Azərbaycanın yeni turizm proqramında nələr var?

Elxan Mikayılov: "Turizmin inkişafı üçün dövlət tərəfindən xüsusi proqram hazırlanıb"

"Dövlət tərəfindən turizmə verilən ən böyük dəstək bu sahəyə güzəştli kreditin ayrılmasıdır"

Turizm sənayesinin inkişafı üçün zəngin ehtiyatlara, əlverişli iqtisadi-coğrafi mövqeyə malik olan Azərbaycanda son illər bu sektorda yeniliklər nəzərəçarpacaq dərəcədə artıb. Turizm sektorunun inkişafı üçün yeni proqram hazırlanır

Həmin proqrama əsasən, regionlarda turizmin inkişafını stimullaşdırmaq üçün yeni layihələr hazırlanacaq. Məlumata görə, İqtisadiyyat və Sənaye Nazirliyi bu proqramın həyata keçirilməsi üçün xarici ölkələrin təcrübəsini öyrənir. Qeyd edək ki, yerli mütəxəssislər Norveç, Finlandiya, İsveçrə, Yunanıstan, İspaniya, İtaliya, Fransa, Türkiyə, Birləşmiş Ərəb Əmirlikləri və digər dövlətlərin təcrübəsi ilə maraqlanır. Bu ölkələrin dövlət büdcəsinə daxil olan gəlirlərin payında turizmin böyük yer tutması reallıqdır. İspaniya, İtaliya və Türkiyədə ölkəyə daxil olan valyutanın portfelində turizm az qala 40-50 faiz paya malikdir. Ona görə də qeyri-neft sektorunun gələcək əsas inkişaf sütunu olan turizmin inkişafına dair ayrıca proqramın qəbul olunması nəzərdə tutulur.

Ekspertlər turizm sahəsinin inkişafı üçün adıçəkilən proqramın qəbul olunmasının vacib olduğunu düşünür.

Turizm sahəsi üzrə ekspert Elxan Mikayılov "Bakı-Xəbər"ə açıqlamasında qeyd etdi ki, turizmin inkişafı üçün dövlət tərəfindən xüsusi proqram hazırlanıb. Onun fikrincə, dövlət tərəfindən turizmə verilən ən böyük dəstək bu sahəyə güzəştli kreditin ayrılmasıdır.

Həmsöhbətimizin sözlərinə görə, yeni ildən elektron vizaya keçid bu sahə üçün imkanlar açır. Elektron viza sisteminə uyğun olaraq turistlər üçün sənədləşmənin daha asan aparılması, viza xərclərinin azaldılması, habelə vaxta qənaət edilməsi kimi məsələlər həll olunacaq: "Cari il avqust ayının 1-dən qüvvəyə minən Miqrasiya Məcəlləsində də turist vizalarının elektron formada verilməsini nəzərdə tutan bir sıra maddələr əksini tapıb. Mühüm yeniliklərdən biri də turizm sahəsində elektron xidmətlərin təşkilidir. Bu məqsədlə yaradılmış yeni saytda vətəndaşlara 12 növ elektron xidmət göstərilir. Nazirliyin "e-hökumət" dövlət informasiya sisteminə inteqrasiyası istiqamətində də tədbirlər görülür. Bundan başqa, Bakı, Xaçmaz, Quba, Şamaxı, Şəki, Lənkəran, eləcə də İsmayıllının Lahıc kəndində turistlərə məlumatların çatdırılması məqsədilə yaradılmış turizm informasiya mərkəzlərində ziyarətçilərə elektron xidmətlərin göstərilməsi mümkündür".

Ekspert qeyd etdi ki, "Azərbaycan 2020: Gələcəyə Baxış" İnkişaf Konsepsiyasında da turizmin inkişaf hədəfləri dəqiq əksini tapıb. Konsepsiya çərçivəsində 2020-ci ilədək turizm infrastrukturunun inkişaf etdirilməsi, beynəlxalq standartlara cavab verən turizm xidmət sahələri dairəsinin genişləndirilməsi, sektorun rəqabət qabiliyyətinin yüksəldilməsi, turizmin ÜDM-də xüsusi çəkisinin artırılması istiqamətində tədbirlərin həyata keçirilməsi nəzərdə tutulur. Bu sahəyə dair qanunvericilik aktlarının və standartların təkmilləşdirilməsi, bölgələrdə turizm fəaliyyətinin stimullaşdırılması, informasiya-təbliğat işinin gücləndirilməsi, milli, tarixi-mədəni, sosial-iqtisadi və təbii xüsusiyyətlərin nəzərə alınması yolu ilə turizm marşrutlarının yaradılması təşviq ediləcək.

Günel CƏLİLOVA

Bakı xəbər.-2013.-24 dekabr.-S.12.