Bakıda Beynəlxalq Qafqazşünaslıq Konfransı – ermənilər nədən qorxdu…

“Erməni alimlərinin bu konfransa gəlməməsinin səbəbi yalanlarının bir daha dünya alimləri qarşısında ifşa ediləcəyi qorxusu ilə bağlıdır”

Qasım Hacıyev: “Konfransda vurğulandı ki, Cənubi Qafqazda baş verən bütün münaqişələrin, təxribatların səbəbkarı qonşu dövlətlərə ərazi iddiası irəli sürən ermənilərdir”

Məlum olduğu kimi, mayın 23-24-də Azərbaycan Milli Elmlər Akademiyasının (AMEA) Qafqazşünaslıq İnstitutunda Azərbaycan Xalq Cumhuriyyətinin yaranmasının 100 illiyinə həsr edilən “Qafqazda dövlətlərarası münasibətlər: 100 il əvvəl və müasir dövr” mövzusunda Beynəlxalq Elmi Konfrans keçirilib. Dünən başa çatan konfransa dünyanın bir çox ölkələrindən Qafqazşünas alimlər qatılıb.

Onu da vurğulayaq ki, Azərbaycan Respublikasının Prezidenti İlham Əliyev konfransa məktub ünvanlayaraq konfransın işinə uğurlar arzulayıb.

Qafqazşünaslıq İnstitutunun təşkil etdiyi beynəlxalq elmi konfransa erməni alimləri dəvət edilibmi?

AMEA-nın Qafqazşünaslıq İnstitutunun Ermənişünaslıq şöbəsinin müdiri, professor Qasım Hacıyev “Bakı-Xəbər”ə açıqlamasında bildirdi ki, bu konfransa dünyanın müxtəlif ölkələrindən alimlər qatılıb. Q.Hacıyevin sözlərinə görə, bu konfransda alimlərin iştirak etməsi üçün heç bir dövlətə dəvətnamə göndərilməyib, belə bir elmi konfransın keçiriləcəyi ilə bağlı élan verilib: ”Qafqazşünaslıq İnstitutu “Qafqazda dövlətlərarası münasibətlər: 100 il əvvəl və müasir dövr” mövzusunda Beynəlxalq Elmi Konfrans keçirəcəyi ilə bağlı “Facebook”da və digər elektron vasitələrdə bir neçə dildə elan vermişdi. Elanda qeyd edilirdi ki, arzu edən dünya alimləri bu konfransda iştirak edə bilərlər. Ancaq biz rəsmi olaraq konkret hansısa dövlətin adına dəvət göndərməmişdik. Hansı alim bu konfransda iştirak etmək istəyibsə, gəlib konfransa qatılıb. Hətta onlar əvvəlcədən öz məruzələrini də bizə göndərmişdilər. Qonaqlarımız arasında Gürcüstandan, Şimali Qafqazdan, Türkiyədən və digər dövlətlərdən olan nüfuzlu alimlər vardı. Ancaq ermənilər konfransa qatılmayıblar”.

“Erməni alimləri konfransa qatılmaq istəsəydilər, onlara iştirak üçün şərait yaradılardımı”- deyə Q.Hacıyevdən soruşduqda, şöbə müdiri “Əlbəttə, iştirak etmək istəsəydilər, onlara da şərait yaradılardı. Ancaq ermənilərə rəsmi dəvət göndərməmişik. Dediyim kimi, konfransda iştirak edən alimlər bizim verdiyimiz elan əsasında konfransa qatılmışdılar. Bizim ermənilərə mənfi münasibətimiz onların bizə qarşı etdiyi hərəkətlərdən qaynaqlanır. Ermənilərin bizə münasibəti həddən artıq mənfidir və onlar bizə qarşı saxtakar əməllərlə məşğul olurlar. Erməni alimləri fürsət düşdükcə, özlərinə bəraət qazandırmalarına baxmayaraq, bizim alimlərlə siyasi mənada üz-üzə gəlməkdən çəkinirlər. Çünki həmişə yalan danışırlar. Hələ Sovet dövründə onlar saxta məqalələrlə, qondarma tədqiqatlarla bizim qarşımıza çıxanda həqiqətən də aciz vəziyyətdə qalırdılar. Ona görə ki, yazdıqlarının tamamilə yalan olduğunu bilirdilər. Erməni alimlərinin bu konfransa gəlməməsinin səbəbi yalanlarının bir daha dünya alimləri qarşısında ifşa ediləcəyi qorxusu ilə bağlıdır. Mənim moderatorluq etdiyim panellərdən birində Gürcüstandan qafqazşünas alimlər, professorlar da iştirak edirdilər. Mən onlara sual verdim ki, ermənilərin Cavaxetiyada törətdiklərinin onların Dağlıq Qarabağda törətdikləri qırğınlarla oxşarlıqlarını görürsünüzmü? Onlar mənə dedilər ki, bəli, elədir və XX əsrin əvvəllərində də, sonradan da Cənubi Qafqazda “Qafqaz evi” yaranardı, lakin ermənilər tərəfindən Qafqazın içində törədilən qırğınlar, məkrli hadisələr, təxribatlar dünən də buna imkan vermədi, bu gün də vermir. Konfransda iştirak edən alimlərin əksəriyyətinin məruzəsi Cənubi Qafqaz, Azərbaycan məsələsindən ibarət idi. Konfransda vurğulandı ki, Cənubi Qafqazda baş verən bütün münaqişələrin, təxribatların səbəbkarı qonşu dövlətlərə ərazi iddiası irəli sürən ermənilərdir. Ermənilər bilirdilər ki, konfransda iştirak edən alimlər onların saxtakarlığını açıb tökəcək, onların əməllərini ifşa edəcək, bu səbəbdən də onlar konfransa qatılmadılar. Ermənilər Dağıstanda “Sadval”ın üzvləri ilə əlbir olub özlərinə bəraət qazandırmaqdan başqa bir şey bacarmırlar. Ümumi Qafqazda erməni siyasətini bəyənən elə bir alim tanımıram. Təbii ki, erməni alimlərinin saxta fikirləri bəzi siyasi oyunbazların fikirləri ilə üst-üstə düşür, ciddi elm adamları onları qəbul etmirlər. Ancaq obyektiv alimlər bilirlər ki, Qafqazda təxribat törədən yeganə xalq ermənilər, yeganə dövlət isə Ermənistandır” - deyə bildirdi.

Q.Hacıyevin sözlərinə görə, konfrans iştirakçılarının məqalələri, məruzələri çap olunacaq, o nəşrlər müəlliflərə və kitabxanalara göndəriləcək.

Q.Hacıyev bildirdi ki, konfrans uğurla keçib və ölkə başçısının konfrans iştirakçılarına müraciəti də konfransın işinə böyük fayda verib. Mayın 23-də konfrans iştirakçılarının tədbir öncəsi Heydər Əliyevin məzarını ziyarət etdiyini qeyd edən Q.Hacıyev bildirdi ki, Azərbaycanın dövlət müstəqilliyinin memarı olan Heydər Əliyevin xatirəsi hər zaman elm ictimaiyyəti, xalqımız üçün əzizdir.

Q.Hacıyevin qeyd etdiyinə görə, AMEA-nın Qafqazşünaslıq İnstitutunun “Qafqazda dövlətlərarası münasibətlər: 100 il əvvəl və müasir dövr” mövzusunda keçirdiyi Beynəlxalq Elmi Konfrans Azərbaycan Xalq Cumhuriyyətinin 100 illiyinə böyük töhfədir.

İradə SARIYEVA

Bakı xəbər.- 2018.- 25 may.- S.11.