Muğamın
azərbaycançılıq gücü...
Azərbaycan xalqı
dünyanın o xalqlarındandır ki, bəşəriyyət
qarşısında üzü ağdır. Unikal milli mədəniyyəti,
musiqisi, folkloru, ədəbiyyatı, xalça sənəti
olan xalqımız zəngin dəyərlərilə diqqət
mərkəzində olub həmişə. Azərbaycan musiqisi
bu tükənməz xəzinənin ən qiymətli
daş-qaşlarıdır desək yanılmarıq.
Mədəniyyətimiz,
musiqimiz, mənəviyyatımız kasıb deyil. Varlı xalq saymaq olar bizi. Xalq var ki, maddi baxımdan
çox varlıdır, amma mədəniyyət, mənəviyyat
sarıdan çox kasıbdır. Bu da o
xalqları vadar edir ki, başqalarının mədəniyyətinə
əl uzadıb onu özününküləşdirməyə
cəhd etsin.
Azərbaycan
musiqisi mədəniyyətimizin əsas xəttini təşkil
edir. Qədim klassik musiqisindən
danışanda iki böyük musiqi dünyasını paralel
götürürük. Bunlardan biri
özündə milli ruhumuzu, mənəviyyatımızı
daşıyan aşıq sənəti, o biri isə
muğamdır. Bu iki qüdrətli sənət
bir-birilə qardaşdır. Azərbaycançılıq
məfkurəsinə xidmət edən elm-ürfan sahibləri,
musiqişünaslar, muğam biliciləri ana
muğamımızı yaşatmaqla, onları təbliğ
etməklə onun Azərbaycana aid olduğunu tarixən təsdiq
edib. Bəzi versiyalara görə, muğam
Azərbaycana ibtidai formada İpək Yolu vasitəsilə
hindistandan gəlib. Sonra burada inkişaf
etdirilərək milli status alıb. Bu
mübahisəli məsələ olduğu üçün
onun üstündə çox dayanmaq istəmirik. Həqiqət ondan ibarətdir ki, muğam həm səsləniş
rəngarəngliyilə, həm ahəngdarlığı, həm
də oxunması ilə sırf Azərbaycan ruhuna xasdır.
Muğamı həm fars, həm hindli, həm
özbək, həm də digər xalqların xanəndələri
də oxusun, Azərbaycan xanəndəsi də. Muğam
Azərbaycan xanəndəsinin dilindən daha doğma səslənir,
qulaqlara daha mərhəm dolur. Azərbaycan
xalqının nəfəsi, dili, mənəviyyatı
yaşayır muğamlarımızda. Azərbaycançılıq
ideologiyası və muğam. Bu iki misilsiz
aləmin bir-birinə mərhəm olduğu məlumdur. Elə tarixən azərbaycançılıq
ideologiyasının yaşamasında muğamların da xidməti
böyük olub. Bu mənada ki, muğam
ana dilimizi, milli musiqi ovqatımızı, söz-şeir xəzinəmizi
özündə ehtiva edib. Azərbaycan
dilində səslənən hər bir ifadə, söz istər
orta əsrlərdə, istərsə sonrakı dönəmlərdə,
istərsə də bolşevizm zamanında xalqın
yaşaması deməkdir. Orta əsrlər ab-havası, islam dini pərdəsi altında milli musiqimizə,
dilimizə, mənəviyyatımıza, söz aləmimizə
edilən "səlib yürüş"ləri tarixdən
bəllidir. Ancaq muğamlarımız bu işğaldan can
qurtararaq özü ilə böyük bir yaddaşı
daşıyaraq günümüzə gətirib.
Muğamşünaslar
bildirir ki, muğam Azərbaycan klassik xalq
yaradıcılığı musiqisinin əsas və qədim
janrıdır. Onlar hesab edir ki, muğam
sözü iran-ərəb-türk dilində işlənilən
"məqam" sözündən yaranıb. "Məqam" sözü simli alətlərdəki
pərdə mənasını verir. Hər
muğamın da əsas (mayə) notu alətin bir pərdəsində
olduğu üçün ona bu ad verilib. Muğam haqda
alimlərdən birinin yazısında belə deyilir: "Təxminən
XIV əsrə qədər Yaxın Şərq
xalqlarının vahid musiqi janrı olub, lakin sonralar baş verən
ictimai-siyasi dəyişikliklər səbəbindən bu vahid
musiqi janrı xalqlara uyğun parçalanıb. Klassik şərq muğamı 12 əsas muğam və
6 avazatdan ibarət olub. Əsas muğamlar:
Üşşaq, Nəva, Busəlik, Rast, Əraq, İsfahan,
Zirəfkənd, Büzürk, Zəngülə, Rəhavi,
Hüseyni və Hicaz, avazatlar isə Şahnaz, Mayə, Səlmək,
Novruz, Kərdaniyə, Güvaştdan ibarət idi.
Yaxın və
Orta Şərq xalqlarının əsrlər boyu
qohumlaşmış mənəvi və maddi sərvətləri
var. Şərq xalqlarının musiqi mədəniyyətində
ümumi cəhətlər daha bariz şəkildə
özünü göstərir. Çünki
bu mədəniyyət böyük bir region əhalisinin
müxtəlif formalı və çalarlı əlaqə
prosesi əsasında təşəkkül tapıb. Məhz bu səbəbdən də onlara bir çox
mühüm ümumşərq xüsusiyyətləri
xasdır". Muğamın Azərbaycan xanəndə və
musiqiçilərinin təmsilçiliyilə bütün
Qafqazda məşhur olduğunu yazan alim bildirir ki, Zaqafqaziya, o
cümlədən Azərbaycan qədim dövrlərdən
Yaxın və Orta Şərq ölkələrini birləşdirən
regiona daxildir: "Söz yox ki, bu region ölkələri
arasında daimi əlaqələri məhz onların mədəniyyət
və məişətində bir çox müştərək
cəhətlər əmələ gətirməsinə
baxmayaraq, hər xalqın mədəniyyətində
özünəməxsus xüsusiyyətlər qorunub
saxlanıb. Bu mənada qədim ənənələrə
malik Azərbaycan xalqının mədəniyyət və incəsənəti
olduqca səciyyəvidir. Azərbaycan
xalqının qədim irsi olan muğam çoxdan geniş
kütlələrin ümumi mənəvi sərvətinə
çevrilib. Lakin çoxəsrli muğam
sənətinə aid bədii problemlər, o cümlədən
muğamın tarixi inkişafı və təkamülü,
onun kompozisiya - quruluş xüsusiyyətləri, milli
özünəməxsusluğu kimi məsələlər bu
günədək lazımi səviyyədə
araşdırılmayıb. Musiqi irsimizdə
geniş inkişaf etmiş sənəti hazırda milli musiqili
- poetik incəsənətin əsas sahəsi kimi üç
növdə təşəkkül tapıb".
Azərbaycanda 7 əsas,
3 köməkçi muğam var. Əsas muğamlardan
danışanda "Rast", "Şur", "Segah",
"Çahargah", "Bayatı-Şiraz",
"Şüştər" və "Humayun"un, köməkçi
muğamlara toxunanda isə "Şahnaz", "Sarənc"in
adını çəkə bilərik. Hətta
"Sarənc" "2-ci növ Çahargah"
sayılır. Tədqiqatçılara görə,
klassik Şərq muğamını yaradanlar və muğam
barədə əsas nəzəri fikirlər Nəsr Farabiyə,
Əbu Əli ibn Sinaya, Əlkindiyə, Əbdülqadir
Marağayiyə, İbn Əhməd Fərahidiyə, Hümam
Təbriziyə, Səfiyyəddin Urməviyə, Əbdülqadir
Qeybiyə və başqalarına məxsus olub. Azərbaycan
bəstəkarı, Azərbaycan professional musiqisinin görkəmli
nümayəndəsi Üzeyir Hacıbəyov XX əsrdə
Şərq musiqisi və muğam nəzəriyyəsinə
dair əsas fikir sahiblərindən biri kimi tanınır.
Muğamşünasların qənaətinə görə,
azərbaycançılıqla vəhdət təşkil edən
muğam xalqımızın ruhuna xidmət edib:
"Yazılı musiqi əsərindən fərqli olaraq,
muğam kompazisiyası fərd tərəfindən bəstələnmir,
müəyyən mövcud şifahi sxem üzrə
yaradılır. Əslində, muğam mücərrəd
fikir kimi mövcuddur, ifa edilməyənə qədər o
yoxdur. İfaçı muğamı ifa edən
zaman bir növ ona nəfəs verir. Muğam
nə vaxtsa kimlərsə tərəfindən bəstələnən
melodiyalardan ibarətdir. Amma ümumilikdə
muğam sənəti anonimdir. Əvvəllər
olduğu kimi indi də yaradıcı istedada malik olan
ifaçılar eyni zamanda ayrı-ayrı melodiyalar, əsasən
təsniflər və rənglər yaradır, amma geniş
kütlə üçün onları bəstələyən
sənətçinin adı bir qayda olaraq qeyri-müəyyən
qalır. Beləliklə, xalqın nəzərində
bu havaların müəllifi muxtəlif fərdlər yox, xalq
özüdür".
Bəşəriyyətin
şifahi və mənəvi irsinin şedevrlərindən
sayılan muğam Azərbaycan mənəviyyatını, azərbaycançılıq
ideologiyasını özündə qorumaqla yanaşı, həm
də bəşəri musiqi sayılır. Muğamın dünya alimləri tərəfindən
öyrənilməsinin tarixi haqda əlimizdə geniş məlumat
olmasa da, onu deyə bilərik ki, Avropa səyyahları Azərbaycana
gələndə muğam məclislərində də olub və
bu ilahi musiqinin sehrinə düşüb. Onlar
öz qeydlərində bu məqamı xüsusi sevgilə
xatırlayıb. İnternet saytlarından birində verilən
məlumata görə, keçən əsr 70-ci illərin əvvəllərində
Sovet İttifaqında YUNESKO-nun himayəsi altında
keçirilən ənənəvi musiqinin beynəlxalq
festivalları Qərb üçün Sovet Şərqinin ənənəvi
musiqisini, həmçinin orijinal musiqi mədəniyyəti
kimi Azərbaycan muğam sənətini "kəşf
edib". O vaxtdan Azərbaycan muğamı dünya mədəniyyəti
məkanına daxil olmağa başlayıb. 2003-cü
ildə YUNESKO Azərbaycan muğamını "bəşəriyyətin
şifahi və mənəvi irsinin şedevrləri"
siyahısına daxil etdi və bununla da muğamın bədii
təkrarolunmazlığını və dünya mədəniyyəti
üçün dəyərini təsdiq edib".
Tədqiqatçılar
haqlı olaraq bildirir ki, azərbaycançılıq
ideyaları Azərbaycan professional musiqisinin "şifahi"
ənənəyə malik, özünəməxsus xalq
musiqisi janrı olan muğamlarla da sıx bağlıdır. Bu fikrə qanad verənlərdən biri də fəlsəfə
üzrə fəlsəfə doktoru Vahid Ömərovdur.
Araşdırmalarında ciddi və etibarlı mənbələrə
üz tutan V.Ömərovun fikrindən belə aydın olur ki,
muğamın milli ideologiya, milli məfkurə
anlayışı ilə çuğlaşması, onların
bir-birilə doğmalıq təşkil etməsi islamdan xeyli əvvəllərə
aiddir: "Çox-çox qədimlərdə, zərdüştlük
dövründə çoxsəsli dini nəğmələr
oxumağın izləri olduğu da sübuta yetirilib. Şübhəsiz ki, bu nəğmələrin
müəllifi Zərdüştün özü olub. B.Bertels "Oçerki istorii persidskoy
literaturı" kitabında bunu etiraf edir. İslamın meydana gəlməsindən iki əsr
sonra müsəlman ruhanilərinin musiqini, mahnını, təsviri
sənəti yasaq etdiyi zamanlarda belə, xüsusilə Fufizs Hərəkatı
ilə əlaqədar çox səciyyəli nəğmələr
oxunardı. Hətta müqəddəs
kitab Quranı sadəcə olaraq mütaliə etməyə
icazə verildiyi dövrlərdə də artıq Quranın
surələrini minbərlərdən rövzəxanlar
muğam üstündə oxumağa başlamışdı.
Bunu danmaq olmaz ki, ən qədim musiqi ənənələrimizin
inkişafına dinin güclü təsiri olub. Din incəsənətin,
eləcə də, musiqi mədəniyyətinin təşəkkül
tapmasına, sərbəst "əl-qol açması"na
həmişə mane olsa da, bu iki məfhum tarix boyu qoşa
yaşayıb, bir-birilə açıq və gizli ədavət
aparıb, hətta musiqi dini təbliğ etmək məcburiyyətində
qalanda belə, yenə də öz mahiyyətini, varlığını,
sosial borcunu xürafatın dar məngənəsindən
çıxarıb, Ulu Tanrının xəlq etdiyi
insanların ruhu, duyğusunu təlatümə gətirib,
sevinc və kədərinin tərcümanı olub. Belə ki,
müəyyən dövr islam dini incəsənətin atsa da,
istər ədəbiyyat, istər təsviri sənət, istərsə
də musiqi sənəti sahəsində Yaxın Şərq,
o cümlədən, Azərbaycan xalqı özlərinin
ölməz sənət nümunələrini yaratmağa nail
olub. Əlbəttə, sənətdə olan
intibah xalqın tarixi ilə, taleyi ilə bağlıdır.
Bunları cəmiyyətin inkişaf
qanunauyğunluqlarında, ictimai şüurun tədricən
formalaşmasında axtarmaq lazımdır. Olduqca keşməkeşli
inkişaf yolu keçib, tarixin gözlənilməz,
amansız zərbələrinə cəsarətlə
dözüb ərəb xəlifələri,
monqol-köçəri feodal başkəsənləri,
İran şahları, Osmanlı paşaları və s. tərəfindən
zaman-zaman talan edilən, mənəviyyatı tapdanan Azərbaycan
xalqı yenə də öz qədim mədəniyyətini və
bu mədəniyyətə daxil olan dəyərlərini
qoruyub saxlaya bilib".
Muğamın
xalqımızın canında-qanında kök
atdığı məlumdur. Tədqiqatçılara
görə, buna baxmayaraq uzun illər muğam saraylarda,
geniş kütlə qarşısında bir müddət səslənməyib,
hətta buna qadağalar edilib. Bu məsələyə
diqqət yetirən V.Ömərov yazır ki, muğamlara
qayıdış Səfəvilər hakimiyyəti zamanında
daha geniş inikas tapıb: "Şah İsmayıl Səfəvi
dövründə 1501-1524 bu ənənə özünün
ən yüksək pilləsinə çatıb. 1587-1629 illərdə İranın hökmdarı
olmuş Şah Abbas da öz sələfinin yolunu davam etdirib.
Onun dövründə şiə məzhəbinin
banisi İmam Əlinin şəninə şəbeh
tamaşaları göstərilər, müxtəlif dini mərasimlər
çox təntənəli keçirilər. Bizcə, mükəmməl, kamil muğam
ifaçıları məhz həmin dövrlərdən
yetişməyə başlayıb. Bu
gün cəsarətlə və fəxrlə deyə bilərik
ki, çağdaş Azərbaycan musiqisinin uğurlarında həmin
dövrlərdən qalmış musiqi, mahnı folklorunun, onun
memorial qaynaqlarının nailiyyətləri əvəzedilməzdir".
Azərbaycançılıqla
sıx bağlı olan muğamlarımıza Hələ Sovet
dövründən xalqın və dövlətin ciddi
marağı olub. Azərbaycanın mərhum
Prezidenti Heydər Əliyevin muğam sənətinə, xanəndələrə
göstərdiyi diqqət və qayğı onların
yadından heç zaman çıxmır. Bu gün Prezident İlham Əliyev tərəfindən
də rəsmi dövlət səviyyəsində muğama
qayğı göstərilir. Bu işdə
xüsusilə Heydər Əliyev Fondunun prezidenti, millət vəkili,
YUNESKO və İSESKO-nun xoşməramlı səfiri Mehriban
xanım Əliyevanın xidmətlərini xüsusi qeyd etmək
lazımdır.
2009-cu ilin
11 noyabrında Heydər Əliyev Fondunda "Azərbaycan
muğamları" layihəsi çərçivəsində
yeni nəşrlərin təqdimatı keçirildi.
Fondun prezidenti Mehriban Əliyeva orada bildirib ki, 8 diskdən ibarət
"Azərbaycan muğamı" multimedia toplusu muğama
dair tədris vəsaitidir, muğam
ifaçılığı üzrə müəllimlər,
ustadlar üçün bir dərslikdir. Bundan əlavə,
Fond tərəfindən son illər ardıcıl olaraq
respublika və beynəlxalq səviyyəli muğam müsabiqələri,
festivalları keçirilir. Muğam
ustalarına, gənc xanəndələrə geniş şərait
yaradılır.
Muğam Azərbaycana
aiddir və azərbaycançılıq ideologiyasını
öz ritmində, səslənişində, avazında
yaşadıb təbliğ edir.
İradə SARIYEVA
Bakı xəbər .-
2012.- 11 sentyabr.- S. 15.