İctimai mənafelərə cavab verən daha bir dövlət layihəsi bu dəfə Sumqayıtda...

Azərbaycanda ictimaiyyətin maraqlarını təmin edən, insanların həyatını asanlaşdıran bir sıra xidmət sahələri var ki, onlar birbaşa dövlətimiz tərəfindən yaradılıb. Dövlətin ictimaiyyətin maraqlarının müdafiəsilə bağlı həyata keçirdiyi tədbirlərin bir qismi bu xidmət qurumlarının vasitəsilə reallaşır. Axır zamanlar "ASAN xidmət" haqqında çox danışılır, bu haqda çox eşidirik. "ASAN xidmət" Bakıdan sonra indi də Sumqayıt şəhərində fəaliyyət göstərir.

Bu ilin may ayının 3-də sumqayıtlılar "ASAN xidmət"in açılışının şahidi olub. Bu xidmətin açılması yüzlərlə vətəndaşın həlli çətin olan probleminin aradan qalxmasına səbəb olub. Sumqayıt sakinlərinin razılıqla qarşıladığı yeni xidmət sektorunun fəaliyyətindən hər bir şəhər sakini istifadə edə bilir.

Məlumdur ki, Azərbaycan Prezidenti İlham Əliyev Vətəndaşlara Xidmət və Sosial İnnovasiyalar üzrə Dövlət Agentliyinin Sumqayıt "ASAN xidmət" mərkəzinin açılışında iştirak edərək bu sistemlə bağlı öz qənaətini bölüşüb.

Sumqayıt şəhərində fəaliyyət göstərən hüquq firmalarından birində çalışan hüquqşünas Tamilla Bağırovanın sözlərinə görə, "ASAN xidmət"in Sumqayıt şəhərində öz işinə başlaması yüzlərlə vətəndaşın probleminin çözülməsi deməkdir. T.Bağırova bildirdi ki, bura müraciət edən hər bir ictimaiyyət nümayəndəsinin problemi yerindəcə öz həllini tapır: "Mərkəz bir aya yaxındır ki, fəaliyyətə başlayıb. 15-25 may arasında mərkəzə 8 mindən artıq vətəndaş müraciət edərək müxtəlif xidmətlərdən yararlanıb. Mərkəzə Sumqayıt sakinləri ilə yanaşı, Abşeron, Xızı, Siyəzən və Şabran rayonlarının sakinləri də müraciət edib və onlara da müvafiq xidmətlər göstərilib. Bu mərkəzdə bütün xidmət növləri var. Burada ilk dəfə ölkədə tətbiq olunan elektron ərizə doldurma aparatı yerləşdirilib. Mərkəzə müraciət edən vətəndaş elektron ərizəni dolduraraq eyni vaxtda çap etdirə bilər. "ASAN xidmət" mərkəzinin əsas prinsipləri operativlik, şəffaflıq, nəzakətlilik, məsuliyyət, etik davranış qaydalarına nəzarət və rahatlıqdır. Mərkəz internetə daim açıq olan kompyuterlərlə təchiz edilib və vətəndaşların burada bütün növ elektron xidmətlərdən yararlanması üçün hər cür şərait yaradılıb. "ASAN xidmət" mərkəzində vətəndaşların gözləməsi və vaxtını səmərəli keçirməsi üçün funksional yardımçı xidmətlər - bank, sığorta, hüquqi yardım və tərcümə mərkəzləri, laboratoriya, tibbi xidmət, uşaq əyləncə guşəsi, internet-kafe, poçt şöbələri, fotostudiya fəaliyyət göstərir. "ASAN xidmət"in binasında əlillər üçün də bütün zəruri şərait yaradılıb. Binanın girişində onlar üçün xüsusi lift quraşdırılıb. Gözdən əlillərin sərbəst hərəkəti üçün isə hər bir mərtəbənin döşəməsinə xüsusi örtüklər vurulub və lövhələr onların oxuya biləcəkləri müvafiq hərflərlə hazırlanıb.

Mərkəzdə, həmçinin, vətəndaşların qəbulunun elektron növbə əsasında həyata keçirilməsi üçün ən müasir avadanlıq quraşdırılıb. Elektron lövhələr və işarələr vətəndaşların məlumat əldə etməsini asanlaşdıracaq. Buranın özəl cəhətlərindən biri budur ki, burada vətəndaşlara könüllülük prinsipi əsasında xidmət göstərmək üçün 30 gənc seçilib və onlar təlimlərə cəlb olunub".

Azərbaycan dövlətinin vətəndaşların rifahı naminə atdığı addımların müsbət nəticələrinin birinin də "ASAN xidmət" olduğunu deyən hüquqşünas bildirdi ki, mərkəzdə yerləşdirilən xüsusi terminallar vasitəsilə mobil rabitə, internet, işıq, su, qaz və digər kommunal xidmətlərinin, kredit və sığorta ödənişlərinin həyata keçirilməsi mümkündür: "Mərkəzin "Çağrı" xidməti vasitəsilə vətəndaş mərkəzə gəlmədən internet və ya telefonla bütün xidmət növləri, tələb edilən sənədlər barədə məlumat ala və növbə tuta bilər. Mərkəzdə videomüşahidə kameraları və rüsumların məbləğlərini əks etdirən rüsum tablosu da quraşdırılıb. "ASAN xidmət" mərkəzində 9 dövlət orqanı - Ədliyyə, Daxili İşlər, Vergilər nazirlikləri, Əmlak Məsələləri Dövlət Komitəsi, Dövlət Gömrük Komitəsi, Dövlət Miqrasiya Xidməti, Dövlət Torpaq və Xəritəçəkmə Komitəsi, Dövlət Sosial Müdafiə Fondu və Milli Arxiv İdarəsi tərəfindən 25 hüquqi xidmət həyata keçirilir. Bundan əlavə, mərkəzdə vətəndaşlara 22 növ funksional yardımçı xidmət göstəriləcək. Korrupsiya hallarının qarşısının alınması, şəffaflığın təmin edilməsi məqsədilə mərkəzdə xidmət prosesi fasiləsiz videokamera vasitəsilə qeydiyyata alınacaq. Xidmət prosesi müasir İP telefon və İP şəbəkə sistemi ilə təmin edilib. Xidmətlərin tənzimlənməsi məqsədilə elektron monitor və elan tabloları qurulub. Xidmətin "asan.gov.az" internet saytı vasitəsilə vətəndaşlar üçün "online" növbəyə yazılma, elektron ərizələr doldurma, sənədləri müvafiq orqanlara elektron qaydada göndərmə və digər imkanlar yaradılıb. "ASAN xidmət" mərkəzinin fəaliyyətinin məqsədi dövlət orqanlarının hüquqi xidmətlərinin göstərilməsində vətəndaşların razı salınması, şəffaflığın təmin edilməsi, korrupsiya hallarının istisna edilməsi, müasir texnologiyaların, "bir qapı" prinsipinin tətbiqi, dövlət qulluqçusu-vətəndaş münasibətlərində yeni düşüncə tərzinin - "dövlət qulluqçusunun vəzifəsi vətəndaşın hüququnu təmin etməkdir" yanaşmasının formalaşdırılmasıdır".

Hüquqşünas burada səyyar avtobusların da əhaliyə xidmət göstərdiyini bildirdi. Onun sözlərinə görə, "ASAN xidmət"in avtobusunda səyyar xidmət konsepsiyasının əsas komponentləri - alternativ enerji mənbələrindən istifadə olunması, nağdsız hesablaşmaların və şəffaflığın təmin edilməsi, vətəndaşların dövlət orqanlarına etimadının gücləndirilməsi əksini tapıb: "Bölgələrdə səyyar fəaliyyət göstərmək üçün "ASAN xidmət"in şəxsi heyəti və hərəkət vasitələri şimal və cənub qruplarına bölünəcək. Səyyar qrupların hər biri şəhər və rayonlarda 15 gündən bir ayadək vətəndaşlara xidmət göstərəcək. Qrup müvafiq şəhər və rayona daxil olarkən xidmətlərin həyata keçirilməsi üçün iki iş günü ərzində nəzərdə tutulmuş xüsusi məkanlarda yerləşdiriləcək. Bildiyim qədər agentliyin xüsusi sifarişi əsasında Türkiyədə yığılan "Mercedes" markalı avtobus keyfiyyətli xidmətin göstərilməsi üçün yüksək zövqlə və bu qəbildən olan nəqliyyat vasitələrindən fərqli şəkildə hazırlanıb. İş prosesində sərf olunacaq elektrik enerjisini avtobusun üzərində quraşdırılan günəş panelləri təmin edəcək. Avtobusun üzərində quraşdırılan böyük monitorda rüsumlar, növbələr, müxtəlif görüntülər, xidmətlər barədə məlumatlar nümayiş etdiriləcək. Avtobusda "ASAN xidmət"in 11 əməkdaşının eyni vaxtda vətəndaşlara xidmət göstərməsi üçün hər cür şərait yaradılıb. Həmçinin, vətəndaşların yağışlı və ya günəşli havada növbə tutması üçün avtobusda rahat çadır da var. Avtobusun qoşqusunda isə "ASAN xidmət" əməkdaşlarının istirahəti və qidalanması üçün yüksək şərait yaradılıb".

Qeyd edək ki, Azərbaycan Respublikasının Prezidenti İlham Əliyev Azərbaycanda yeni yaradılan və əhalinin bir qisminin tələbatlarını ödəyən "ASAN xidmət" haqda çox müsbət fikirlər bildirib: "ASAN xidmət"in yaradılması Azərbaycanda aparılan ciddi islahatların təzahürüdür. Bu yeni sistemdir. Bu, Azərbaycan brendidir. Bu, yenilikdir, müasirlikdir, ölkəmizin inkişafıdır. "ASAN xidmət"in bir neçə əsas fəaliyyət istiqaməti vardır. Onların arasında insanlara yüksək səviyyəli xidmət məsələsi ön plandadır. Bu sistem vasitəsilə xoşagəlməz halların qarşısı alınır, korrupsiyaya qarşı mübarizə daha da gözəl səmərə verir, bürokratiyaya qarşı mübarizə artıq "ASAN xidmət" vasitəsilə yeni pilləyə qalxır".

Azərbaycan Respublikasının Prezidenti Administrasiyasının Hüquq-mühafizə orqanları ilə iş şöbəsinin müdiri Fuad Ələsgərov da mətbuata açıqlamasında "ASAN xidmət"in Azərbaycan dövləti tərəfindən Azərbaycan ictimaiyyətinin maraqlarının müdafiəsi naminə yaradıldığını deyib: "...Cənab İlham Əliyevin andiçmə mərasimində "Mən hər bir Azərbaycan vətəndaşının Prezidenti olacağam" dedikdə "dövlət xalq üçün çalışmalıdır" prinsipini rəhbər tutaraq xalqın hər bir nümayəndəsinin qayğısına qalacağını bəyan etmişdir. Son on il ərzində cənab Prezidentin gördüyü işlərin hər birində xalqımız bunun şahidi olmuşdur. "Dövlət siyasətinin mərkəzində Azərbaycan vətəndaşıdır. Siyasət Azərbaycan vətəndaşının sosial rifahının, təhlükəsiz yaşayışının təmin edilməsinə xidmət etməlidir. Hər şeyi biz Azərbaycan vətəndaşı üçün edirik. Budur bizim məqsədimiz" deyən cənab Prezident dövlət tərəfindən vətəndaşlara göstərilən xidmətin etik davranış qaydalarına ciddi əməl edilməklə, süründürməçiliyə, bürokratik əngəllərə yol verilmədən həyata keçirilməsini hər bir dövlət qulluqçusunun qarşısında başlıca vəzifə olaraq qoymuşdur. Məhz cənab İlham Əliyevin təşəbbüsü ilə yaradılan "ASAN xidmət" konsepsiyasının əsas məqsədi də dövlət orqanlarının xidmətlərinin göstərilməsində vətəndaş məmnunluğunun, şəffaflığın təmin edilməsi, korrupsiya hallarının istisna edilməsi, müasir texnologiyaların tətbiq edilməsi, dövlət qulluqçusu-vətəndaş münasibətlərində yeni düşüncə tərzinin formalaşdırılmasından ibarətdir. Azərbaycan Respublikasının Prezidenti yalnız "ASAN xidmət" mərkəzlərinin coğrafiyasının deyil, həm də mərkəzlərdə göstərilən xidmət növlərinin sayının artırılması, daha geniş sahələr üzrə vətəndaşlara keyfiyyətli və şəffaf xidmətlərin göstərilməsi barədə ciddi tapşırıqlar vermişdir. Həmin xidmətlər daha aydın olsun deyə onları sadalamaq istərdim: bank hesablarının açılması, valyuta mübadiləsi, dövlət rüsumlarının və xidmət haqlarının, cərimələrin ödənilməsi ilə əlaqədar bank xidmətləri, avtomobillər və daşınmaz əmlak üçün könüllü və icbari sığorta xidmətləri. Hüquqi yardım xidmətləri - hüquqi məsələlərə dair şifahi və yazılı məsləhətlər, izahatlar və arayışlar verilməsi; məhkəmələrə iddia ərizələrinin verilməsi ilə bağlı hüquqi yardım göstərilməsi; ərizələrin, şikayətlərin və hüquqi xarakterli sənədlərin tərtib edilməsi; vətəndaşların müraciəti əsasında digər növ hüquqi yardım göstərilməsini əhatə edir. Eyni anda həm sadə vətəndaşlarımız, həm də iş adamlarımız "ASAN xidmət" mərkəzlərindən öz məqsədlərinə uyğun faydalana biləcək. Bir məsələni də qeyd etmək istərdim. "ASAN xidmət" mərkəzlərinin bütün ölkəni əhatə etməsi bir neçə ilə mümkün olacaq. Lakin bu o demək deyil ki, ölkənin digər regionları "ASAN xidmət"dən faydalana bilməyəcək. Bununla əlaqədar cənab Prezidentin tapşırığı əsasında xidmətlərin göstərilməsi üçün zəruri müasir texnoloji avadanlıqlarla təchiz edilmiş xüsusi avtobuslar iyun ayından etibarən ölkənin şəhər və rayonlarında səyyar formada əhaliyə xidmət göstərəcək".

Azərbaycan ictimaiyyətinin maraqlarının müdafiəsinə böyük şərait yaradan Azərbaycan dövləti onların qayğılarını yüngülləşdirməkdə, problemlərini həll etməkdə geniş fəaliyyət göstərir. "ASAN xidmət" kimi qurumların açılması ictimai maraqların müdafiəsinə tərəf atılan çox dəyərli bir addımdır.

İradə SARIYEVA

Bakı Xəbər.-2013.-30 may.-S.15.