Milli ideologiyamızın zəruriliyinə
daha bir maraqlı baxış...
Adil Qeybulla: "...ideologiyasızlaşma
dövrü başlayıb"
Hər bir dövlətin
özünəməxsus ideologiyası
var. Hazırda mövcud
olan dövlətlərin
demək olar ki, hamısı məhz müəyyən ideologiya əsasında yaranaraq inkişaf edir. Bütün cəmiyyətdə həmin vahid ideologiya ətrafında təmərküzləşir. Bu alındıqda ölkədə əminamanlıq,
sabitlik hökm sürür. Alınmadıqda isə bunun əksi baş verir, ölkədə dağınıqlıq, pərakəndəlik
hakim olur.
İdeologiya seçilərkən elə biri seçilməlidir
ki, o ərazidə yaşayan bütün millət və xalqların istəyincə
olsun. Digər xalq və etnoslar ona düşmən
deyil, dostcasına münasibət bəsləsin.
Bu mənada Azərbaycan
öz ideologiyasını
seçməkdə heç
də yanılmayıb.
Azərbaycançılıq məfhumu ölkəmizdə
bütün sferalarda özünə geniş yer tapıb. Bu da həmin
məfkurənin birtərəfli
olmamasından, onun ölkədə yaşayan
bütün etnosların
istəyini ifadə etməsindən irəli gəlir.
Azərbaycançılıq məfkurəsi dövlətçiliyimizin
möhkəmlənməsi, ərazidə yaşayan müxtəlif xalqların
bir yerə toplanmasında əvəzsiz
xidmətlərə malikdir.
Ona görədir ki, bu gün həmin
ideologiya hamı tərəfindən qəbul
olunur. Azərbaycançılıq ilk növbədə vətəni sevmək, vətənə bağlılıq,
onun yolunda canından keçmək mənasını verir.
Azərbaycan xalqı da məhz bu sevgiyə
daha ürəkdən
bağlıdır. O, həmçinin, bugünkü
Azərbaycanın qayğıları
ilə nəfəs almaq, ölkəmizin keçmişi, dövlətçilik
ənənələrini yaşatmaq
və onu dünyanın sivil məkanı arasında görməkdən ibarətdir.
Azərbaycançılıq ilk öncə müstəqil,
suveren dövlət deməkdir. Yəni dövlət olmadığı
təqdirdə, həmin
ideologiyanın inkişafı
da qeyri-mümkündür.
Azərbaycançılıq Azərbaycanla bağlı
olan, onu bir araya cəmləyən,
dövlət və millət kimi onun konsolidasiya olunmasına xidmət edən müxtəlif ideyaların birliyidir.
Burada türkçülük, islamçılıq
və müasirlik cəmlənib. Bildiyimiz kimi,
müasir dünya qloballaşan dünyadır.
Bu zaman elə
ideologiya tətbiq edilməlidir ki, qloballaşma prosesində itib yox olmasın,
əksinə, öz gücünü göstərə
bilsin. Azərbaycançılıq ideologiyası üçün
bu mənada hər hansı bir təhlükə yoxdur. Çünki, bu təfəkkür
tərzi özündə
tolerantlığı da
birləşdirdiyindən qloballaşan
dünyada belə onun məhvi qeyri-mümkündür. Çünki o möhkəm tellərlə
bağlıdır.
Tibb elmləri doktoru Adil Qeybulla azərbaycançılığa
toplum və milli mənafe baxımından yanaşır:
"Azərbaycançılıq dedikdə, Azərbaycanda milli, etnik, siyasi
və digər mənsubiyyətlərdən asılı
olmayaraq, bütün toplumun ümumi və milli mənafeyi
nəzərdə tutulur.
Ona görə də azərbaycançılıq ayrı-ayrı
etnosların həm Vətən anlayışı,
həm də milli mənafe baxımından Azərbaycanın
dövlət, milli və digər maraqlarını hər şeydən yüksəkdə
tutmaqdır.
Düşünürəm ki, indi ideologiyasızlaşma dövrü
başlayıb və qloballaşan dünyada artıq bu ideologiyalara
münasibət dəyişir.
Ona görə də azərbaycançılıq qloballaşan
dünyada ölkəmizi
irəli aparan, onun yerini orada
təmin edən bir ideyadır. Bilirsiniz ki, Ermənistan monoetnik dövlət olduğundan, qloballaşan
dünyada ona irad tutulacaq. Ermənistanda ermənilərdən başqa demək olar ki, başqa,
millətlər yaşamır.
Xüsusən də, orada
azərbaycanlılara qarşı
monoetnik təmizləmə
siyasəti aparılıb.
Buna baxmayaraq,
hələ konflikt dövründə belə
Azərbaycanda xeyli erməni yaşayır.
Onların hüquqları da
Azərbaycan dövlətinin
qanun və Konstitusiyası çərçivəsində
tamamilə təmin olunub. Bu da
azərbaycanlıların daha
tolerant, qloballaşan dünyanın
parametrlərinə daha
uyğun millət kimi səciyyələndiyini
göstərir. Bu baxımdan düşünürəm
ki, azərbaycançılıq
ideologiyası qloballaşan
dünyada bizi uğurla təmin edən bir ideyadır".
Məqalə Azərbaycan Respublikası
Prezidenti yanında
KİV-ə Dövlət Dəstəyi
Şurasının maliyyə
dəstəyimlə hazırlanıb
Rüfət SULTAN
Bakı xəbər.-2011.-
31 yanvar.- S. 12.