Cəzaçəkmə müəssisələrindən
azad olunan gənclərin sosial reabilitasiyası və milli
şüurun formalaşmasına təsir problemləri...
İnsanların həyatında elə
hadisələr baş verir ki, bu onları bir sıra vacib məsələlərdən
kənarda qoyur. Bu, müxtəlif cinayətlər
törədərək həbs edilən insanlardır ki,
qazamat həyatı bu şəxsləri çox şeylərdən
məhrum edir. Həbsxana həyatından
sonra insanlar cəmiyyətə qaynayıb-qarışmaqla
bağlı əksər hallarda böyük problemlərlə
üzləşir. Bilirik ki, cəzaçəkmə
müəssisələrində cəza çəkənlərin
bir hissəsi yeniyetmə və gənclərdir.
O
şəxslər də qazamatdan çıxdıqdan sonra
xeyli çətinliklə mübarizə aparmalı olur. Sosioloqlar da deyir ki,
cəzaçəkmə müəssisələrindən azad
olunan gənclərin cəmiyyətə adaptasiya olunması bu
gün ən aktual məsələlərdən biridir. Onların bildirdiyinə görə, Azərbaycan
dövləti bu gənclərin cəmiyyətə inteqrasiya
olunması istiqamətində bir sıra işlər
görür.
Sosioloq Rizvan Camalovun sözlərinə görə,
Azərbaycan dövlətinin gənclər siyasəti elə
qurulub ki, burada bütün gənclər bərabərhüquqludur.
Onun fikrincə, hər bir gənc üçün ölkədə
şərait yaratmaq dövlətin qarşıya qoyduğu məqsədlərdən
biridir: "Azərbaycanda gənclərə münasibət
çox müsbətdir. Lap cəzaçəkmə
müəssisələrindən çıxan gənclərin
də problemlərinin həllinə ilıq münasibət
formalaşıb. Ancaq elə ölkələr
var ki, məhbəsdən çıxan gənclərin
sonrakı taleyi qaranlıq qalır. Bu da cəmiyyətdə
müəyyən sosial fəsadlara yol açır. Belə
ki, həbsxanadan azad olunduqdan sonra cəmiyyətə
uyğunlaşmaqda çətinlik çəkən, bir
çox hallarda iş, ev problemləri ilə
üzləşən məhkumlar yenidən cinayət törədərək
həbsxanaya düşməli olur. Sosioloq və
psixoloqların araşdırması göstərir ki, cəzaçəkmə
müəssisələrindən azad edilən şəxslərin,
xüsusilə gənclərin sosial adaptasiyasında bəzi
problemlər olsa da, ümumilikdə bu istiqamətdə
görülən tədbirlər rəğbətlə
qarşılanır".
Ekspert
bildirdi ki, düzdür, respublikamızdakı cəzaçəkmə
müəssisələrinin bir neçəsində məhkumların
işləməsi üçün şərait
yaradılıb: "Əvvəlki illərlə müqayisədə
indi vəziyyət çox dəyişib. Dövlətin
iqtisadi imkanları genişləndikcə, bu sahəyə diqqət
artır. Cəzaçəkmə müəssisələrində
müəyyən ixtisas kursları, qadın kaloniyasında
tikiş və xalçaçılıq sexləri fəaliyyət
göstərir. Burada cəza çəkən
məhkumlar tikiş, xalçaçılıq sexlərində
çalışır. Bu kimi işlər
həbsdən çıxan gənclərin cəmiyyətə
adaptasiyasını əhəmiyyətli şəkildə
asanlaşdırır. Ümumiyyətlə,
məhbuslar üçün məşğulluq şəraitinin
yaradılması həmin gənclərin sonrakı həyatında
müsbət mənada özünəməxsus rol
oynayır".
Məlumat üçün
bildirək ki, bu məsələlərlə bağlı
mövcud problemlərin aradan qaldırılması məqsədilə
ölkə Prezidentinin təsdiqlədiyi "Azərbaycan gəncliyi
2011-2015-ci illərdə" Dövlət Proqramında konkret
müddəalar öz əksini tapıb. Deyək ki, sənəddə
əvvəllər məhkum olunmuş gənclərin cəmiyyətə
inteqrasiyasının təmin edilməsi üçün
mütəmadi tədbirlərin həyata keçirilməsi
planlaşdırılır. Bu istiqamətdə
işlər isə Əmək və Əhalinin Sosial
Müdafiəsi, Ədliyyə, Daxili İşlər, Gənclər
və İdman nazirliklərinə həvalə olunub.
Sosioloq Təranə Musalının sözlərinə
görə, bu qurumlar məhkumların azadlığa
çıxdıqdan sonra rastlaşdığı problemlərin
yoluna qoyulması üçün tədbirlər
görür: "Belə ki, cəza müddəti bitdikdən
sonra onların işlə təmin olunması, qeydiyyata
alınması üçün yaşadıqları ərazinin
polis idarəsinə, icra hakimiyyətinə, məşğulluq
mərkəzinə müraciət edilir. Hətta
məhkumlar azadlığa buraxılmazdan 3 ay əvvəl həmin
idarələrə Penitensiar Xidmət tərəfindən məlumat
verilir. Həbsxana rəhbərliyi cəza
çəkənlərin azadlığa çıxandan
sonrakı taleyi ilə həmişə maraqlana bilməsə
də, buna cəhdlər göstərilir. Bu
kimi tədbirlərin görülməsi çox vacibdir.
Çünki etiraf etmək lazımdır ki, bu
gün həbsxana həyatı yaşamış insanlara cəmiyyətdə
münasibət birmənalı deyil. Yəni
məhkumlar azadlığa çıxdıqdan sonra onları
işlə təmin etmirlər, onlardan sanki məsafə
saxlayırlar. Bir sıra hallarda məhkum
azadlığa qovuşandan sonra ona laqeyd yanaşılır.
Bir sözlə, həbsxana həyatı
sürmüş bir insan kimi onları qəbul etmək istəmirlər.
Eyni zamanda, keçmiş məhbuslardan bir az
da çəkinirlər ki, cinayətkar olub, ehtiyatlı
davranmaq lazımdır. Dəfələrlə
belə hallar olub ki, məhkum azadlığa çıxanda hər
şeyin əlindən çıxdığını
görüb. Bu kimi hallar, istər-istəməz,
onların cəmiyyətə adaptasiya olunmasında problemlər
yaradır. Ən acınacaqlısı isə
məhkum insanlardan ailələrinin imtina etməsidir. Bu situasiya baş verəndə isə ya məhkum
yenidən cinayət işlədib həbsxanaya qayıdır,
ya da özünə qəsd edir. Məhbus
həyatı yaşayan gənclərin sosial adaptasiyasında təkcə
müvafiq qurumlar deyil, cəmiyyətin özü də gərək
fəal olsun. Bunun üçün də,
ilk növbədə, məhkumlar bu cəmiyyətin
üzvü kimi qəbul edilməlidir. Adamlar
var ki, hara gedirsə, orada ondan imtina edirlər. İşləmək istəyir, işə
götürmürlər. Bu çox ürəkağrıdıcı
vəziyyətdir. Bununla bağlı qanun
var. Ancaq mövcud qanunvericiliyin praktiki olaraq işlək
olmasında problemlər yaşanır. Bu
cür insanları vətəndaş kimi, insan kimi cəmiyyətdə
ətrafdakılar qəbul etməlidir. Anlamaq
lazımdır ki, artıq bu insan törətdiyi cinayət əməlinə
görə cəzasını alıb, həbsxanada tərbiyələndirilib".
Onu da qeyd edək ki, bəzi hallarda sosial xidmət
işçilərinin peşə
hazırlığının aşağı səviyyədə
olması da məhkumların cəmiyyətə
adaptasiyasını çətinləşdirir. Hər
halda bu sahədə təsisatlar tam şəkildə
oturuşub fəaliyyət göstərərsə, mövcud
olan problemləri köklü şəkildə aradan
qaldırmaq mümkün ola bilər. Məhkumların reabilitasiyası üçün,
kimliyindən asılı olmayaraq, hamı üzərinə
düşən vəzifəni yerinə yetirməyə
çalışmalıdır. Onlar
üçün sığınacaqların tikilməsinə
də ehtiyac var.
"Bakı-Xəbər"in
araşdırmasına görə, bununla bağlı
müvafiq qanunvericilik bazası mövcuddur. Amma hələlik lazımi maliyyə vəsaiti
ayrılmadığından, reabilitasiya mərkəzləri
tam formalaşdırılmayıb. Yəni
bu mərkəz onlara tələb olunan səviyyədə xidmət
göstərə bilmir. Unutmayaq ki,
onların cəmiyyətə adaptasiya oluna bilməməsi
sonradan həmin insanların yenidən cinayət törətməsinə
səbəb olur. "Bakı-Xəbər"in
araşdırmasına görə, cəzaçəkmə
müəssisələrindən çıxan insanların
hamısı, bir qayda olaraq, ərazi poliklinikalarında qeydiyyatda
olmalıdır: " Ən azı,
altı ay müddətində mütəmadi olaraq onlar həkimlərlə
söhbətlər etməlidir. Əksər
hallarda vətəndaşlar normal həyata qayıdırlar.
Telekanallarda müəyyən verilişlər
verilməlidir və insanlara təbliğ olunmalıdır ki,
həbsxanadan çıxan vətəndaşlara diqqət
göstərilməlidir, yardım edilməlidir".
Bütövlükdə məhbəs
həyatı yaşamış gənclərin cəmiyyətə
sosial adaptasiyası istiqamətində görülən tədbirlər
onların milli mənlik şüurunun formalaşmasında nə
kimi rol oynayır? Qəzetimizin ötən saylarında məsələyə
münasibət bildirən Ədliyyə Nazirliyi yanında
Penitensiar Sistemə Nəzarət üzrə İctimai Komitənin
koordinatoru, hüquq müdafiəçisi Əliməmməd
Nuriyev bu istiqamətdə görülən tədbirlərin əhəmiyyətini
müsbət qiymətləndirdi: "Azadlıqdan məhrum
edilmiş gənclərin sonradan cəmiyyətə
reinteqrasiya məsələsi ilə bağlı problemlər
yaranır. O cümlədən, Azərbaycanda da bununla
bağlı problemlər var. Problemlərin həlli istiqamətində
addımların atılmasını sürətləndirmək
məqsədilə azadlıqdan məhrum edilmiş şəxslərin
sosial reabilitasiyası haqqında qanun qəbul edilib. Sözügedən qanuna görə, həmin şəxslər
azad olunduqdan sonra bir sıra reabilitasiya tədbirlərinin həyata
keçirilməsi nəzərdə tutulub. İlk növbədə onların
sığınacaqlarla təmin olunması, müavinətlərin
verilməsi məsələsi öz həllini
tapmalıdır. İxtisasdəyişmə,
məşğulluğun təmin olunması ilə
bağlı müəyyən mərkəzlərin
yaradılması nəzərdə tutulub. Hesab
edirəm ki, məhbus gənclərin cəmiyyətə sosial
adaptasiyası ilə bağlı atılan addımlar
onların gələcək həyatında müsbət rol
oynayır. Özlərinin məşğulluq
problemlərinin həlli istiqamətində müəyyən
addımlar atırlar və beləliklə onlar müəyyən
qanuni dolanışıq mənbəyi əldə edirlər.
Bu onları kriminal vərdişlərdən azad
edən əsas şərtlərdən biridir. Onların peşəkar kimi formalaşma prosesinə
yardım edilirsə, bu, heç şübhəsiz, mövcud
olan çətinliklərin aradan qaldırılmasına
kömək edir. Belə ki, bir tərəfdən,
onlar bu minvalla əvvəlki xoş olmayan vərdişlərdən
azad olur. Digər tərəfdən,
özlərinin cəmiyyətdə yararlı bir insan olduğunu
və onlara yer verildiyini dərk edirlər. Bütün bunlar həm də ona gətirib
çıxarır ki, gənc məhbusun yaxın ətrafı
da onu başa düşür. Həmçinin,
məhbəsdən çıxmış gənclər yeni
dostlar qazanır. Nəticə etibarilə
psixoloji baxımdan bir çox çətinliklər arxada qalır.
Beləliklə, həmin şəxsin cəmiyyətə
adaptasiya prosesində müsbət, pozitiv meyllər inkişaf
etməyə başlayır". Ə.Nuriyevin
açıqlamasından o da məlum oldu ki, reabilitasiya istiqamətində
görülən tədbirlər həmin gənclərin
müsbət mənada şüurunun zənginləşməsinə
gətirib çıxarır: "Bu da, öz növbəsində,
məhbus olmuş gənclərin milli mənlik şüurunun
formalaşmasına öz müsbət təsirini göstərir.
Onlar görəndə ki, dövlət belələrinə
qayğı göstərir, bu zaman onların münasibəti
dəyişir. Fikirləşirlər ki,
qayğı göstərilirsə, deməli, bu dövlətin
qanunlarına əməl etmək, onun müdafiəsində
iştirak etmək lazımdır. Onlar
ölkə vətəndaşı olaraq cəmiyyətdə
pozitiv meyllərin inkişafına öz yardımını
göstərməlidir. Bu həm də
pozitiv mənada özünüdərk prosesinə gətirib
çıxarır. Yəni bu, ölkənin
həqiqi vətəndaşı olmaq üçün
stereotiplərin aradan qaldırılmasına imkan yaradır.
Çünki hərtərəfli qayğı
ilə əhatə olunan insan dövlətinə, cəmiyyətə,
ailəsinə hörmət etməlidir. Bütün
bunlar bir-biri ilə sıx bağlı olan proseslərdir.
Bu baxımdan hesab edirəm ki, ən vacib olan məsələlərdən
biri sözügedən qanunun tətbiqini sürətləndirməkdir.
Hökumətin bu istiqamətdə ciddi
addımlar atması vacibdir. Hökumət
sözügedən məsələ ilə bağlı
sığınacaqların tezliklə tikilməsinə maliyyə
ayırmalıdır. Fikrimcə, maliyyənin
ayrılması çox zəruri məsələlərdən
biridir. Bununla belə, sosial işçilərin
olması da çox vacib məsələdir. Çünki sosial sığınacaqlarda onlarla
davranmaqla bağlı sosial işçilərin müəyyən
vərdişləri, xidmət göstərmək imkanları
olmalıdır".
İradə
SARIYEVA
Bakı xəbər.-2014.-7-9
fevral.-S.15.