Gənclərin yaradıcılıq festivallarının vətənpərvərlik tərbiyəsinə təsiri...

Gəncliyin vətənpərvərlik ruhunda tərbiyəsi hər birimizi maraqlandıran bir məsələdir. Bu nəcib işdə dövlətin dəstəyi və yürütdüyü siyasət gənclərin inkişaf yollarına yeni üfüqlər açıb. Bəllidir ki, hələ Azərbaycanın sabiq prezidenti Heydər Əliyevin dövründən dövlətin aydın gənclər siyasəti olub. Azərbaycanın sabiq prezidenti dövlət gənclər siyasəti haqqında 29 iyul 1999-cu ildə fərman verib. Həmin fərmanda Azərbaycan gəncləri ilə bağlı köklü məsələlər yer alıb.

Fərmanda deyilir: "Azərbaycan gənclərinin təşkilatlanaraq ümummilli problemlərin həlli uğrunda mübarizəyə başlaması XIX əsrin sonlarına təsadüf edir. Bu dövrdə bütün dünyada gedən ictimai-siyasi proseslər Azərbaycanda gənclər hərəkatının ümumi strategiyası və ideologiyasının formalaşmasına təkan verərək gəncliyin həyatında dərin iz buraxmışdır. Bununla yanaşı, o zaman Azərbaycanda yaranmış siyasi vəziyyətin, mədəni və ictimai-siyasi mühitin də Azərbaycan gənclərinə güclü təsiri olmuşdur. Azərbaycanda təşəkkül tapmış yeni tipli məktəb, demokratik mətbuat və dünyəvi teatr gənclərin milli-siyasi şüurunun inkişafında müstəsna rol oynamışdır. Avropada və Rusiyada təhsil almış azərbaycanlı gənclərin mədəni və ictimai-siyasi həyatda böyük fəallığı da həmin dövrün səciyyəvi cəhətlərindəndir.

Hələ 1902-ci ildə "Müsəlman gənclik təşkilatı" ətrafında birləşən Azərbaycan gəncliyi sonralar Rusiya imperiyasının və Sovet İttifaqının tərkibində olmaqla mövcud geosiyasi məkanın tələbləri çərçivəsində fəaliyyət göstərərək böyük inkişaf yolu keçmişdir. Azərbaycan gəncləri XX əsrin əvvəllərində başlanmış və 1918-ci ildə Azərbaycan Xalq Cumhuriyyətinin yaranması ilə nəticələnmiş milli-azadlıq hərəkatının aparıcı qüvvələrindən olmuşdur".

Fərmanda qeyd edilir ki, Azərbaycanın öz dövlət müstəqilliyini bərpa etməsində gənclərin böyük xidməti olub: "Sovet imperiyasına qarşı mübarizənin, o cümlədən Qarabağ hadisələri ilə bağlı təşəkkül tapmış xalq hərəkatının ön sıralarında gənclərimiz getmişlər. 1988-ci ildə erməni ekstremistlərinin Azərbaycana qarşı başladıqları hərbi təcavüzü dəf etmək üçün ilk özünümüdafiə dəstələrinin yaradılmasında və fəaliyyət göstərməsində gənclərin böyük xidmətləri olmuşdur. 1990-cı il yanvarın 19-20-də sovet qoşunlarının Bakıda və respublikanın digər şəhər və rayonlarında törətdikləri qanlı hadisələrin qurbanları - ilk azadlıq şəhidləri də əsasən gənclər oldular... 1991-1993-cü illərdə respublikada gənclərin müxtəlif təşkilatları meydana çıxmağa başladı... Dövlət gənclər siyasətinin həyata keçirilməsi sahəsində həllini gözləyən bir sıra problem və məsələlər mövcuddur. Uşaq və gənclərlə işləyən kadrların hazırlanması, gənclərin həyatında baş verən proseslərin elmi şəkildə öyrənilməsi günün vacib məsələlərindəndir. Ayrı-ayrı dövlət hakimiyyəti və idarəetmə orqanlarının gənclərlə iş üzrə əlaqəli və məqsədyönlü fəaliyyət göstərməsi üçün lazımi şərait yaradılmalıdır. Gənclərin daha geniş təbəqələrinin dövlət idarəetmə işlərinə cəlb olunması sahəsində əlavə tədbirlərin görülməsinə və bunun üçün lazımi maliyyə vəsaitinin ayrılmasına ehtiyac vardır. Ölkə əhalisinin yarıdan çoxunu təşkil edən uşaq, yeniyetmə və gənclərin üzləşdikləri problemləri həll etmək, onları yeni dövrün tələblərinə uyğun hazırlamaq kompleks tədbirlərin həyata keçirilməsini zəruri edir".

Azərbaycan Respublikasında dövlət gənclər siyasəti müxtəlif istiqamətlərdə davam etdirilir. Bu fərmanın verilməsindən uzun illər keçib. Burada istedadlı gənclərlə bağlı müddəalardan irəli gələn məsələlər yüksək səviyyədə həllini tapır. Bildirək ki, bu gün gənclərlə bağlı yüzlərlə layihələr işlənir, tədbir, sərgi və festivallar keçirilir.

Onu da bildirək ki, son illər ardıcıl olaraq

Gənclər və İdman Nazirliyinin, eləcə də digər dövlət qurumlarının və QHT-lərin dəstəyi ilə gənclərin yaradıcılıq, folklor, idman festivalları keçirilir. Yalnız 2014-cü ildə ard-arda iki böyük gənclər festivalı keçirilib. Bu ilin mart ayında Gənclər və İdman Nazirliyinin dəstəyi ilə "Avropa Tələbələr Forumu-Bakı" İctimai Birliyinin (AEGEE-Bakı) təşkilatçılığı ilə Azərbaycanda "Novruz 2014 - Beynəlxalq Gənclər Festivalı" keçirilib. Tədbirə bizim gənclərlə yanaşı dünyanın 35 ölkəsini təmsil edən 50 nəfər əcnəbi gənc qatılmışdı. Festivalın keçirilməsində əsas məqsəd Azərbaycan mədəniyyətinin, milli adət-ənənələrinin dünyaya bir daha tanıdılması olub. Tədbir müddətində Azərbaycana dəvət olunmuş əcnəbi gənclər Novruz adət-ənənələri ilə tanış olub, bir neçə regiona səfər edib, bir sıra tarix-memarlıq abidə məkanına ekskursiyaya gediblər.

Xatırladaq ki, festival hər il ənənəvi olaraq AEGEE-Bakı tərəfindən təşkil olunur. AEGEE-Bakı Avropanın 40-dan çox ölkəsinin 200-dən yuxarı şəhərində fəaliyyət göstərən və özündə 20 mindən çox tələbəni birləşdirən Avropa Tələbələr Forumu (AEGEE) təşkilatının Bakı şəhəri üzrə yerli nümayəndəliyidir.

Bir neçə gün əvvəl isə MDB məkanında ilk dəfə olaraq, Azərbaycanın Şəki şəhərindəki "Xan sarayı"nda

tarixi rekonstruksiya formatında təşkil edilmiş "Tarixin canlı səhifələri" adlı Gənclər Festivalı keçirilib.

Gənclər və İdman Nazirliyinin keçirdiyi tədbirdə gənclərin milli mənlik şüurunun formalaşmasına, onlarda vətənpərvərlik tərbiyəsinin güclənməsinə səbəb olan maraqlı anlar yaşanıb. Qeyd edək ki, gənclər və idman nazirinin müavini İntiqam Babayev festivalın əhəmiyyətini yüksək qiymətləndirib. Onun sözlərinə görə, festivalın əsas məqsədi gəncləri vətənpərvərlik ruhunda tərbiyə etmək, onların tariximizə olan marağını artırmaq, şərəf dolu tarixi döyüş səhnələrini gənclərə əyani olaraq çatdırmaqdır.

Ümummilli lider Heydər Əliyevin 91 illik yubileyinə həsr olunan festival orta əsrlərdən günümüzə qədər olan tarixi dövrü əhatə edib.

Festivalın ilk hissəsində tamaşaçılar o dövrə xas olan mədəniyyət, məişət və ənənələrlə tanış olub, orta əsr dövrünün eksponatları, dulusçuluq, papaqçılıq, təkəlduz, şəbəkə, dəmirçi və digər qədim sənətləri seyr etmək imkanı əldə etdilər. Festivalın ikinci hissəsində Azərbaycanın tarixi qəhrəmanlarından olan Cavanşirin, müstəqilliyimiz uğrunda ərəblərlə mübarizə aparan Babəkin, bütöv Azərbaycanı ilk dəfə vahid halda birləşdirən Şah İsmayıl Xətainin, məşhur Şəki xanı Hacı Çələbi xanın, Gəncənin müstəqilliyi uğrunda öz canından keçən Cavad xanın həyatı tələbə və aktyorlar tərəfindən canlandırılıb.

Bildirək ki, festivalın 200 nəfərə yaxın iştirakçısı olub. Layihənin ideya müəllifi Gənclər və İdman Nazirliyinin əməkdaşı Günay Rəhimova, rejissoru Gənc Tamaşaçılar Teatrının rejissoru Nicat Kazımov, rəssam Elşən Sərxanoğlu olub.

Layihədə Gənc Tamaşaçılar, Şəki Dram Teatrının aktyorları, Gənclər və İdman Nazirliyinin nəzdində yerləşən atçılıq məktəbinin mütəxəssisləri və s. iştirak edib.

Qeyd edək ki, 2014-cü ildə gənclərlə bağlı bir sıra maraqlı layihələr keçirilib və keçirilməkdə də davam edir.

Belə ki, bu ilin yanvar ayında Nizami Kino Mərkəzində Humay Fərəcovanın Azərbaycan Respublikasının Prezidenti yanında Gənclər Fondunun maliyyə dəstəyi ilə həyata keçirdiyi "Gənc Azərbaycan" adlı qısametrajlı film festivalı keçirilib. Tədbirdə 10 film göstərilib və bu 10 film ekspertlər tərəfindən qiymətləndirilib.

Bu kimi tədbirlərin, festivalların gənclərin həyatında mühüm rol oynadığı bəllidir. Başqa bir incəsənət festivalı da bir müddət əvvəl keçirilib. Söhbət Azərbaycan Respublikasının Nazirlər Kabineti yanında "İçərişəhər" Dövlət Tarix-Memarlıq Qoruğu İdarəsinin təşkilatçılığı ilə Bakıda "Qız qalası" Beşinci Beynəlxalq İncəsənət Festivalı keçirililməsindən gedir. Onu da deyək ki, 2010-cu ildən etibarən keçirilən festivalın əsas məqsədi Azərbaycanın qədim və sirli abidəsi, Bakının rəmzi olan Qız qalasının dünyada təbliği və tanıdılmasına töhfə verməkdir.

Keçən illər "Üfüq Gənclərin İnkişafı Naminə" İctimai Birliyinin "Mən idmanı seçirəm!" devizi altında regionlarda gənclər arasında sağlam həyat tərzinin geniş təbliğ edilməsi - idman festivallarının keçirilməsi" layihəsi də baş tutmuşdu. Maraqlı idman festivalı gənclərin sağlamlığa meylli olmasını şərtləndirir. Bu layihə "Azərbaycan Gəncliyi 2011- 2015-ci illərdə" Dövlət Proqramının həyata keçirilməsi üzrə tədbirlər planına uyğun olaraq, Azərbaycan Respublikasının Gənclər və İdman Nazirliyi tərəfindən qismən maliyyələşdirilib.

Layihənin məqsədi regionlarda yaşayan gənclər üçün idmana cəlb etmək yolu ilə imkanlar təmin etmək, kənd icmalarında gənclərin idmanda iştirakını artırmaqla, onların fiziki və əqli inkişaflarına töhfə verməkdir.

Həmçinin, sosial təcrid olmuş kateqoriyada gənclərin bərabər iştirakını təmin etmək, region gənclərinin idman və kütləvi bədən tərbiyəsi vasitəsilə zərərli vərdişlər barədə, sağlam həyat tərzi barədə maarifləndirilməsi olub.

Bu layihə çərçivəsində Azərbaycanın 8 regionunda - Yevlax, Mingəçevir, Göyçay, Biləsuvar, İsmayıllı, Hacıqabul, Ağstafa, Ağcabədi regionlarında marafon, valeybol yarışları, kütləvi bədən tərbiyəsi hərəkətləri vasitəsilə gənclərin idmanda iştirakı təmin olunub.

Keçən il respublikamızda keçirilən gənclərin teatr festivalını da qeyd etməliyik. Yəqin bilirsiz ki,

"Bizə ideya lazımdır" devizi ilə keçirilən Gənclərin II Ümumrespublika Teatr Festivalı"ndan danışacağıq. Mədəniyyət və İncəsənət Universitetinin professoru, teatrşünas Məryəm Əlizadənin dəstəyilə keçirilən festivalda gənclərin vətənpərvərlik tərbiyəsinin formalaşdırılması önə çəkilib. Festivalın keçirilməsini yüksək qiymətləndirən Məryəm Əlizadə bildirib ki, o, vətənpərvərlik mövzusuna həsr olunan festivalı əvvəldən axıradək izləyib: "Bu festival mənə çox doğma və çox da tanışdır. Ona görə ki, mən 1-ci Ümumrespublika Teatr Festivalının iştirakçısı olmuşam. Əvvəldən ta axıra qədər o festivalı izləmişəm. Təəssüratlarım o qədər zəngindir ki, bilmirəm haradan başlayım, haradan qurtarım. Cavanlar bu festivalda elə bir entuziazm nümayiş etdirirdilər ki, yaxşı mənada təəccüblənirdim".

Bu festival isə ekologiya mövzusuna həsr olunmuşdu.

Məryəm Əlizadə qlobal məsələnin Azərbaycan teatrında layiqli tamaşalarda öz əksini tapacağına ümid edir: "Günümüzlə səsləşir, addımbaşı bu mövzudan ssenari ideyası ortaya çıxa bilər. Ümumiyyətlə, mən deyim ki, gəncləri yaradıcılığa, yeni ideyalar tapılmasına sövq edən, onların düşüncə tərzinin ifadə olunmasına xidmət edən bu cür layihələri yalnız alqışlamaq olar. Çünki bu festivalın əhəmiyyəti böyükdür".

Gənclərlə bağlı keçirilən müxtəlif layihələrdən söhbət açdıq. Məzmunundan və adından da göründüyü kimi bunların məqsədi gənclərin vətənpərvərlik tərbiyəsini yüksəltməyə yönəlib. Əlbəttə, bütün sahələrdə istedadı olan gənclərin vətənpərvər olması da bizə gərəkdir, lazımdır.

İradə SARIYEVA

Bakı xəbər.-2014.-5 may.-S.12.