi, bin Əli, Mübarək, Kabus
və onlara bənzər "islam şeyxləri, liderləri"
Xaliqin yüksəldərək zəlalətə
saldığı, xalqın isə lənətlədiyi kəslərdir.
Zira: "Xalqın başçısı, icmanın yol
göstərəni xalqın mənafeyinə zidd hərəkət
edərsə, hər şeydən agah olan Xaliqin rəhmətindən
məhrum olar" (Həz.Məhəmməd).
150 milyard
dollar yalnız "Facebook"a görə
Ərəb ölkələrindəki
xalq üsyanından təşvişə düşən Səudiyyə
Ərəbistanı kralı isə qabaqlayıcı manevrələr
edir. Kral internetin ən böyük sosial şəbəkəsi
"Fasebook"u 150 milyard dollara(!) almaq istəyir. Halbuki,
İslam dövlətinin qurucusu, Allahın seçdiyi Peyğəmbəri,
bəşəriyyətin iftixar abidəsi, Məkkə və
Mədinənin sahibi Məhəmməd Ələyhissələm
vəfat edərkən onun dünya malından miras olaraq vur-tut
iki kilimi, üstündə "Məhəmməd Allahın Rəsuludur"
yazısı olan möhürü, silahı, 20 dəvəsi və
100 baş davarı qalmışdı. Məkkə və Mədinənin
indiki kralı isə yalnız interneti susdurmaq
üçün 150 milyard dollar təklif edir! Səbəb
aydındır. Xalqdan oğurlanan pul ilə xalqın kütləvi
etiraz aksiyalarının qarşısını almaq. Kral həm
də Həcc ziyarəti zamanı Məkkədə kəsilmiş
qoyunların 931 min dondurulmuş cəmdəyini Afrika, Asiya
ölkələri, Səudiyyə Ərəbistanı və
Azərbaycana göndərilməsi barədə göstəriş
də verib. Sual olunur: Hər il QMİ ilə birgə Həcc
ziyarətinin qiymətini artıran kralı bu işə nə
vadar edib? Cavab birdir: Xalq qorxusu! Şahlıq tacının,
ağlasığmaz varidatın itirilməsi dəhşətindən
qaynaqlanan bu "mərhəmət, ehsan" Rəbb dərgahında
qəbul olunarmı?! Xeyr! Çünki nəfs naminə
görülən bu işlər Fironun
ölümqabağı tövbəsinə bənzər. Quran
kəlamı ilə desək, "könül xoşluğu
ilə versələr belə, onların verdikləri qəbul
olunmaz".
Hörmətli oxucu:
Düz 500 ildir ki, İslam aləmi qeyri-islamın elm,
texnologiya, insan haqq və azadlıqları kimi sədəqəsinə
möhtacdır. Halbuki: Bu dəyərlər başqa dinlərlə
müqayisədə sonuncu din olan İslamda daha çox təqdir
və təbliğ olunub; İnsanın doğuluşdan gətirdiyi
haqq və azadlıqlar, məsləhət, plüralizm,
konsensus, Qurani Kərimdə xüsusi yer alan Şura surəsi
kimi dəyərlər İslamın demokratik, açıq din
olduğunu sübut edir. Bəs, nə üçün geri
qaldıq? Məncə 500 il geriliyimizin səbəblərindən
biri də "döşəkçürüdən" bin əlilərin,
qəddafilərin, mübarəklərin anti-bəşər,
anti-Quran rejimləri olub desək, yanılmarıq.
Və bir də. Peyğəmbər(ə)
buyurub: "Qiyamətin əlamətlərindən biri də Yəməndə
bir atəşin peyda olmasıdır". "İki
böyük dövlət vuruşmayınca qiyamət
qopmaz"; "Qiyamət öncəsi yaşayan insanlar bəşərin
ən pisidir".
Kim bilir, bəlkə də
bu atəş özündən sonra iki böyük cəbhənin
müharibəsinə çevriləcək?! Çünki
artıq Venesuela prezidenti Çavesin təşəbbüsü
ilə Latın Amerikası ölkələri, Türkiyə,
Rusiya kimi dövlətlər (Çin hələ ki, gözləyir)
ABŞ və Fransanın Liviyaya qoşun yeritməsi
planını pisləyirlər. Düşünməyə dəyər...
Vaqif Cəliloğlu
Bakı xəbər.-
2011.- 8-9 mart.- S. 11.