Tanınmış yazıçı Akif Əli haqqında yeni kitab çıxdı... -
Filologiya elmləri doktoru, tanınmış tənqidçi Vaqif Yusiflinin "Akif ƏLİ. Söz adamı" adlı yeni kitabı respublikanın əməkdar jurnalisti, filologiya üzrə fəlsəfə doktoru, yazıçı-publisist Akif Əlinin yaradıcılığına həsr edilib. Müəllif Azərbaycan ziyalısının keçdiyi zəngin ömür yoluna nəzər salaraq, onun çoxşaxəli elmi-ədəbi yaradıcılıq fəaliyyətini tədqiq edərək, onun ümumən həyata baxışlarında müşahidə etdiyi orijinallığı kitabın əsas mövzusuna çevirii.
Vaqif Yusifli qəhrəmanının jurnalistlik fəaliyyətindən, ədəbi-tənqidi məqalələrindən, elmi axtarışlarından, roman, hekayə və esselərindən söz açır, onun elmi-tədqiqat işi olan "Mirzə Ələkbər Sabirin satira sənətkarlığı" monoqrafiyasını sabirşünaslıqda yeni bir yanaşma kimi dəyərləndirir, Sabir satiralarının poetik xüsusiyyətlərinin elmi-nəzəri araşdırmalarına diqqəti yönəldir.
Akif Əlinin 1990-93-cü illərdə müstəqilliyimiz üçün ən ağır dönəmlərdəki qəzetçilik fəaliyyəti, Azərbaycan gerçəklərinin müxtəlif problemlərini əhatə edən publisistik məqalələri, ulu öndər Heydər Əliyevin xalqımızın xilaskarı, müasir Azərbaycan dövlətinin qurucusu kimi titanik zəhmətindən bəhs edən düşüncələri kitabın ən maraqlı fəsillərindəndir. Xüsusən, Akif Əlinin zəngin illüstrasiyalı "Böyük ömrün anları" kitabından ətraflı bəhs edən müəllif Türk dünyasının iki dahi lideri Mustafa Kamal Atatürkün və Heydər Əliyevin Vətən naminə göstərdiyi qəhrəmanlığı, səmərəli və mənalı həyat yolunu işıqlandıran bu dəyərli əsərin yüksək ideya-bədii və mənəvi-əxlaqi əhəmiyyətini vurğulayır.
Akif Əlinin "Öncə Vətəndir", "Qaragöz oyunu", "Vətən mücadiləsi" və "İdrak" kitablarında toplanan çoxsaylı publisistik yazıları, bədii hekayə və esseləri, miniatür nəsr parçaları, aforizm və deyimləri ayrı-ayrı fəsillərdə geniş təhlilə cəlb olunur, onların həm ədəbi-bədii, həm də ictimai mahiyyəti açıqlanır. Kitabın maraqla oxunan fəsillərindən biri də sərkərdə Babəkin mübarizəsinə həsr edilmiş və böyük Azərbaycan qəhrəmanının edam qabağı düşüncələrini əks etdirən "Azman" romanı haqqındadır. Tənqidçi, bəşər tarixində misli görünməmiş qəddarlıqla edam edilsə belə, əyilməz ruhu sayəsində ölümsüzlük zirvəsinə ucalan Babəkin qəhrəman obrazını istedadla yaradan yazıçının bu əsərini nəsr sahəsində uğurlu bir addım kimi qiymətləndirir.
Kitabın ikinci hissəsində tanınmış ziyalının müxtəlif mətbuat səhifələrində dərc olunan, internet saytlarında yer alan çoxsaylı müsahibələrindən seçmələr oxuculara təqdim olunur. Onun ilk gənclik illərində bir sıra filmlərdə yaratdığı maraqlı ekran obrazları xatırlanır, radioda, televiziyada hazırladığı populyar verilişlərdən, müəllif proqramlarından bəhs edilir, pedaqogika, dövlət qulluğu sahələrindəki fəaliyyətinə nəzər salınır, eləcə də həyata baxışları, dünyagörüşü, xarakteri, insanlara, gözəlliyə, sənətə, yaradıcılığa münasibəti dolğunluğu ilə canlandırılır.
Filologiya elmləri doktoru, tənqidçi Vaqif Yusiflinin qələmə aldığı "Akif ƏLİ. Söz adamı" kitabı "Renessans-A" nəşriyyatı tərəfindən nəfis tərtibatla çap edilib. Kitabın mətni çoxsaylı foto-şəkillərlə müşayiət olunur.
İradə SARIYEVA
Bakı xəbər.- 2017.- 8-9 mart.- S.14