Ən qədim
torpaqlarımızın Azərbaycanla birgə vahid xəritəsi
yaxınlarda çap olunacaq
Tarixi Azərbaycan
torpaqları indiki eyni adlı dövlətin sərhədlərindən
qat-qat geniş bir əraziyə malik olub. Bu torpaqlar şimalda
Dərbəndə, cənubda Həmədana, şimal-qərbdə
isə indiki Gürcüstanın Borçalı mahalına qədər
uzanırdı. Bundan başqa, indiki Ermənistanın
bütün ərazisi də vaxtilə Azərbaycan
torpaqları idi. Bu əraziləri birlikdə götürsək,
tarixi Azərbaycan torpaqlarının 400 min kvadratkilometrdən
çox olduğunu görə bilərik.
Hazırda isə Azərbaycanın
ərazisi 86 min kvadrat kilometrdir. Hər bir dövlətin ərazilərinin
tanıdılmasında xəritələrin böyük rolu
var. Xəritə vasitəsilə istənilən ölkə,
onun indiki ərazisi, qədimdə hansı torpaqlara malik
olduğu barədə geniş məlumat almaq
mümkündür. Xəritələr istənilən şəxs
üçün ölkənin hər hansı bir hissəsinə
getməkdə bələdçi rolunu da oynayır. Ölkəmizin
də tanıdılmasında xəritələrin
mühüm yeri var. Xüsusən də indiki şəraitdə.
Bildiyimiz kimi, mənfur qonşularımız olan Ermənistan
Birləşmiş Millətlər Təşkilatı (BMT) tərəfindən
rəsmən tanınan torpaqlarımızın 20 faizini iki
onillikdən çoxdur ki, işğal edib. Bütün
dünyaya da bu ərazilərin guya onlara məxsus olduğu barədə
car çəkirlər. Hətta buraxdıqları xəritələrdə
də Dağlıq Qarabağı, ümumiyyətlə
Kür çayının cənub hissəsindəki
bütün ərazilərimizi qədim Ermənistan
torpaqları kimi göstərirlər. Bununla da dünya
ictimaiyyətini aldatmağa çalışırlar. Hətta
indiki Ermənistan torpaqlarının vaxtilə Azərbaycana məxsus
olmasına baxmayaraq, buradakı türk yer adlarını
tamamilə dəyişdirərək erməniləşdiriblər.
Uzağa getməyək, Yerevan vaxtilə İrəvan
adlanırdı. Çünki türk torpağı idi. Amma buna baxmayaraq,
ermənilər xəritələrdə belə həmin şəhəri
qədimdən bəri Yerevan kimi təqdim edirlər. Azərbaycan
adlanan torpaqda ən qədim mədəniyyət mərkəzləri,
insan məskənləri olub. Azərbaycan xalqı bu ərazidə
zəngin və özünəməxsus bir mədəniyyət,
o cümlədən dövlətçilik ənənələri
yaradıb. Burada ilk ibtidai insanların yaşadığına
dair 1,7-1,8 milyon il bundan əvvələ aid ən qədim
arxeoloji materiallar tapılıb. Azıx, Tağlar,
Daşsalahlı, Damcılı mağaraları ölkəmizin
ən qədim insan yaşayış məskəni olduğuna
bir sübutdur. Bundan başqa, Azərbaycan 5 min illik dövlətçilik
tarixinə malikdir. Burada ilk dövlət quruluşu hələ
eramızdan əvvəl IV minilliyin sonu-III minilliyin əvvəlində
Urmiya gölü hövzəsində təşəkkül
tapıb. Kuti, lulubəy tayfalarının qədim dövlətləri
məhz bu ərazilərdə formalaşıb. Sonradan
eramızdan əvvəl I minillik-eramızın I minilliyin əvvəlində
sözügedən ərazilərdə Manna, Atropatena, Albaniya
kimi dövlətlər yaranıb. Eramızın ilk
yüzilliklərində türk dili başlıca ünsiyyət
vasitəsinə çevrilməkdə idi. Bu dil şimalla cənub
arasında birləşdirici rol oynayırdı. Sasani və ərəb
işğalının bitməsilə Azərbaycan
torpaqlarında sırf türk dövlətləri olan sacilər,
salarilər, şəddadilər, rəvvadilər,
şirvanşahlar kimi dövlətlərin əsası qoyulur.
Bu dövrdə həmin ərazidə yaranmış dövlət
qurumları arasında tamamilə türk əsilli olan Eldənizlər
dövləti daha möhtəşəmliyilə seçilib.
Qaraqoyunlu və Ağqoyunlu dövlətlərinin mövcud
olduğu dövrdə isə Azərbaycanın, bütöv
olmasa da, geniş ərazisinin vahid bir tam halında birləşdirilməsinə
nail olundu. Bütöv Azərbaycanın bir bucaq altında birləşdirilməsinə
isə Səfəvilərin dövründə nail olundu. O
zaman Azərbaycan vahid mövqedən çıxış etməsi
səbəbindən siyasi, iqtisadi və mədəni həyatın
bütün sahələrində dinamik inkişafda idi.
Sonrakı dövrlərdə isə Azərbaycan
yavaş-yavaş ərazilərinin böyük hissəsini
itirməyə başladı. Cənubda geniş bir ərazi
İranın işğalı altına keçdi. Dəmir
qapı Dərbənd və ona bitişik torpaqlar Rusiyaya qismət
oldu. Borçalı mahalı Gürcüstana verildi. Qərbi
Azərbaycan isə büsbütün Ermənistana ilhaq olundu.
Bir sözlə, Azərbaycanın tarixi torpaqlarında qədimdən
bəri azəri türk etnosuna məxsus çoxsaylı
dövlətlər yaranıb. Həmin dövlətlərin sərhədləri
barədə dolğun informasiya almaq üçün xəritələrin
olması vacibdir. Sovet dövründə Azərbaycan tarixinin
geniş səpkidə, xüsusən də onun 28 aprel
işğalından əvvəlki dövrünün təbliği
qadağan idi. Ona görə də qədim dövrün Azərbaycan
torpaqları barədə xəritələr də, demək
olar ki, yox idi. Amma ölkəmiz müstəqilliyinə
qovuşduqdan sonra bu xəritələrin işıq
üzü görməsi olduqca vacib bir məsələyə
çevrilib. Tarixi həqiqət ondan ibarətdir ki, biz
heç bir başqa ərazi işğal etməmişik, əksinə,
torpaqlarımızı itirə-itirə gəlmişik. Bunun
özünü göstərmək, həqiqətin nədən
ibarət olduğunu yaymaq üçün də tarixi Azərbaycan
torpaqlarının vahid xəritəsinin hazırlanması
vacibdir. Ermənilər onların olmayan əraziləri özlərinki
elan edərək saxta xəritələr buraxır. Bununla da
guya özlərinin qədim sivilizasiyaya məxsus, bölgənin
ən qədim xalqı olduğunu aşılamağa
çalışırlar. Hətta müəyyən mənada
onlar təbliğatları vasitəsilə buna, saxta olsa belə,
nail də olublar. Məhz bu saxta mifi yox etmək, həqiqəti
ortaya qoymaq üçün dövlətçiliyimizə aid
geniş həcmdə xəritələrin
buraxılmasının mühüm əhəmiyyəti var.
Dünyanın hansı məskənində kimlərin
yaşadığı, bu ərazilərin kimlərə məxsus
olduğunu müəyyənləşdirməkdə,
sözsüz ki, xəritələrin rolu danılmazdır. Xəritələr
ölkə, onun tarixi, xalqı, yaşayış yerləri,
şəhər və qəsəbələrinin adları barədə
geniş məlumat kitabçasıdır. Ona görə də
tarixi Azərbaycan torpaqlarının vahid xəritəsi
hazırlanıb, məktəb və ali təhsil ocaqlarında
təbliğ olunmalıdır. Adətən ali təhsil
ocaqlarında tarix və coğrafiyaya aid kitabların
içində xəritələr verilir. Bu yaxşı
haldır. Amma sovet dönəmində hər hansı bir tarixi
kitabla yanaşı, həmin dərsliyə uyğun xəritə
də buraxılırdı. İndi isə bu yoxdur. Bundan
başqa, keçirilən dərslər zamanı lövhədə
ona uyğun olan xəritələr də asılmır ki,
şagird yaxından tanış ola bilsin. Bu bizim
özümüzə də lazımdır ki, kim olduğumuzu,
əcdadlarımızın bizə nə qoyub getdiyini, millətimizin
hansı ərazilərdə məskunlaşdığını,
torpaqlarımızın qədimdən indiyə kimi kimlər
tərəfindən işğala məruz
qaldığını əzbər bilək.
Milli Elmlər
Akademiyası Tarix İnstitutunun direktor müavini Cəbi Bəhramov
tarixi Azərbaycan torpaqlarına aid xəritələrin 2007-ci
ildən çap olunduğuna diqqət yetirdi: "Tarixi Azərbaycan
torpaqları ilə bağlı vahid xəritələrimiz
hazırdır. İngilis
və rus dillərinə də tərcümə olunub. Dəqiqləşdirmələr
aparılıb, yaxınlarda çap olunacaq. 2007-ci ildə də
belə xəritələr çap olunub. Ondan əvvəl də
çox cildlik Azərbaycan tarixində çap olunub. Biz
artıq elmi müəssisə olaraq mənbələr əsasında
xəritələr hazırlayıb nəşr etmişik. Elmi
tədqiqat idarəsi olaraq bu sahədə öz təbliğatımızı
yerinə yetirmişik. Burada, hətta əlavə olaraq, bizə
qarşı yönəldilən soyqırım cinayətləri
xəritəsi də tərtib olunub. Belə iki ədəd xəritə
var".
Tarix elmləri doktoru Rafiq
İsmayıl belə xəritələrin olduğunu, amma bu
istiqamətdə də ermənilərdən geri
qaldığımızı dedi: "Düşmənlərimiz
olan ermənilər Azərbaycan ərazilərinə
iddialarını tarix etibarilə yaxın vaxtda qoymayıb. Vaxtilə XIX əsrdə
Fransada, ardınca da Moskvada mərkəz açmaqla köhnə
erməni kitabları və alban kitablarını istədikləri
formada tərcümə edərək, Azərbaycan və digər
türk torpaqlarının guya özlərinə aid olması
barədə, uzun müddətdir ki, elmi sahədə fəaliyyət
göstərməklə yayıblar. Hətta bu yaxınlarda mətbuatda
çıxan məlumata görə,
yaşadığımız dövrdə Azərbaycanda
özünü görkəmli elm adamı hesab edənlərin
mövcudluğu şəraitində belə Gəncəbasar
zonası və digər yerlər Böyük Sovet
Ensklopediyasında erməni torpaqları kimi verilib. Yəni hələ
o vaxt reaksiya verilməyib. Bizim ictimaiyyət bu məsələdə
çox gecikib. İndi Azərbaycan Tarixi İnstitutunda tarixi
torpaqlarımız barədə müəyyən xəritələr
hazırlanıb. Tarixi Azərbaycan torpaqlarını əks
etdirən xəritələr var. Amma bu xəritələrin nə
qədər geniş yayılması, xaricdə elmi dövriyyəyə
buraxılması, beynəlxalq aləmin onu nə qədər
ciddiyyətlə qəbul etməsi kimi məsələlərin
aydınlaşdırılmasına ehtiyac var. Biz ermənilərin
torpaqlarımızı erməniləşdirməsi və bu
zaman xəritələri saxtalaşdırması məsələsinə
həmişə barmaqarası baxmışıq. Bu işə
başlayan Ziya Bünyadov olub. Onun "Azərbaycan VII-IX əsrlərdə"
kitabında ermənilərin saxtakarlıqları müəyyən
qədər ifşa olunub. Bu hal xəritələr məsələsində
də öz əksini tapıb. O, bir sıra erməni dilində
olan mənbələri də dilimizə tərcümə
edib. Amma geniş miqyasda götürsək, buraxılan tarixi
Azərbaycan torpaqlarına dair xəritələr erməni
tarixşünaslığının gördüyü işlərdən
çox azdır. Orta məktəblərdə də müəyyən
mənada vahid torpaqlarımızla bağlı xəritələrdən
istifadə olunur. Amma bunu edəndə çox vaxt qonşu
İran etiraz edir. Bizdə də bu istiqamətdə iş
gedir, Amma prinsip etibarilə çox gecikmişik. Lakin onun erməni
təbliğatı ilə müqayisədə nə qədər
təsirli olduğu barədə, fikrimcə, düşünmək
lazımdır".
İctimai Problemlərin Tədqiqi
Assosiasiyasının rəhbəri Məhərrəm
Zülfüqarlı bildirdi ki, tarixi torpaqlarımızla
bağlı xəritələrin məktəblərdə təbliği
müəllimin məsələyə necə münasibət
bəsləməsi və milli hissin güclü olmasından
asılıdır: "Yəni tarixçi müəllim Azərbaycanı
ürəkdən sevirsə, onun tarixi torpaqları haqda hətta
əlavə məlumatlar verə bilər. Belədə
şagirddə Azərbaycanın bütövlüyünə
məhəbbət yaranır. Azərbaycan tarixi proqramına Cənubi
Azərbaycanla bağlı müəyyən mövzular
salınıb. Babilər hərəkatı, Səttar xan,
Şeyx Məhəmməd Xiyabani haqda məlumatlar verilir. Amma
tarixi ərazilərimiz, torpaqlarımızın necə,
hansı şəraitdə müxtəlif dövlətlər
tərəfindən işğalı barədə xəritələrdə
heç nə əks olunmayıb. Orta əsrlərə aid xəritələrimiz
var. Xəritə vasitəsilə Səfəvilər dövləti
və Nadir şahın yaratdığı imperiyanın ərazisilə
tanış olmaqla uşaqda Azərbaycan dövlətinin
böyüklüyünə olan məhəbbət arta bilər.
Amma müasir dövrün xəritələrində bu nəzərə
alınmır. Bunun da obyektiv səbəbi var. Tarixi ərazilərimizlə
bağlı xəritələr buraxsaq, bu Rusiya,
Gürcüstan və İran tərəfindən ərazi
iddiası kimi qarşılana bilər. Nəticədə
müəyyən problemlər yaşanar. Bununla belə, tarix
müəllimləri Dərbənd, Borçalı, Cənubi
Azərbaycan barədə tələbələrə məlumat
verməyə borcludur. Müsbət haldır ki, Azərbaycan
televiziyalarında hava barədə məlumat verilərkən
Təbrizin də havası barədə danışırlar. Amma
bu adətən xarici ölkələr barədə məlumat
veriləndə deyilir. Lakin bəzi televiziya kanalları Təbrizin
adını çəkəndə xüsusi vurğulayır
və belədə məlumatı olmayanda da bu şəhərin
Azərbaycanın qədim mədəniyyət və siyasi mərkəzi
olduğu barədə informasiya formalaşır. Bu
aparıcıdan, jurnalistdən, dərs deyən müəllimdən
asılıdır. Dərsliyə və xəritəyə
qalanda isə bunu etmək mümkün deyil. Çünki belə
məlumatlar orada yoxdur".
Rüfət Sultan
Bakı
xəbər.- 2011.- 4 may.- S. 15.