Vətəndaş təəssübkeşliyi və dövlət maraqlarının müdafiəsi...

Hər bir müstəqil dövlətin qurulması, müdafiəsi ilk əvvəl vətəndaş təəssübkeşliyilə bağlıdır. Dövlətin bağımsız olmasında vətəndaşların da səyi, xidməti əvəzsiz olur. Azərbaycanda dövlət quruculuğu məsələsində sadə vətəndaşlar, ictimaiyyət nümayəndələri də iştirak edib. Vətənin, torpağın hər qarışı, hər guşəsi bizim üçün əziz və müqəddəsdir.

Vətəndaş təəssübkeşliyi vətəni, torpağı, dövləti əhatə edən böyük bir hissdir. Azərbaycanda dövlət əhəmiyyətli istənilən bir məsələ ilə bağlı vətəndaş təəssübkeşliyi özünü göstərib. Tarixçilər bildirir ki, Azərbaycan xalqı hər zaman təəssübkeş bir xalq kimi özünü göstərib. Tarixçilərin sözlərinə görə, bu təəssübkeşlik özünü çox məsələlərdə büruzə verib. Vaxtilə ermənilər Qarabağda Topxana meşələrini yandırıb talan edəndə Azərbaycanın hər yerində vətəndaş narazılıqları baş verib. Vətəndaş təəssübkeşliyindən çıxış edən insanlar bu mənfur hala qarşı kəskin mübarizə aparıb.

Tarixçi Həyat Məhərrəmovanın bildirdiyinə görə, müstəqil dövlətin suverenliyinin təminatı, mühafizəsi üçün milli təhlükəsizlik elementlərinə diqqətlə münasibət bildirilməsi, yanaşılması vacib məqamdır: "Xüsusən də Azərbaycan kimi strateji, həssas bir bölgədə yerləşən, təbii ehtiyatlarla zəngin bir ölkə üçün bu məsələ daha aktualdır. Vətəndaş təəssübkeşliyi dövlətimizin maraqlarına yönəlib, onun sərvətlərini mühafizə etməyə hər bir vətəndaş hazırdır. Azərbaycanın dövlət müstəqilliyi oddan-alovdan keçib, böyük mübarizə yolu qət edərək var olub dövlətimiz. Azərbaycanın müstəqilliyi üçün təhlükə yarandığı bir dövrdə-1993-cü ildə xalqın tələb və çağırışı ilə yenidən hakimiyyətə qayıdan ulu öndər Heydər Əliyevin ilk işi ölkəmizin parçalanma təhlükəsinin qarşısının alınması və dövlət maraqlarımızın ən yüksək səviyyədə təmin olunması oldu. Azərbaycanda vətəndaşı təəssübkeşliyi nəticəsində Heydər Əliyev hakimiyyətə gəldi və dövlətimizi bəlalardan xilas etdi. Bu, vətəndaşlarımızın ürəyindən xəbər verdi. Bu müstəvidə də Heydər Əliyevin Azərbaycanın dövlətçilik maraqlarının beynəlxalq aləmdə təmin edilməsinə yönələn uğurlu siyasəti demokratik və güclü dövlət quruculuğuna yeni təkan verdi".

Sosioloq Aytən Kamranqızı (Bağırova) isə bildirdi ki, həmin dövrdə Xəzərin neft-qazla zəngin strukturlarının işlədilməsinə xidmət edən "Əsrin müqaviləsi" adı verilən kontraktın imzalanması, Bakı-Ceyhan neft kəmərinin reallaşması istiqamətində atılan addımlar vətəndaşlara böyük töhfə olub: "Bundan başqa, o illərdə müstəqil Azərbaycan dövlətinin Konstitusiyasının qəbul edilməsi vətəndaşların təəssübkeşliyinin müdafiəsi, dövlətçiliyin qorunması sahəsində uğurlu bir hadisə oldu. Eyni zamanda, ölkəmizin beynəlxalq təşkilatlara üzv olması Azərbaycanın dövlətçiliyinin həm də öz imici olan dövlətə çevrilməsində xüsusi önəm daşıyan Dağlıq Qarabağ münaqişəsinin həlli yolunda Heydər Əliyev tərəfindən həyata keçirilən tədbirlər beynəlxalq aləmdə rəğbətlə qarşılandı. Heydər Əliyevin Azərbaycan dövlətinin möhkəmlənməsi yolunda həyata keçirdiyi ən önəmli tədbirlərdən biri də bölgədə marağı olan dövlətlər arasında tarazlaşdırıcı siyasəti həyata keçirməsi oldu. Bununla da Heydər Əliyev dünyanın supergüc dövlətləri arasında Azərbaycanın siyasi çəkişmə meydanına çevrilməsinin qarşısını uzaqgörənliklə ala bildi. Heydər Əliyev Azərbaycanı və Azərbaycan xalqını sevirdi. O həm bir siyasət xadimi kimi, həm də bir vətəndaş təəssübkeşliyi ilə bu dövlətin maraqlarını müdafiə edən addımlar atır, qərarlar verirdi. O öz təəssübkeşlik nümunəsilə vətəndaşlara örnək göstərdi".

Dağlıq Qarabağ uğrunda gedən döyüşlərdə vətəndaşlarımızın fəal olduğunu, bu mübarizə və mücadilədə ermənilərlə mərdliklə vuruşduğunu xatırladan A.Kamranqızı hesab edir ki, bunlar vətəndaş təəssübkeşliyilə dövlətin ərazi bütövlüyünü, müstəqilliyini qorumağa cəhd olub.

1992-ci il fevralın 25-dən 26-na keçən gecə Azərbaycanın Xocalı şəhərinin qan içində boğulmasının xalqımızın böyük ağrısı olduğunu bildirən sosioloqun sözlərinə görə, hər il bu qətliam vətəndaşların təşəbbüsilə aksiyalar formasında və digər şəkildə anılır: "Tarix boyu Azərbaycan torpağının övladları düşmənə qarşı mübarizə aparıb. Bu mübarizənin də məqsədi Azərbaycanın milli təhlükəsizliyini qorumaq olub. Bir çox hallarda Azərbaycan dövlətinin ərazisinə öz qonşuları tərəfindən təhlükəli müdaxilələr baş verib. Hər zaman şimaldan Rusiyadan, cənubdan İrandan, qərbdən isə Ermənistandan bizə təhlükə gəlib. Belə şəraitdə vətəndaş təəssübkeşliyi dövlət maraqlarının müdafiəsi sahəsində böyük rol oynamalıdır. Biz təhlükədən danışanda yalnız işğal faktından, yaxud hücumlardan danışmırıq, həm də mənəvi təhlükədən danışırıq. Ola bilsin ki, adlarını çəkdiyimiz dövlətlər müxtəlif vasitələrlə vətəndaşlarımızdan bizim dövlətçiliyin əleyhinə istifadə etmək fikrinə düşsün. Necə də ki, düşür. Bəzi vətəndaş adına layiq olmayanlar ya pula, ya sosial şəraitinin yaxşılaşdırılması təklifinə uyub dövlətimizə qarşı səhv addım atmaq istəyir. Amma buna nail ola bilmir, çünki Azərbaycan dövlətinin təhlükəsizliyi etibarlı əllərdədir. Vətəndaş təəssübkeşliyi və dövlət maraqları ziyanlı hallara qarşı mübarizədə vəhdət təşkil edir. Hər kəs bilməlidir ki, dövlət maraqlarının müdafiəsində cəmiyyətin birmənalı mövqeyi və vətəndaşların təəssübü olduqca vacibdir, labüddür. XX əsrin böyük faciəsi olan Xocalı soyqırımı Azərbaycan vətəndaşlarının böyük ağrı-acı ilə yada saldığı bir genosid aktıdır. Bu genosidi azərbaycanlılara qarşı erməni yaraqlıları törədib. Azərbaycan xalqı, Azərbaycan ictimaiyyəti öz vətəndaşlıq mövqeyindən çıxış edərək Xocalı soyqırımının dünyada tanıdılmasına nail olmaq üçün aksiyalar keçirir. Bu etirazların nəticəsi mütləq olacaq. Xalqımız dövlətçiliyimizin müdafiəsinə hər zaman böyük töhfə verib. Mən bir məqamı qeyd etmək istəyirəm. Bu da birbaşa vətəndaşlıq təəssübkeşliyilə bağlıdır. Valideynlər könüllü olaraq öz övladlarını əsgəri xidmətə yola salır. İndi vətəndaşların 85 faizi istəyir ki, övladı Azərbaycan ordusunda xidmət etsin, dövlətimizin ərazi bütövlüyünü, onun təhlükəsizliyini qorusun. Amma illər əvvəl müəyyən vətəndaşlar övladlarının hərbiyə getməməsi üçün əllərindən gələni edirdilər. Dövlətin apardığı məqsədyönlü siyasət vətəndaşların da dövlətin qorunmasına marağını gücləndirib. Bu da çox təqdirəlayiq haldır. Azərbaycan dövlətinin müdafiəsi həm də vətəndaş təəssübkeşliyindən keçir". A.Kamranqızının bildirdiyinə görə, H.Əliyevin apardığı siyasəti uğurla davam etdirən İlham Əliyevin də bu sahədə həyata keçirdiyi işlər saysız-hesabsızdır. İ.Əliyevin də vətəndaş təəssübkeşliyilə dövlət maraqlarının müdafiəsinin eyni məcrada birləşməsinə çalışır: "İlham Əliyevi seçən xalq onun Prezident kimi hazırda apardığı siyasəti də dəstəkləyir. Onun dövlətçiliyin müdafiəsi naminə atdığı hər bir addım vətəndaşlar tərəfindən geniş müzakirə edilir. Prezidentimiz İlham Əliyevin Azərbaycanın dövlətçilik maraqlarının beynəlxalq səviyyədə təmin edilməsinə yönələn uğurlu siyasəti ona beynəlxalq aləmdə böyük şöhrət gətirdi. Bu amil də vətəndaşların gözündən qaçmadı. Onlar bilir ki, təəssübünü çəkdikləri dövlətin maraqları etibarlı bir şəxsiyyət tərəfindən qorunur. İlham Əliyev Azərbaycan dövlətçiliyini daha çox inkişaf etdirəcəyini və dövlət maraqlarımızı yüksək səviyyədə müdafiə edəcəyini 2004-cü ilin fevral ayının 6-da Moskvaya səfəri zamanı Rusiya rəhbərilə görüşündə də parlaq şəkildə nümayiş etdirdi. O, yüksək səviyyəli Rusiya dövlət rəsmilərilə görüşlərində Azərbaycanın dövlət maraqlarının ən yüksək səviyyədə qorunmasına cavab verən siyasət yürüdəcəyini xüsusi vurğuladı. Bu həm də dövlət başçımızın bir vətəndaş təəssübü, yanğısı, qətiyyəti kimi başa düşülməlidir. Azərbaycan xalqının, dövlətinin maraqlarını, milli təhlükəsizliyini hər şeydən uca tutan bir Azərbaycan oğlu yalnız alqışlara layiqdir. İlham Əliyevin ən böyük uğurlarından biri də Azərbaycanın dövlət maraqlarının hələ uzun illər təmin edilməsinə yönələn və əsası heydər Əliyev tərəfindən qoyulan tarazlayıcı siyasəti davam etdirməsilə bağlıdır. Bu çərçivədə də İlham Əliyev tərəfindən xarici siyasətimizin prioritetlərindən olan balanslaşdırıcı siyasətin yeni müstəviyə çıxarılması beynəlxalq aləm tərəfindən də məmnunluqla qarşılandı. Burada bir məqama diqqət yetirmək istəyirəm. Məlumdur ki, İlham Əliyev mahir bir siyasətçi kimi beynəlxalq aləmdə Azərbaycanın dövlət müstəqilliyini şübhə altına ala biləcək regional münaqişələrə cəlb edilməsinə imkan vermədi. Bunu 2008-ci ildə Gürcüstan-Rusiya müharibəsi zamanı İlham Əliyevin siyasət yeritməsi sübut edir".

Sosioloq hesab edir ki, Prezident İlham Əliyevin ölkə daxilində də Azərbaycan dövlətinin daha da güclənməsinə və onun təhlükəsizliyinin təmin edilməsinə yönələn tədbirlər həyata keçirməsi milli gəlirlərin artmasına yol açdı: "Bu da Azərbaycanda hərbi xərclərə Ermənistanın dövlət büdcəsindən iki dəfə çox vəsait ayırmağa imkan verdi. Hərbi cəhətdən güclənmə və ordunun müasir silahlarla təmin edilməsi sahəsində həyata keçirilən tədbirlər Dağlıq Qarabağ münaqişəsinin həlli ilə bağlı aparılan danışıqlarda Azərbaycanın mövqeyini daha da möhkəmləndirdi".

Ekspertimizin qənaətinə görə, mövzuda əks olunan məsələlərin hamısının vətəndaş təəssübkeşliyi və bu təəssübkeşliyin dövlət maraqlarımızın qorunması və müdafiəsi istiqamətinə yönəldiyi faktdır.

Azərbaycanın dövlət maraqlarını qorumaq, ona xidmət etmək hər bir vətəndaşın borcudur. Təbii, hər kəs öz üzərinə düşən yükü əzmkarlıqla, mətanətlə daşımalıdır. Söhbət vətəndən, dövlətdən, dövlətçilikdən, milli-mənəvi maraqların müdafiəsindən gedəndə hamı bu amala xidmət etməlidir.

İradə SARIYEVA

Bakı Xəbər.-2013.-12 fevral.-S.15.