Milli qəhrəmanların xatirəsinə dövlət qayğısı - gənc nəsli vətənsevər formalaşdırır...

Azərbaycan tarixində saysız-hesabsız qəhrəmanlar olub ki, onların döyüş yolu, şəhidlik məqamı gənclər üçün həyat məktəbidir. Ermənilərin dədə-baba torpağımız olan Dağlıq Qarabağa hücumu nəticəsində yüzlərlə Vətən övladı torpağımızın müdafiəsinə qalxdı. Bu savaşda fərqlənən, yurdumuzun müdafiəsi uğrunda müstəsna qəhrəmanlıqlar göstərən döyüşçülərin müəyyən bir qisminə Azərbaycan Respublikası Prezidentinin sərəncamı ilə Milli Qəhrəman adı verildi.

Bu gün Azərbaycanda 211 nəfər bu şərəfli adı daşıyır. Təəssüf ki, onların yalnız on səkkiz nəfəri həyatdadır, qalanları isə dünyasını dəyişib. Amma bu qəhrəmanların övladları, həyat yoldaşları, valideynləri, yaxınları onların xatirəsini yaşadır. Dövlətimiz də milli qəhrəmanlara və onların ailə üzvlərinə qayğı göstərir. Bəziləri hesab edir ki, milli qəhrəmanlara və doğmalarına göstərilən qayğı daha yüksək olmalıdır. Yəni bu qayğı o səviyyədə olmalıdır ki, milli qəhrəmanlarımız həm də gənclər üçün örnəyə çevrilə bilsin. Milli qəhrəmanlara belə qayğı gənclər arasında həm də vətənpərvərlik ruhunun tərbiyə olunmasında böyük rol oynaya bilər. Məlumdur ki, milli qəhrəmanların həyat yolunu özünə nümunə sayan gənclərimiz çoxdur. Dövlət milli qəhrəmanlara, o cümlədən də şəhid ailələrinə müəyyən imtiyazlar ayırıb. Bu imtiyazlardan ən yüksəyi Prezident təqaüdüdür. Hazırda 191-dən artıq Milli Qəhrəman ailəsi ayda 600 manat təqaüd alır. Bəzi ailələrin isə mənzil-məişət şəraitinin yaxşılaşdırılması üçün dövlət tərəfindən tədbirlər həyata keçirilib. Bir sıra ailələr evlə təmin edilib.

Mərhum Azərbaycan prezidenti Heydər Əliyevin rəhbərliyi dövründə də, hazırda da Milli Qəhrəman ailələri dövlətin himayəsindədir. Prezident İlham Əliyev bu gün Qarabağ şəhidlərinin xatirələrini əziz tutur, şəhid ailələrinin, milli qəhrəmanlarımızın sosial problemləri ilə yaxından maraqlanır, onların problemlərini həll edir. Prezidentin bu yöndə göstərdiyi qayğının bariz nümunələrindən biri Mübariz İbrahimova göstərdiyi şücaətə görə Milli Qəhrəman adının verilməsidir. Gənclər görəndə ki, canını Azərbaycanın ərazi bütövlüyü uğrunda qurban verən insanların ailəsi dövlətin qanadları altındadır, bu bizim gənclərdə vətənpərvərlik tərbiyəsini daha da sarsılmaz edəcək. Mütəxəssislər bildirir ki, bunun gənclərin milli-mənəvi dəyərlərə, xüsusən də vətənpərvərlik tərbiyəsinə malik olmasında böyük rolu var. Bir məqama diqqətinizi yönəltmək istəyirik. Ölkə başçısı milli qəhrəmanlar, onların ailə üzvlərinin sosial vəziyyətinin yüksəldilməsi üçün bir neçə sənəd imzalayıb. Bundan əlavə, o, bir neçə rəsmi sənəd vasitəsilə milli qəhrəmanlarımızın gənclərə tanıdılmasını tövsiyə edib. Məsələn, "Azərbaycan gəncliyi 2011-2015-ci illərdə" Dövlət Dəstəyi Proqramının 6.2.- "Gənclərin vətəndaşlıq və vətənpərvərlik tərbiyəsi"- bəndinin 6.2.3 maddəsində Gənclər və İdman Nazirliyinə, Müdafiə Nazirliyinə, Təhsil Nazirliyinə, Mədəniyyət və Turizm Nazirliyinə, "Azərbaycan Televiziya və Radio Verilişləri" Qapalı Səhmdar Cəmiyyətinə Azərbaycanın milli qəhrəmanlarının və ərazi bütövlüyü uğrunda döyüşlərdə şücaət göstərmiş gənclərin tanıdılması ilə bağlı layihələrin həyata keçirilməsi, qəhrəmanlıq nümunələrinin gənclər arasında təbliğ edilməsi tövsiyə edilib. Gördüyünüz kimi, çox az sayda uyğun sənəd tapılar ki, orada heç olmasa bir bənd Azərbaycan torpaqlarının müdafiəsi üçün göstərdiyi şücaətə görə Milli Qəhrəman adı alan şəxslərə həsr edilməsin. Dövlətimiz bu şəxslərin şəhadətini və qaziliyini layiqincə qiymətləndirir və bu müsbət məsələnin gənclər arasında daha geniş şəkildə yayılmasını hədəfə alır.

Bildiyimiz qədər, dövlət ali məktəblərində təhsil alan Milli Qəhrəman övladlarının təhsil haqqı dövlət büdcəsi hesabına ödənilir (bu məlumatı dəqiqləşdirə bilmədik. Onların övladlarının təhsil haqqı dövlət hesabına ödənilmirsə, bunun təmin edilməsi arzuediləndir-İ.S). Bu da qayğının təzahürüdür. Milli Qəhrəman adı daşıyan şəhidlər vətənimizin azadlığı və bütövlüyü uğrunda canından keçib. Odur ki, cəmiyyətin özünün də onlara və ailələrinə özəl münasibəti olmalıdır.

Ümummilli lider Heydər Əliyevin yolunu davam etdirən Azərbaycan Respublikasının Prezidenti İlham Əliyev də bu gün Qarabağ şəhidlərinin xatirəsini əziz tutur, şəhid ailələrinin, milli qəhrəmanlarımızın sosial problemləri ilə yaxından maraqlanır, onların problemlərini həll edir. Prezidentin bu yöndə göstərdiyi qayğının bariz nümunəsi Vətən uğrunda canından keçənlərə layiqli qiymət verməsidir.

Bəllidir ki, son illər şəhid adlarının əbədiləşdirilməsi, şəhid ailələrinin, milli qəhrəmanların, müharibə əlillərinin və veteranların sosial təminatının yaxşılaşdırılması, sosial-hüquqi müdafiəsinin gücləndirilməsi məqsədilə dövlət tərəfindən bir sıra tədbirlər həyata keçirilir. Bütün bunlar öz bəhrəsini versə də, bəzi problemlər hələ də həll olunmamış qalır.

Qeyd etdiyimiz kimi, milli qəhrəmanlara dövlət tərəfindən göstərilən sayğı çox böyükdür. Artıq son günlər çox maraqlı layihələrə start verilib. Belə ki, artıq davamlı olaraq milli qəhrəmanlarımızla bağlı geniş səviyyəli tədbirlər keçiriləcək. Onlardan birincisi aprel ayında keçirildi. Birinci tədbir Azərbaycan Respublikasının Milli Qəhrəmanı Albert Aqarunovun 45 illiyinə həsr edilib. Suraxanı rayonundakı Heydər Əliyev Mərkəzi, Suraxanı Rayon İcra Hakimiyyəti, Şuşa Rayon İcra Hakimiyyəti, Azərbaycan Respublikası Müdafiə Nazirliyinin Azərbaycanın Hərb Tarixi Muzeyi (AHTM), Dağ Yəhudiləri Dini İcması, Səbail tank batalyonunun birgə təşkilatçılığı ilə Suraxanı rayon Heydər Əliyev Mərkəzində Azərbaycanın Milli Qəhrəmanı Albert Aqarunovun anadan olmasının 45 illiyi münasibətilə anım tədbiri keçirilib. Heydər Əliyev Mərkəzində davam edən tədbir Azərbaycanın Milli Qəhrəmanı Albert Aqarunov haqqında filmin nümayişi ilə başlayıb. Suraxanı Rayon İcra Hakimiyyətinin başçısı İlqar Abbasov Milli Qəhrəman haqqında fikirlərini bölüşüb. O bildirib ki, Suraxanı rayonunda Vətənin azadlığı uğrunda şəhid olanların xatirəsinə hörmətlə yanaşılır, onların ailələrinə, müharibə əlillərinə və iştirakçılarına xüsusi diqqət və qayğı göstərilir. O qeyd edib ki, Azərbaycanın Milli Qəhrəmanı Albert Aqarunovun həyat yolu hər bir gənc üçün örnəkdir və onun xatirəsi həmişə Azərbaycanı sevən insanların qəlbində yaşayacaq.

Azərbaycan-Ermənistan, Dağlıq Qarabağ münaqişəsi barədə məruzə ilə çıxış edən Azərbaycan Respublikası Müdafiə Nazirliyinin Azərbaycanın Hərb Tarixi Muzeyinin (AHTM) rəisi, ehtiyatda olan polkovnik Rüfət Əmirov deyib ki, Azərbaycan xalqı Albert Aqarunovun qəhrəmanlığını, döyüşdə göstərdiyi şücaəti heç zaman unutmayacaq: "Milliyyətcə yəhudi olan Albert Aqarunov Vətənimizin bütövlüyü uğrunda mübarizədə şəhidlik zirvəsinə yüksəlmiş Azərbaycan qəhrəmanıdır".

Dağ Yəhudiləri Dini İcmasının sədri Milix Yevdayev bildirib ki, Albert Aqarunov qısa, lakin dəyərli ömür yaşayıb: "Albert hər gün ölümün üzünə dik baxıb. Bunun özü bir şücaətdir. Allah eləsin ki, Albertin növbəti ad gününü Şuşada qeyd edək".

Səbail tank batalyonunun sabiq komandiri Hacı Əzimov və Albertin döyüş yoldaşı, polis polkovnik-leytenantı Vahid Vəliyev, müdafiə nazirinin sabiq müavini, Bakı Şəhər Veteranlar Şurasının sədri, ehtiyatda olan polkovnik Məhərrəm Cahangirov Albertin keçdiyi döyüş yolu, onunla bağlı xatirələrindən danışıb, şəhidlərimizi heç zaman unutmayacaqlarını deyiblər.

Milli Məclisin üzvü Yevda Abramovun fikrincə, Albertin harada doğulması, hansı milliyyətdən olması önəmli deyil: "Şuşada olan hər bir Azərbaycan oğlu Albert kimi hərəkət edərdi. Gələcək nəsillərin tərbiyəsində, məktəblərdə, institutlarda, ictimai yerlərdə Albert kimi qəhrəmanlarımızı nümunə göstərmək lazımdır. Belə insanlar unudulmamalıdır. Bu gün təkcə Albertin yox, bütün şəhidlərimizin, bütün qəhrəmanlarımızın doğum günüdür".

"Azərbaycan Respublikası Dağlıq Qarabağ bölgəsinin azərbaycanlı icması" İctimai Birliyinin rəhbəri, Şuşa Rayon İcra Hakimiyyətinin başçısı Bayram Səfərov bildirib ki, dünyada elə bir ölkə yoxdur ki, Azərbaycandakı qədər azsaylı xalqlara bu qədər diqqət yetirilsin: "Biz Albert kimi döyüşçülərlə fəxr edirik. Gənc nəsil belə döyüşçülərin igidliyindən örnək götürməlidir. Azərbaycanın ən müasir silahla təchiz edilmiş güclü ordusu var. Azərbaycanın bir qarış torpağı da düşmənə verilə bilməz! Azərbaycanın üçrəngli bayrağı Şuşada, Qarabağda dalğalanacaq!".

Əlbəttə, Albert Aqarunov əsl qəhrəmanlıq nümunəsidir. Gənclərin vətənpərvərlik ruhunda tərbiyə olunmasında belə tədbirlərin keçirilməsi önəmlidir.

Bu tədbirdə İsrailin Azərbaycandakı səfiri Rafael Harpaz, Qarabağ müharibəsi veteranları, rayon ictimaiyyətinin nümayəndələri, kursantlar və digərləri iştirak ediblər.

Qeyd edək ki, Albert Aqarunov 25 aprel 1969-cu il Bakının Əmircan qəsəbəsində anadan olub. Suraxanı rayonundakı 154 saylı məktəbin səkkizinci sinfini bitirərək peşə məktəbində sürücü-mexanik ixtisasına yiyələnib, 1987-ci ildə isə hərbi xidmətə çağırılıb və xidməti dövründə tank komandiri olub. Daha sonra Bakıya dönərək Suraxanıda Maşınqayırma zavodunda işləyib. Qarabağ müharibəsi başlayarkən 1992-ci ildə Albert Aqarunov könüllü olaraq cəbhəyə yollanıb. Tank komandiri təyin edilən Albert Aqarunov Şuşa cəbhəsində döyüşüb. O, Xankəndi, Daşaltı, Cəmilli istiqamətində gedən döyüşlərdə erməni işğalçılarının xeyli canlı qüvvəsini, zirehli texnikasını məhv edib. Ermənilərin Şuşaya hücumu vaxtı Albert Aqarunov düşmənin bir neçə zirehli texnikasını məhv edib. Buna görə döyüş yoldaşları tərəfindən "yəhudi buterbrodu" adını alıb. A.Aqarunov 8 may 1992-ci ildə Şuşa uğrunda gedən döyüşlərdə snayper gülləsinə tuş gəlib və döyüş meydanında həlak olub.

Tarixçi Təzəgül Yusifovanın sözlərinə görə, gənc nəslin öyrənməli olduğu insanlarımız çoxdur: "Milli qəhrəmanlarımız da onlara nümunədir. Dövlət tərəfindən onlara göstərilən diqqət-qayğı gənclərə yaxşı nümunədir.

Onlar bu qayğını əyani şəkildə görür. Bu da o deməkdir ki, dövlət Vətən uğrunda canını qoyan, sağlamlığını itirən insanların arxa-dayağıdır. Milli qəhrəmanların həyatı, döyüş yolu təbliğ edilməlidir. Artıq geniş miqyasda təbliğat işinə başlanıb. Bunun bizim gəncliyə faydası çox olacaq".

İradə SARIYEVA

Bakı xəbər.-2014.-2-4 may.-S.15.