Dövlət
dilimizi - ana dilimizi necə qoruyaq?
Vətən sevgisi anaya, ana dilinə hörmət və
sevgidən başlayır. Kökündə ana məhəbbəti,
doğma dilə xoş münasibət olmayan vətənçilik
saxtakarlıq nümunəsindən başqa bir şey deyil.
Dünyada insanlar ən çox anasını,
dilini, bir də vətənini sevir. Bu təbii
bir hissdir. Azərbaycançılıq
sevgisinin də özülündə bu müqəddəs
meyllər durur.
Hər bir xalqı yaşadan, onun tarix səhnəsindəki,
müasir zamandakı yerini qoruyub saxlayan başlıca şərt
ana dilidir. İnsan vətən olaraq başqa məmləkəti
seçə bilər, orada öz dilini, adət-ənənəsini,
mədəniyyətini yaşadar. Ancaq dili
unutsa, keçmişilə, soykökü ilə əlaqəsi
tamamilə kəsilər. Dil milləti,
toplumu yaşadan gərəkli bir vasitədir. Azərbaycan dilinin saflığı, təmizliyi,
başqa təsirlərdən can qurtararaq günümüzə
gəlib çatması, dövlət dili statusu qazanması azərbaycançılığın
özülünün möhkəmliyinə dəlalət
edir.
Son illər dünyada bir sıra xoşagəlməz
hallar baş verir ki, həmin olayların
qarşısını almaq müşkülə
çevrilib.
Gündə bir ideologiya, mənşəyi
sağlam olmayan ideologiya, tendensiya meydana çıxır.
Xəstə təfəkkürün məhsulu
olan bu tendensiyaların məqsədi millətləri, dilləri,
mədəniyyətləri, insanların milli əxlaqını
məhv edib, onları dünya üzündən silməkdir.
Qloballaşma anlayışı dediyimiz sahəyə
aiddir. Dünyada qloballaşma
dalğası tüğyan edir, vahid mədəniyyət, vahid
dil və vahid din, millət fikrini ortaya atan bu adamların məqsədi
dünyada yaxşı nə varsa, hamısını yer
üzündən silməkdir. Bu dalğa əsasən
ana dillərin məhvinə hesablanıb. Azərbaycanda
da qloballaşmanın tərəfdarları yox deyil. Bu adamlar açıq-açığına dilimizə,
mədəniyyətimizə, xalq sənətimizə
qarşı çıxır və iddia edir ki, Azərbaycan
dili dünya arenasına çıxa bilməz, zəif dildir.
Niyəsə bu adamlar unudur ki, bu dildə
dünya ədəbiyyatının şah əsərləri
yaranıb, aşıq musiqisi, muğamlar bu dil vasitəsilə
ifa edilir. Eyni zamanda, onlar YUNESKO-ya gedib
çıxıb. Bu, Azərbaycan dilinin,
milli musiqisinin qüdrətidir. Ana dilimiz zəif,
gücsüz dil olsaydı, dünyanın qüdrət sahibləri
dilimizi tərifləyib, onun lətifliyindən dönə-dönə
söhbət açmazdılar. Milli-mədəni
dəyərin kökündə ana dilinə hörmət, məhəbbət
durduğunu qeyd etdik. Bu məsələdə
dövlətlə xalqın rəyi bir olanda azərbaycançılıq
daha da genişlənir. Mədəniyyətimizlə,
ədəbiyyatımızla, ana dilimizlə, təsviri incəsənətimizlə,
kinomuzla bağlı verilən hər bir sərəncam, qəbul
edilən sənəd mədəniyyətimizin təməlini
möhkəmləndirir.
Azərbaycan Respublikasının Prezidenti İlham
Əliyevin bu istiqamətdə bir neçə sənədə
imza atması təqdirəlayiqdir. Bu sərəncamlar mədəniyyətimiz,
mənəviyyatımızı qloballaşma dövründə
mühafizə etməyə, qorumağa yönəlib.
Məsələn, Prezidentin «Azərbaycan dilinin
qloballaşma şəraitində zamanın tələblərinə
uyğun istifadəsinə və ölkədə
dilçiliyin inkişafına dair Dövlət Proqramı»
haqqında Sərəncam imzalaması böyük bir hadisə
oldu. 2012-ci il mayın 23-də verilən bu sərəncamın
mahiyyətində ana dilimizin qayğısına qalmaq amili
dayanır. Sənəddə bildirilir ki, Azərbaycan
dili xalqımızın mənəvi sərvəti, dövlətimizin
müstəqilliyinin başlıca rəmzlərindən
biridir. Bu dildə dünya ədəbiyyatı xəzinəsinə
daxil olan misilsiz əsərlər yaradılıb: «Hər bir
azərbaycanlı tarixin ayrı-ayrı dövrlərində
dilimizin dövlət dili kimi fəaliyyət göstərməsindən
böyük qürur hissi keçirir. Ölkəmizin
zaman-zaman müxtəlif imperiyalar tərkibində
yaşamağa məcbur olmasına baxmayaraq, ana dilimiz hətta
bu ağır vaxtlarda belə, milli məfkurənin, milli
şüurun və milli-mədəni dəyərlərin
layiqincə yaşamasını və inkişafını təmin
edib. Bu gün onun qorunması və
qayğı ilə əhatə olunması müstəqil Azərbaycanın
hər bir vətəndaşının müqəddəs
borcudur. Ana dilimiz öz ifadə
imkanlarının zənginliyi, səs quruluşunun səlisliyi
və qrammatik strukturunun sabitliyi ilə səciyyələnir.
Müasir Azərbaycan ədəbi dili
siyasi-ictimai, elmi-mədəni sahələrdə geniş
işlənmə dairəsinə malik, yüksək yazı mədəniyyəti
olan və daim söz ehtiyatını zənginləşdirən
bir dildir. O özünün indiki yüksək səviyyəsinə
görkəmli şair və yazıçıların, maarifpərvər
ziyalıların zəhməti sayəsində çatıb. Bu prosesdə Azərbaycan dilçilik elminin
böyük xidməti var».
Prezident sərəncamından da göründüyü
kimi, dil hər bir xalqın mənəvi sərvətidir və
dilin inkişaf etməsi xalqların, mədəniyyətlərin
tərəqqisi deməkdir.
Həmin
sərəncamda o da qeyd edilir ki, Azərbaycanda müasir mətbuatın,
teatrın və təhsil sisteminin təşəkkül
tapması, xalqımızın ictimai-siyasi və mədəni
həyatında baş verən dəyişikliklər Azərbaycan
dilçiliyinin də inkişaf yolunu müəyyən edib:
«Ana dili ilə bağlı yeni-yeni dərsliklər,
lüğətlər və sanballı elmi tədqiqatlar
meydana çıxmışdır. Bu sahədə görkəmli
ziyalılarımız Mirzə Kazım bəy, Mirzə Fətəli
Axundzadə, Rəşid bəy Əfəndiyev, Sultan Məcid
Qənizadə, Məhəmməd ağa Şahtaxtlı, Nəriman
Nərimanov, Üzeyir Hacıbəyli və
başqalarının mühüm xidmətləri var. Ana
dilimizin tədqiqi xüsusilə ötən əsrin ilk
onilliklərindən başlayaraq bilavasitə diqqət mərkəzində
olmuşdur. Həmin dövrdə Üzeyir Hacıbəyli,
Əbdürrəhim bəy Haqverdiyev, Bəkir Çobanzadə,
Cavad Axundzadə, Xalid Səid Xocayev və digərlərinin
dilimizin qrammatikasına dair bir çox tədqiqatları
işıq üzü görmüşdür. 1926-cı
ildə Birinci Türkoloji Qurultayın Bakıda keçirilməsi
ölkəmizdə dilçilik sahəsində əldə
olunan nailiyyətlərin məntiqi davamı kimi yeni-yeni tədqiqatların
meydana çıxmasına təkan vermişdir.1920-ci illərdə
respublikada aparılan dilçilik tədqiqatları Azərbaycanı
Tədqiq və Tətəbbö Cəmiyyətində və
Azərbaycan Dövlət Elmi-Tədqiqat İnstitutunda mərkəzləşmişdi.
Sonralar SSRİ Elmlər Akademiyası Zaqafqaziya
Filialının Azərbaycan şöbəsinin və SSRİ
Elmlər Akademiyası Azərbaycan Filialının Dil və
Ədəbiyyat İnstitutunun yaradılması ilə həmin
tədqiqatlar daha sistemli və əhatəli aparılmağa
başladı. 1945-ci ildə Azərbaycan
Elmlər Akademiyası təşkil olunduqdan sonra Azərbaycan
dilçiliyi yeni mərhələyə qədəm qoydu.
1969-cu ildə müstəqil Dilçilik
İnstitutunun fəaliyyətə başlaması ilə dilşünaslıq
elmimizin sürətli inkişaf yolu tutaraq ardıcıl şəkildə
müvəffəqiyyətlər qazanması üçün
möhkəm zəmin yarandı. Azərbaycan
dilçiliyi Məmmədağa Şirəliyev, Əbdüləzəl
Dəmirçizadə, Muxtar Hüseynzadə, Əliheydər
Orucov, Səlim Cəfərov, Əlövsət Abdullayev, Fərhad
Zeynalov və digər alimlərimizin yüksək elmi səviyyəli
tədqiqatları yalnız
dilşünaslığımızı yox, ümumən Azərbaycan
ictimai fikrini zənginləşdirdi. Xalqımızın
böyük oğlu Heydər Əliyev respublikamıza rəhbərlik
etməyə başladığı ilk vaxtlardan Azərbaycan ədəbi
dilinə ayrıca diqqət yetirmiş, ana dilimizin Azərbaycan
SSR Konstitusiyasında dövlət dili kimi xüsusi maddədə
göstərilməsinə nail olmuşdu. Heydər
Əliyevin hazırlayıb həyata keçirdiyi dövlət
quruculuğu strategiyasının tərkib hissəsi olan dil
siyasətinin nəticəsidir ki, 1970-ci illərdə Azərbaycan
dilinin tarixi intensiv şəkildə öyrənilmiş,
müasir Azərbaycan dilinin problemləri ilə bağlı
çoxsaylı elmi-nəzəri əsərlər
yaradılmışdır. Ali məktəblər
üçün yazılmış dörd cildlik «Müasir Azərbaycan
dili» dərsliyi 1974-cü ildə məhz ulu öndərin təşəbbüsü
ilə milli dilçilik elminin inkişafına töhfə
kimi qiymətləndirilərək respublikanın Dövlət
mükafatına layiq görülmüşdür. Azərbaycan dilinə və ümumiyyətlə Azərbaycan
dilçilərinin əməyinə verilən qiymət və
onlara göstərilən qayğı Azərbaycanın
keçmiş sovet məkanında, eyni zamanda beynəlxalq elm
aləmində türkologiyanın mərkəzlərindən
biri kimi tanınmasına gətirib
çıxarmışdır. SSRİ Elmlər
Akademiyasının bu istiqamətdə yeganə
«Türkologiya» jurnalı məhz Bakıda nəşr edilirdi».
Məlumdur ki, Azərbaycan dilçiliyinin
inkişafında önəmli rolu olan bu sərəncamlar nəinki
indiki, hətta gələcək nəslin milli
özünüdərk anlayışına sahib olmasına zəmin
yaradır. Sənəddə
Azərbaycan Respublikası öz müstəqilliyinin bərpasına
nail olduqdan sonra Azərbaycan dilinin xalqımızın
ictimai-siyasi, sosial-iqtisadi və elmi-mədəni həyatında
dövlətin rəsmi dili kimi müstəsna əhəmiyyət
kəsb etməsi də yada salınır: «Azərbaycan
xalqının ümummilli lideri Heydər Əliyevin «Dövlət
dilinin tətbiqi işinin təkmilləşdirilməsi
haqqında» 18 iyun 2001-ci il tarixli və «Azərbaycan
Respublikasında dövlət dili haqqında» Azərbaycan
Respublikası Qanununun tətbiq edilməsi barədə» 2
yanvar 2003-cü il tarixli fərmanları ilə ədəbi
dilimizin fəaliyyət meydanı daha da genişləndirilmiş,
onun müxtəlif üslublarının potensialı bir daha
üzə çıxarılmış, bütünlükdə
dil mədəniyyətimiz qarşısında yeni
üfüqlər açılmışdır.
Bununla yanaşı, son dövrlərdə müasir Azərbaycan
ədəbi dilinin tükənməz imkanlarından
lazımınca və düzgün istifadə edilməməsi
diqqəti çəkir. Ədəbi dilimizin özünəməxsus
inkişaf qanunauyğunluqlarına xələl gətirə
biləcək yad ünsürlərin üzə
çıxarılması və qarşısının
alınması istiqamətində mütəxəssislər
heç də həmişə çeviklik nümayiş
etdirə bilmirlər. Nəticə etibarilə
dövlət dilimizin tətbiqi sahəsində bir sıra
problemlər özünü qabarıq şəkildə
büruzə verir».
Dövlətçiliyimizin və milli mədəniyyətimizin
təməl prinsiplərini təşkil edən dilimizin əbədi
yaşarlığı dövlət
başçımızı ciddi düşündürür. O hesab edir ki, ana dilinin
yaşaması millətin yaşaması deməkdir: « Dilin
böyük ictimai-siyasi hadisə və mənəvi həyatımızın
mühüm amili olduğunu çox zaman nəzərdən
qaçıran bəzi mətbuat orqanlarında, radio və
televiziya kanallarında ədəbi dil normalarının
pozulması adi hal almışdır.
Dublyaj edilən filmlərin, xarici dillərdən çevrilən elmi, bədii və publisistik əsərlərin tərcüməsi bir qayda olaraq yüksək estetik tələblərə cavab vermir, onlar sönük və yarıtmazdır, dilimizin hüdudsuz ifadə imkanları ilə müqayisə edilməyəcək qədər aşağı səviyyədədir. Küçə və meydanlardakı reklamlarda, afişalarda Azərbaycan dilinin ən adi leksik və qrammatik qaydalarının pozulması təkcə dil mədəniyyətinin deyil, ümumi mədəni səviyyənin də arzuedilməz göstəricisinə çevrilmişdir».
Təhsilimizlə, elmimizlə, mədəniyyətimizlə vahid canda birləşən ana dilimizin daha çevik, daha aktual məsələlərə müdaxilə etməli olduğu qeyd edilən sərəncamda Azərbaycan dilinin gələcək inkişaf yolları da göstərilir: «Bəzən dilimizin tarixinə aid səslənən səhv fikirlərə vaxtlı-vaxtında cavab verilmir və bu dilin keçdiyi inkişaf mərhələlərini etibarlı tarixi mənbələr əsasında dolğun əks etdirən fundamental əsərlər yaranmır. Elmi tədqiqatlar üçün bəzi hallarda müasir dünya dilçiliyinin nəzəri səviyyəsindən xeyli geri qalan, heç bir ciddi praktik əhəmiyyət daşımayan bəsit mövzular seçilir.
Azərbaycan dilində internet resurslarının qıtlığı, elektron və interaktiv dərsliklərin azlığı, Azərbaycan dilini öyrənən əcnəbi dilli insanlar üçün tədris vəsaitlərinin bir çox hallarda müasir tələblərə cavab verməməsi narahatlıq doğurur. Sovet dövründə Azərbaycan dilçilərinin dünya elmində gedən proseslərdən təcrid olunması ilə ölkəmizdə dilçilik sahəsindəki nəzərəçarpan boşluq hələ də aradan qaldırılmamışdır.
Dilçilik elmimiz təkcə Azərbaycan dili ilə bağlı deyil, həmçinin onun digər türk dilləri ilə münasibətlərini öyrənmək istiqamətində ciddi addımlar atmalı, müasir dillərin nəzəri cəhətdən araşdırılmasına, eyni zamanda, qədim dünya dilləri və mədəniyyətlərinin tədqiqinə yönələn yeni layihələr işləyib hazırlamalıdır».
Azərbaycan Milli Elmlər Akademiyası, Azərbaycan Respublikasının Təhsil Nazirliyi, Azərbaycan Respublikasının Rabitə və Yüksək Texnologiyalar Nazirliyi, Azərbaycan Respublikasının Mədəniyyət və Turizm Nazirliyinə tapşırılıb ki, Dövlət Proqramına uyğun layihələr hazırlayaraq Nazirlər Kabinetinə təqdim etsinlər.
Əlbəttə, ölkə başçısının qəbul etdiyi bu qərar həm dilçi alimlərin, həm də ictimaiyyət nümayəndələrinin ürəyindən xəbər verdi. Artıq bu sahədə iki ildən artıqdır işlər görülür. Bu qiymətli işin daha əhatəli, geniş şəkildə davam etdiriləcəyi perspektivləri görünür.
Ardı var...
İradə
SARIYEVA
Bakı xəbər.-2014.- 7 iyul.-
S.15.