Gənclər bayramı gəncliyin
milli şüurunun
formalaşmasında necə rol oynayır?
Gənclərimizin iştirakı ilə həyata
keçirilən çoxsaylı ictimai-siyasi,
mədəni-sosial proqramlar o qədər çoxdur ki, sadalamaqla qurtarmaz. Çağdaş
Azərbaycan tarixinin elə bir səhifəsi, elə bir
ili, ayı tapılmaz ki,
orada gənclərimizin dəst-xətti
olmasın. Gənclərimiz
tariximizin inkişafında yaxından iştirak edir. Əlbəttə,
gənclərimizin zəkasından yaranan
neçə-neçə layihə, proqram
ölkəmizdə müsbət qarşılanır.
Bundan başqa, müasir tariximizdə
elə günlər var ki, onlar gənclərin həyatında
əlamətdar rol oynayır. Bu gün həm də onlarda
milli mənlik şüurunun
və vətənpərvərlik hisslərinin
inkişafına ciddi təkan verir. Belə yaddaqalan,
müstəsna günlərdən biri, bəlkə
elə ən birincisi 2 fevral-Ümumrespublika
Gənclər Günüdür. Bildirək ki, Azərbaycanın sabiq Prezidenti, azərbaycançılıq,
bütövlük ideyasının müəlliflərindən
biri Heydər Əliyev tərəfindən
təməli qoyulan dövlət gənclər
siyasəti mövcuddur və indi həmin siyasət daha
qətiyyətlə həyata keçirilir. Tarixçi Həyat Məhərrəmova bizimlə söhbətində
bildirdi ki, respublikamızda
xüsusi dəyərə malik
olan 2 fevral gəncliyin
həyatını məqsədyönlü şəkildə
yönəldən, onları yeni uğurlara istiqamətləndirən bir gündür:
"Ölkədə gənclər siyasətinin əsasını
ümummilli lider Heydər
Əliyev qoyub. Heydər Əliyev gənclərin
imkan və bacarıqlarını yüksək
qiymətləndirir, onların problemlərinin həlli istiqamətində
həyata keçirilən tədbirlərə xüsusi
önəm verirdi. Həmçinin, bu siyasəti müstəqil Azərbaycan
dövlətinin fəaliyyətinin ən mühüm
istiqamətlərindən biri kimi dəyərləndirirdi. Gənclər,
İdman və Turizm Nazirliyinin yaradılması (hazırda Gənclər
və İdman Nazirliyi),
müstəqil Azərbaycan gənclərinin ilk
ümumrespublika forumunun
keçirilməsi, 2 fevralın Azərbaycan Gəncləri Günü elan edilməsi,
5 dövlət proqramının qəbulu, "Dövlət gənclər
siyasəti haqqında" fərman və geniş fəaliyyət proqramının təsdiq
edilməsi Heydər Əliyevin gənclərə böyük qayğısı idi.
Ulu öndər gəncləri vətənpərvər,
milli məfkurəyə, milli
mənlik şüuruna bağlı
görmək istəyirdi. Çünki onun özü belə idi. Vətənini, xalqını,
torpağını çox sevirdi və bu sevgiyə sadiqliyini də həyatı, fəaliyyət boyu sübut etmişdi. O özündən sonra tükənməz bir
vətənpərvərlik irsi, nümuməsi
qoyub. Ümummilli liderin gənclər üçün
etdikləri gənclərin respublikanın ictimai-siyasi
həyatında daha fəal
iştirakına şərait yaradır, habelə dövlət
orqanlarının diqqətini gəncliyin problemlərinin həllinə
yönəldirdi. Bütövlükdə gənclik bir millətin yaşaması, inkişafı üçün təməl
daşıdır. Bunun möhkəm
olması isə yetişən nəslin sağlam
təfəkküründən, düşünmə qabiliyyəti
və mübarizliyindən asılıdır. Bütün
dövrlərdə millətinin adını tarixə yazan sağlam gənc
qüvvələr olub".
H.Məhərrəmova
bildirdi ki, müasir zəmanəmizin gəncləri çox
aktiv və dinamikdir. Bu gün istər təhsilimizdə,
istər idman sahəsində, istər tibb, elm, mədəniyyət,
istər sosial-iqtisadi həyatda yetərincə
aktiv fəaliyyət göstərən,
savadlı, yüksək intellektual
dünyagörüşə, dərin biliyə malik gənclər var.
Qeyd edə bilərik ki,
2 fevral 1996-cı ildən bəri Azərbaycan
Respublikası Prezidentinin
razılığı ilə ölkədə Azərbaycan gənclər
forumu keçirilir. Bu forumda ölkənin bütün regionlarından, demək olar ki, son
bir ilə qədər 2 minə yaxın gənclər
təşkilatı çıxış edib.
Forum
dövlət orqanları, gənclər təşkilatları,
ümumiyyətlə bütün gənclərin
qarşısına məsuliyyət qoyur.
Ən əsas tapşırıq gənclərin inkişafedici fəaliyyətlərinin təşkili,
onların problemlərinin aradan
qaldırılması üçün müvafiq tədbirlərin görülməsi
olur. Görülən tədbirlər
öz nəticəsini tez
bir zamanda göstərir.
Beləliklə, 1997 ci ildən başlayaraq 2 fevral Azərbaycan
Prezidentinin sərəncamı ilə
ölkədə "Gənclər günü"
kimi qeyd edilməyə
başlayır.
Tarixçi Həyat Məhərrəmova
Gənclər Gününün yaranması tarixinə nəzər
salmazdan əvvəl bildirdi ki, bu gün gənclərin öz
iradəsini ifadə etməsi, onların respublikamız
üçün dəyərli olması baxımından
çox əhəmiyyətlidir: "Gənclər
Günü ölkəmizdə geniş şəkildə qeyd
edilir. Bu da onu göstərir ki, Azərbaycan
dövləti gənclərə, onların fəaliyyətinə,
əməyinə çox böyük
önəm verir. Gəncliyimiz
günü-gündən dövlət işlərində daha fəallıq göstərir. Bilirik ki, Beynəlxalq Gənclər Günü
1998-ci il 8-12 avqust
tarixlərində Lissabonda keçirilən
gənclər işi üzrə nazirlərin
ümumdünya konfransında səslənən
təklifə əsasən təsis olunub.
1999-cu ildə bu təklif müzakirəyə
qoyulduqdan sonra 12 avqustun "Gənclər Günü"
kimi qeyd
olunmasına razılıq verilir. Azərbaycanda
2 fevral 1996-cı ildə Prezident
Heydər Əliyevin sərəncamı ilə təsdiq olunub. Bu, Heydər
Əliyevin gəncliyə göstərdiyi diqqət və
qayğının bir nümunəsi idi. Gənclər günü MDB məkanında və Şərqi
Avropa ölkələri arasında ilk dəfə olaraq Azərbaycanda
qeyd olunub. 1997-ci ildən
başlayaraq Azərbaycanda Gənclər Günü qeyd olunandan sonra digər MDB
ölkələrində və Şərqi Avropa
dövlətlərində də bu gün qeyd olunmağa
başladı. Azərbaycanda hər il Gənclər
Günündə bütün istiqamətlər
üzrə fəaliyyət göstərən gənclər yekun hesabat verirlər. Dünyada yalnız 1998-ci il
avqustun 8-dən 12-dək Lissabonda
keçirilən konfransda BMT-nin
qərarı ilə avqustun 12-si beynəlxalq
aləmdə Gənclər Günü elan edilib. Görünən
odur ki, Azərbaycanda
gəncliyə dövlət qayğısı sabaha
və uğurlara hesablanan
bir siyasətdir. Eyni zamanda, yeridilən sözügedən siyasət
sağlam və intellektual
nəslin formalaşmasına xidmət edir.
Məsələ ondadır ki, Prezident İlham Əliyev ulu öndərin gənclər siyasətinə
sadiqliyini öz qərarları
ilə təsdiq edir. Gənclərin
mənəvi inkişafı, vətənpərvərlik tərbiyəsi,
xarici ölkələrdə təhsili, sosial müdafiəyə ehtiyacı
olanların problemlərinin həlli istiqamətində
görülən işlər, gənclər təşkilatlarının
formalaşması və inkişafı üçün
yaradılan şərait və imkan böyük diqqətin nəticəsidir. Dövlət başçısının təsdiq etdiyi, gənclərin xaricdə təhsil
almasına dəstək verən "2007-2015-ci illərdə
Azərbaycan gənclərinin xarici ölkələrdə
təhsili üzrə Dövlət Proqramı" bütün təbəqədən olan gənclərin xaricdə təhsilinə geniş imkanlar yaratdı.
İndi bu proqram çərçivəsində minlərlə
gənc dünyanın ən nüfuzlu təhsil
ocaqlarında oxuyur".
Tarixçi bildirdi ki, gənclər siyasətində
idmanın inkişaf etdirilməsi və onun kütləviliyinin
artırılması da mühüm yer tutur. Dövlət
başçısının ardıcıl səyləri nəticəsində
Azərbaycan dünyanın qabaqcıl idman
ölkələrindən birinə çevrilib.
Onun dediyinə görə, bölgələrdə
də olimpiya komplekslərinin
açılması, ölkəmizin nüfuzlu
beynəlxalq idman yarışlarına ev sahibliyi etməsi,
idmançılarımızın olimpiada
və dünya çempionatlarında uğurlu çıxışları buna əyani sübutdur:
"Gənclərin məşğulluğunun təmin
olunması üçün də mühüm addımlar atılır. Heydər Əliyev Fondunun dəstəyi,
Mehriban Əliyevanın sədrliyi ilə
keçirilən, dünyanın yüz
ölkəsindən beş yüzə
yaxın qonağın qatıldığı "Gənclərin
Məşğulluq Sammiti"nə ev sahibliyi edən Azərbaycan məşğulluq
probleminin aradan
qaldırılması istiqamətində gördüyü
işləri qürurla ortaya qoydu. Bu
diqqət gənclərin fəallığını da artırır, onları səfərbər edir. İndi ölkəmizdə
dövlət qeydiyyatından keçən 200-ə yaxın gənclər
təşkilatı fəaliyyət göstərir, minlərlə
gənc lider yetişib.
Bütün bu görülən və
görüləcək işlərin gənclərin milli mənlik şüurunun,
vətənpərvərlik hisslərinin inkişafında mühüm rol
oynayacağını düşünürük.
Çünki Azərbaycan gəncliyinin
potensialı çox geniş
və çoxşaxəlidir. O üzdən, bəzi tarixi günlərin gənclərdə vətənpərvərlik
hisslərinin inkişafında rolunu düzgün qiymətləndirmək
lazımdır".
Gənclər
Gününün gənclərin həyatında mühüm
rol oynadığı bəllidir. Bu gün həm də gəncliyin həmrəyliyi,
birliyi günü kimi xarakterizə edilir.
Ölkədə və xaricdə yaşayan,
təhsil alan, işləyən, ictimai-siyasi işlərlə məşğul
olan gənclər bir araya gəlirlər. Gənclər Günü ərəfəsində bu mühüm günlə
əlaqədar gənclər bir sıra
yaradıcılıq proqramları çərçivəsində
müsbət işlər görürlər. Bu
da yaradıcı gənclərin
potensialının üzə çıxarılmasına
yardımçı olur.
Gənc kinoşünas Aydan
Şükürlünün dediyinə görə, Azərbaycanda
2 fevral-Gənclər Gününün keçirilməsi gənclərin
həyatını dəyişib. Bu günün özəlliyindən
danışan gənc kinoşünas deyir ki, Gənclər
Günündə yaradıcı gənclərin kitabları çap olunur, musiqiləri
yazılır, sərgiləri keçirilir,
onlara film, klip çəkməyə yardım edilir. Bu gün çərçivəsində
həyata keçirilən bütün
yaradıcılıq layihələrinin gənclərin
yaradıcılığının inkişafına,
onların ictimai fəaliyyətinin
güclənməsinə yönəldildiyini deyən kinoşünas bildirir ki, gənclər 2 fevralı öz
birlik, bərabərlik günü hesab edir: "Gənclərin həyatında mühüm gün olan 2 fevral-Gənclər Günü
biz gənclərin fəaliyyətində,
həyatında xüsusi rol
oynayır. "Fevraldan əvvəl
və sonra müxtəlif tədbirlər,
dəyirmi masalar, görüşlər,
müsabiqələr, sərgilər keçirilir.
İstər Bakıda, istərsə də bölgələrdə
keçirilən tədbirlərə ölkənin fəal, ictimai işlərdə seçilən gəncləri
toplaşır. 2 fevralın əhəmiyyəti həm də
ondan ibarətdir ki, gənclər
bir-birini tanıyır. Bu
da gəncliyin birliyinə xidmət edir. 2 fevral tarixi gənclərə vətənpərvərlik
hisslərinin aşılanmasında mühüm
rol oynayır. Bu həm
də milli mənlik şüurunun
inkişafı baxımından önəmli əhəmiyyət
kəsb edir. Hər bir gəncin bu sahədə
olan düşüncələri, heç şübhəsiz, hər növbəti
il üçün daha da faydalı nəticələrə
gətirib çıxaracaq.
İndiyə qədər gənclərlə
bağlı Azərbaycanda qəbul olunmuş
qərarlar, sərəncamlar, fərman və qanunlar
ölkəmizdə bu sahədə daha sistemli işlərin
görülməsinin göstəricisidir. Xüsusən də
postsovet ölkələri ilə
müqayisədə Azərbaycanda gənclərə dövlət
qayğısı daha üstün
səviyyədədir. Bu məsələdə
biz daha irəlidəyik.
Azərbaycanda həm də Gənclər Fondu
fəaliyyətə başlayıb. Bu Fondun həyata keçirdiyi
layihələr çərçivəsində gənclər
böyük işlər görür".
Dünən Azərbaycanda növbəti dəfə Gənclər Günü qeyd edildi. Bu, respublika gənclərinin mənəvi, intellektual, milli şüura bağlılıq və vətənpərvərlik ideyalarının vahidliyi, tamlığı günüdür.
İradə
SARIYEVA
Bakı xəbər.-2014.-3
fevral.-S.12.