Tarixdə iz buraxanlar: Memar Sinan
Memar Sinan türkə şərəf verən, cahana isə yüzlərlə mədəniyyət əsəri bağışlayan bir sənətkar-elm adamı olaraq
tarixə keçən böyük Osmanlı memarıdır. Qoca Sinan deyə də yad edilir. O, 1489-cu ildə Kayserinin Ağırnas kəndində anadan olub.
Yavuz Sultan Səlim xan zamanında hərbi təhsil almaq üçün
İstanbula gedib. Burada yaxşı bir təhsil aldıqdan
sonra gənc
oğlanlar kazarmasına verilib. Gənclər ocağına
yeni çağırılanlar, çox ciddi bir əsgərlik təhsili ilə yanaşı,
böyük insanlar yanında və
gəmilərdə əlavə
xidmət göstərərdilər.
Beləcə bu gənclər, əsgərlik xidməti ilə yanaşı, bir
də bir məslək öyrənərdilər.
Memar Sinan da burada dülgərlik sənətini öyrənib.
Uzun illər sonra 1533-cü ildə Qanuni Sultan Süleyman İran səfərində ordusu ilə Van gölünə gəldikdə Vəzir Lütfü paşa
qarşı sahilə keçmək və düşməni nəzarət altına almaq istədi. Bu məqsədlə Sinanın iki həftə kimi qısa bir
zamanda üç ədəd gəmi düzəldib
hazırlamasından çox razı qalan Lütfü
paşa gəmilərin idarəsini ona
tapşırdı. Böyük etibar
qazanan Sinana İran səfərindən döndükdən sonra yeniçəri ocağında
etibarı yüksək
olan Hasekilik rütbəsi
verildi. Bu rütbə
ilə Memar Sinan
1537-ci ildə
Korfu, Pulya və
1538-ci ildə Qara
Boqdan səfərlərinə qatıldı.
Boqdan səfəri Memar Sinanın son səfəri oldu. Ordu Prut
çayının sahilinə
gəldikdə ordunun bu
çayı keçməsi
üçün bir körpünün tikilməsi lazım gəldi. Orada torpaq sürüşkən olduğuna görə bu işi heç kəs öz üzərinə götürmədi. Yenə Lütfü
paşanın təklifi ilə bu iş Sinana tapşırıldı. Sinan ordudakı bütün memar və nəccarları toplayaraq on
üç gün ərzində körpünü
tikib ordunun qarşı tərəfə keçməsini
təmin etdi.
Bu hadisədən bir müddət sonra Hassa Baş
memarı Acem Əli və
Vəziri-əzəm Ayaz paşa vəfat etdi. Ayaz
paşanın türbəsini
tikmək
üçün yeni bir Baş memar təyin
edilməsi
lazım idi. Lütfü paşa bu dəfə də Sultanın yanına
gedib bu iş üçün ən uyğun olan adamın
Sinan olduğunu söylədi. Beləcə, 1538-ci ildə
Sinan Hassa Baş memarı vəzifəsinə təyin edildi.
Olduğu
hər səfərdə gördüyü bina və xarabalıqlardan dərs alan
Memar Sinan Qərbin və Şərqin memarlıq tərzini tədqiq imkanı əldə edib. Bu iki üslubu birləşdirərək orijinal əsərlər yaradan Memar
Sinanın Hassa rəhbərliyinə gətirilmədən əvvəl
ortaya qoyduğu üç əsər çox diqqət çəkicidir. Bunlar Hələbdə tikilən Xosroviyyə qülləsi, Qəbzədə tikilən
Çoban Mustafa qülləsi
və
İstanbulda Hürrəm
Sultan üçün tikilən
tək qübbəli bir camidir.
Bu qeyd etdiklərimizin
ətrafında həyət, mədrəsə, hamam, imarət və
qonaq evi kimi tikililər
çox ahəngdar
bir tərzdə yerləşdirilib.
Memar Sinanın Hassa başqanlığına gətirildikdən sonra yaratdığı
üç böyük əsər onun sənətinin qeyri-adi
inkişafını göstərən və onu yüksəklərə qaldıran pillələrdir. Bunların
ilki İstanbul Şahzadəbaşı
camisi və ətrafıdır.
Dörd yarım qübbənin ortasında mərkəzi bir qübbə tərzində
inşa edilən
Şahzadəbaşı
camisi daha sonra tikilən
bütün camilərə tarixi bir
nümunə olub.
Süleymaniyyə camisi Memar Sinanın İstanbuldakı ən möhtəşəm əsəridir. Öz
sözü ilə
desək, rütbəli dönəmində tikilib. Süleymaniyyə
camisi Memar Sinan yaradıcılığının
zirvəsini təşkil edir. Memar Sinan uzun illər
ərzində
qazandığı bilik və
təcrübələri bu möhtəşəm
sənət əsərində uğurla həyata keçirib.
Maraqlıdır ki, Süleymaniyyə camisinin
tikilişinə
başladığı zaman Sinanın yaşı
60-ı keçmişdi.
Bu caminin tikintisi zamanı Memar Sinan elə sənətkarlıq məharəti nümayiş etdirib
ki, o dövrün imkanları baxımından bunu ancaq
möcüzə adlandırmaq olar. İstanbulun
simvoluna çevrilən
Süleymaniyyə
camisinin ibadət
zalı 275 ədəd iri
çıraqla işıqlanırdı. Çıraqlardan qalxan tüstü
divarları hisləndirməsin və namaz qılanlara
əziyyət verməsin deyə, divarların
daxilində dəhlizlər
yaradılmışdı. Bütün
dəhlizlər caminin orta
qapısı üzərində inşa edilən kiçik bir
otağa açılırdı. Çıraqların
hisi-tüstüsü bu otağa gəlir,
burada xüsusi nəmləndirmə sistemi vasitəsilə emal edilir və ondan mürəkkəb
hazırlanırdı. Süleymaniyyə camisinin daxili
divarlarını bəzəyən bütün nəfis yazılar, Müqəddəs Kitabımız
Qurani-Kərimin
ayələri həmin mürəkkəblə yazılıb.
Caminin daxilində mükəmməl akustika effekti mövcuddur. Deyilənlərə görə,
Memar Sinan tikintinin daş işlərini
başa çatdırdıqdan sonra caminin içərisinin və günbəzin tikintisini
xeyli yubadıb. Hətta caminin müxtəlif guşələrində oturub cavanlarla sulu qəlyan çəkirmiş. Sultan bundan xəbər tutub qəzəbli halda tikinti yerinə gəlir və
həqiqətən Sinanın camidə qəlyan çəkdiyini
görür. Səbəbini soruşduqda
memar izah edir ki, bu yolla caminin akustikasını
yoxlayır. Tikintinin hər guşəsində qəlyanın gurultu səsinin əks-sədasını dinləyən memar akustikanı gücləndirmək üçün
hansı vasitələrdən istifadə etmək üzərində
düşünürmüş.
Bu təcrübələrin nəticəsi olaraq, Memar Sinan günbəzin oturacağına,
daşların arasına 65 ədəd nəhəng saxsı küp yerləşdirir. Məhz bu küplərin daxili fəzasının
hesabına caminin heyrətamiz
akustikası qurulur. Bu gün də mehrab
qarşısında Qurani-Kərim
oxuyan şəxsin
səsi caminin hər bir guşəsində rahatlıqla
eşidilir.
Memar
Sinanın ən gözəl əsəri səksən yaşında tikdirdiyi və onun "Ustalıq əsərim" - deyə təqdim etdiyi Ədirnədəki Səlimiyyə camisidir. Səlimiyyə camisi o
zamankı Osmanlı Sultanı II Səlimin
əmrilə Ədirnə şəhərində
tikilib. Hündürlüyü 84 metrə çatan 3
eyvanlı minarələrin en kəsiyinin
qalınlığı cəmi
3 metr 80 santimetrdir. Buna görə də belə
tikilən minarələr səmanın
bağrını dələn nazik oxlara bənzəyir. Müsəlmanlar
hər zaman Uca
Yaradana olan sevgilərilə, Ona ibadət məkanı olan camiləri gözəl bəzəmək
uğrunda yarışmış, buna bütün
bacarıqlarını sərf
etmiş, ibadət
ocaqlarını əsl
sənət əsərinə çevirmişlər. Ən yaraşıqlı naxışlara, ən incə oymalara, ən gözəl yazı xətlərinə məhz cami divarlarında rast
gəlmək olar.
Memar Sinan memarbaşı olduğu müddətcə bir-birindən çox fərqli mövzularla məşğul olurdu. Zaman-zaman
köhnələri bərpa edirdi. O bu
mövzudakı ən böyük kəşf səylərini Ayasofya üçün sərf edib. 1573-cü
ildə
Ayasofyanın qübbəsini
bərpa edərək ətrafına
əlavə divarlar tikdirib və əsərin
bugünədək sağlam olaraq
qalmasını təmin
edib. Köhnə
əsərlərlə abidələrin yaxınında tikilən və onların
görünüşlərini
pozan zövqsüz tikililərin
sökülməsi
də ona aiddir.
Memar Sinanın mühəndislik qabiliyyəti onun inşa etdirdiyi
körpülərdə də parlaq şəkildə üzə çıxıb. Təsadüfi deyil ki,
inşasına rəhbərlik etdiyi
Böyükçəkməcə körpüsü öz möhtəşəmliyi ilə yüz illər boyu insanları
heyrətə salıb. 636 metr uzunluğu olan bu körpü Memar
Sinanın adıçəkilən sahədəki şah əsəri hesab edilir.
Memar Sinanın mahir mühəndis olmasını onun
körpülərin və su kəmərlərinin inşasında göstərdiyi qeyri-adi istedadı
da sübut edir. O, körpü və su kəmərlərinin çəkilməsində, cami və türbələrin inşasında olduğu kimi, o dövrdəki təcrübədən yaradıcı şəkildə istifadə edərək onların əsasında yeni bir
memarlıq məktəbinin əsasını qoyub.
O,
İstanbul küçələrinin genişliyi, evlərin tikilişi və yeraltı keçidlərin bağlanması ilə ortaya çıxan
yanğın təhlükəsinə də diqqət çəkərək bu barədə fərman nəşr etdirib. Memar Sinanın
günümüzdə
belə bir problem
olan İstanbulun səkiləri ilə şəxsən maraqlanması
çox əhəmiyyətlidir. Onun bu mövzuya nə
qədər əhəmiyyət verməsi İstanbulun səkiləri üçün
pul buraxmasından aydın olur.
Eyni
zamanda bir çox əsəri plan halına gətirib inşaatlarını yerinə yetirən Memar Sinan bütün
inşaatlarının ən kiçik işlərilə belə özü maraqlanıb. Bu dahi insan belə
böyük və
tarixi işlərilə heç zaman
öyünməyib.
Bütün bu müvəffəqiyyətlərilə birlikdə islam əxlaqı ilə tərbiyələnən Memar Sinan mütəvazi bir insan idi. Onun möhüründə
olan "Əlakır-ül-fakir Mimar Sinan" yazısı bu
dediklərimizi
isbat edir.
Türk-islam dünyasının yetişdirdiyi bu
böyük insan çox sayda tarixi əsərlər ortaya qoyub, inşa
etdirdiyi bütün əsərlərində özünə xas izlər buraxıb. Yüz ilə yaxın fəal bir həyat sürən bu dahi şəxsiyyətin əsərlərinin sayını Sai Mustafa Çələbi "Tezkeret-ül-Əbniya" adlı
kitabında 84 cami, 52 məscid, 57 mədrəsə, 7 darülkurra, 20
türbə, 17 imarət, 3 xəstəxana, 5 su yolu, 8 körpü, 20 karvansara, 36 saray, 8
anbar və 47 hamam olmaqla, cəmi 364 əsərin siyahısını verib.
Bu tarixi şəxsiyyətin əsərlərinin böyük bir qismi İstanbul şəhərindədir. Onun Osmanlı
ölkəsində
damğasını vurmadığı heç bir
künc belə
yoxdur. 1588-ci ildə
İstanbulda vəfat
edən Memar Sinan
Süleymaniyyə
camisinin yanında özünün tikdirdiyi mütəvazi bir türbədə dəfn
edilib.
Memar Sinanın Baş memarlığa gətirildiyi vaxtda Osmanlı
dövləti bir türk-islam dövləti olaraq iqtisadiyyat, ədalət və sosial quruluşları
baxımından dünyanın ən güclü dövləti idi. Belə qüdrətli bir dövlətin güclü bir
sənətkarı olan Memar
Sinan da təxminən əlli illik memarlıq
dövründə
öz üzərinə düşən vəzifəni qeyri-adi çalışqanlıq,
zövq və
haqqı ilə
yerinə yetirib.
Onun memarlıq dahiliyi ilə yanaşı, güclü təşkilatçılığı
da var idi. O günlərdə dünyanın heç bir yerində görülməyən dərəcədə memarlıq sənətini inkişaf etdirən Memar Sinan çox sayda
intizamlı və qabiliyyətli tələbələr yetişdirib.
Hassa Baş memarlığı Sinandan etibarən dövlətin hər tərəfində memarlıq qeydlərini aparıb. Memar Sinan
sarayda memarlığın hər
sahəsinə aid inşaat
atelyeləri
qurdurub. Bu atelyelərin
fəaliyyətlərini Sinan şəxsən özü nəzarət altında
saxlayıb və
onları səviyyəli bir şəkildə idarə etdirib. Bu atelyelərdə Sultanəhməd camisini tikən Sədəfkar Əhməd
Ağa və Davud
Ağa kimi memarlar yetişib.
Memar Sinan hər memarlıq əsərini özünə xas bir biçimdə ələ almaq, forma və konstruksiya bərabərliyini qurmaq, xarici məkan və quruluşun daxili məkana bütünlük
qazanmasını təmin etmək prinsiplərini bundan dörd əsr əvvəl öz əsərlərində göstərib. Buna görə də Memar Sinan əsrlər əvvəl ortaya qoyduğu sənəti ilə bir memarlıq dahisi
olaraq
Bakı xəbər.- 2016.- 29 dekabr.- S.13
Fazil
QARAOĞLU professor