Naxçıvan turizmindəki sıçrayış maraqlı səbəblərlə əlaqələndirildi

Bahadur Bilalov: "Naxçıvanın təbiətinin çox maraqlı olması turistlərin diqqətini cəlb edir"

 "Naxçıvana şəfa tapmaq məqsədilə gələnlərin sayının artması turizmin bu sahəsinin inkişafına göstərilən diqqətin nəticəsidir"

 Turizm artıq bütün dünyada ən gəlirli sahələrdən birinə və sürətlə inkişaf edən iqtisadi sektora çevrilib. Turizmdə Azərbaycanın rəqabət imkanları genişdir. Təbii sərvətlərimiz, rəngarəng iqlimimiz, zəngin tarixi-mədəni irsimiz cəlbedici turizm məhsulu yaratmaq üçün mühüm zəmindir.

Ölkəmizin coğrafi cəhətdən əlverişli mövqedə yerləşməsi, infrastrukturun təkmilləşdirilməsi turizm sahəsinin inkişafını şərtləndirən amillərdəndir. Ölkəyə istirahət üçün gələn turistlərin artması göz qabağındadır. İstənilən kəs paytaxt ərazisində istirahət edən turistlərlə rastlaşa bilər. Turistlər tək paytaxt Bakıya deyil, eyni zamanda, Naxçıvan MR-ə üz tutur. Açıqlanan statistik rəqəmlərə əsasən, Naxçıvan MR-ə bu ilin yanvar-iyul aylarında gələn turistlərin sayı ötən ilin müvafiq dövrü ilə müqayisədə 4,3 faiz artıb. Bu il Muxtar Respublikaya 216 min 284 turist gəlib ki, bu da 2015-ci ilin müvafiq dövründəki göstəricidən 8910 nəfər çoxdur.

Xatırladaq ki, ötən il Muxtar Respublikaya gələn turistlərin sayı 389 823 nəfər, turist kimi gedənlərin sayı isə 117 654 nəfərə çatıb. 2010-cu ildə isə gələn turistlərin sayı 287634 nəfər olub.

İstirahət üçün Naxçıvanı seçən turistlərin sayının artması barədə fikir bildirən turizm sahəsi üzrə ekspert Bahadur Bilalov bizimlə söhbətində qeyd etdi ki, mineral su bulaqlarına duz yataqlarına görə Naxçıvan Muxtar Respublikası dünyanın ən zəngin bölgələrindəndir: "Bu təbii ehtiyatların müalicəvi əhəmiyyəti isə Muxtar Respublikaya müalicə turizmi məkanı kimi şöhrət gətirib. Son illər Naxçıvana şəfa tapmaq məqsədilə gələnlərin sayının artması turizmin bu sahəsinin inkişafına göstərilən diqqətin nəticəsidir. Bildirim ki, artıq Naxçıvanda yenidən qurulan Duzdağ Fizioterapiya Mərkəzində müayinə, müalicə üçün hər cür şərait yaradılıb. Unikallığı ilə dünyada yeganə olan bu müalicə mərkəzi tənəffüs yollarının qeyri-spesifik xəstəliklərindən əziyyət çəkən insanların ən çox üz tutduğu məkandır. Darıdağ mineral su yatağı da müalicə əhəmiyyətinə görə nadir su mənbələrindən hesab edilir.

Naxçıvanın dini ziyarətgahları buraya gələn qonaqların böyük marağına səbəb olur. Qədim inancları, möcüzəvi sirləri əfsanələri özündə yaşadan "Əshabi-Kəhf" Dini-Mədəni Abidə Kompleksi dünyanın dörd bir yanından gələn zəvvarların ziyarətgahına çevrilib. Bu mənada dini turizmin inkişafı istiqamətində görülən işlər, dini-mədəni abidələrin bərpası qorunması, təşkil olunan turizm marşrutları mədəni irsimizin dünyaya tanıdılmasında vasitə rolunu oynayır".

Həmsöhbətimiz onu da əlavə etdi ki, Naxçıvanın təbiətinin çox maraqlı olması insanların diqqətini cəlb edir: "Son zamanlar Naxçıvan doğrudan da çox gözəlləşib. Şəhər abadlaşır küçələrin təmizliyi istənilən insanın diqqətini cəlb edir. Naxçıvanda respublika səviyyəsində keçirilən tədbirlər ora gedənlərin sayının artmasına təsir edir".

Günel CƏLİLOVA

Bakı xəbər.- 2016.- 25 avqust.- S.12