Turizm sektoruna vergi güzəştlərinə ilk loyal rəsmi reaksiya...

Pərviz Heydərov: "Turizm obyektlərinin vergidən azad edilməsi xidmət keyfiyyətinin artmasına səbəb olar"

"Azərbaycan hökuməti turizm obyektlərinin vergidən azad olunması məsələsinə baxa bilər". Məlum olduğu kimi, bunu vergilər nazirinin müavini Sahib Ələkbərov mətbuata açıqlamasında deyib. Onun sözlərinə görə, sözügedən məsələ Vergilər Nazirliyinin səlahiyyətinə daxil deyil, əgər bu, ölkənin sosial-iqtisadi siyasətinə uyğun olacaqsa, bu addımı atmaq olar.

S.Ələkbərov onu da qeyd edib ki, turizm obyektlərinin vergidən azad edilməsinə kompleks şəkildə baxmaq lazımdır. Yəni ayrı-ayrı şəxslər güzəştlərdən sui-istifadə etməsin: "Bu addım atılsa, ölkə əhalisinin xeyrinə olmalı, dövlət büdcəsinə daxilolmaların artmasına gətirib çıxarmalıdır".

Azərbaycanda son illər turizmin inkişafı mühüm prioritet istiqamətlərdən biri hesab olunur. Ölkədə turizm sahəsinə yerli və xarici investisiyaların cəlb edilməsi, xidmətlərin keyfiyyətinin daha da yaxşılaşdırılması və müasir standartlara cavab verən infrastrukturun yaradılması üçün müxtəlif addımlar atılır. Turizmin inkişafı həm də ölkənin beynəlxalq miqyasda tanınmasında və Azərbaycanın müsbət imicinin formalaşmasında çox mühüm rol oynayır. Məlumat üçün qeyd edək ki, 2016-2019-cu illər ərzində turizm sektorunun orta hesabla 12,5 faiz artacağı proqnozlaşdırılır.

Bütün hallarda, ekspertlər turizm sektorunun vergidən azad edilməsini necə dəyərləndirir? Belə bir addım atılsa, bunun nə kimi faydası ola bilər?

Sözügedən məsələni dəyərləndirən iqtisadçı-ekspert Pərviz Heydərovun fikrincə, mövcud iqtisadi vəziyyətdə turizmin inkişafına dövlət dəstəyinin göstərilməsi çox mühümdür: "Ölkədə qeyri-neft sektorunun inkişafı hazırda prioritet təşkil edir. Turizm isə onun mühüm bir tərkib hissəsi sayılır. Bütövlükdə qeyri-neft sektorunun inkişafı konkret olaraq hansı addımlar atmaq lazım gəldiyini tələb edirsə, bu onun bütün seqmentlərinə və sahələrinə aid edilməlidir. Turizm obyektlərinin vergidən azad edilməsi xidmət keyfiyyətinin də artmasına səbəb olar. Eyni zamanda qeyd etməliyəm ki, sözügedən addımların əsasını ilk növbədə stimullaşdırıcı tədbirlər təşkil edir. Turizmin də inkişafı üçün belə stimullaşdırıcı tədbirlərin həyata keçirilməsi çox vacibdir. Lakin bu tədbirləri həyata keçirərkən əvvəlcədən mühüm nüanslar nəzərə alınmalı və yaxşı düşünülmüş şəkildə həyata keçirilməlidir. Turizm obyektlərinin vergidən azad olunması, hesab edirəm ki, təkcə qiymətlərin aşağı düşməsi ilə nəticələnməməlidir. Bu addım eyni zamanda ölkədə turizm sahəsində xidmət keyfiyyətinin artmasına da gətirib çıxarmalıdır. Odur ki, fikrimcə, vergilər nazirinin müavini Sahib Ələkbərovun da qeyd etdiyi kimi, turizm obyektlərinin vergidən azad edilməsinə kompleks şəkildə baxmaq lazımdır".

Vidadi ORDAHALLI

Bakı xəbər.- 2016.- 20 may.- S.13