Bakıda miqyaslı hərbi sərgi – Azərbaycanın geosiyasi mövqelərini gücləndirən faktor...

“ADEX-2018” Azərbaycanın geosiyasi mövqeyinin möhkəmlənməsinə öz müsbət təsirini göstərir”

Bəhruz Quliyev: “Ölkəmizə göstərilən etimadın nəticəsidir ki, bir sıra dünya dövlətlərinin silah istehsalı ilə məşğul olan aparıcı şirkətləri...”

Bakı Ekspo Mərkəzində dünyanın 29 ölkəsindən 224 şirkətin iştirak etdiyi “ADEX-2018” üçüncü Azərbaycan Beynəlxalq Müdafiə Sərgisi hərbi sənayemizin qüdrətinin nümayişinə çevrilməklə bərabər, həm də bu tədbirin ildən-ilə daha geniş miqyas aldığını göstərdi. Azərbaycanın son illər hərbi sənaye kompleksinin stimullaşdırılması üçün həyata keçirdiyi iri layihələr ölkəmizdə beynəlxalq tədbirlərin, eləcə də müdafiə sərgisinin keçirilməsinə imkan verib.

Artıq 3-cü dəfədir Bakıda keçirilən Azərbaycan Beynəlxalq Müdafiə Sərgisində Azərbaycan və dünyanın iri müdafiə sənayesi şirkətləri öz məhsullarını nümayiş etdirirlər. Bu ondan xəbər verir ki, artıq ölkəmiz beynəlxalq hərbi sənaye sahəsində işgüzar görüş məkanına çevrilib. “ADEX-2018” 3-cü Azərbaycan Beynəlxalq Müdafiə Sərgisində MDB ölkələri ilə yanaşı, inkişaf etmiş dünya dövlətlərinin tanınmış şirkətləri öz məhsullarını nümayiş etdirdilər.

Prezident İlham Əliyevin təşəbbüsü və xüsusi diqqət ilə yaradılan, bu gün də inkişafı göz qabağında olan Müdafiə Sənayesi Nazirliyi Azərbaycanın hərbi texnologiyalarının inkişafını stimullaşdırır. Artıq Azərbaycan müdafiə sənayesi kompleksinin müəssisələrində PUA-lardan tutmuş, zirehli döyüş transportyorlarına qədər Silahlı Qüvvələrin tələbatına uyğun məhsullar istehsal olunur. Bundan başqa, Azərbaycan artıq bu sahədə ixracatçı ölkə kimi də inkişaf etməkdədir. Artıq Azərbaycanın istehsal etdiyi atıcı silahlar, müdafiə sənayesində istehsal olunan qurğular xarici ölkələrin ordularında istifadə edilir.

Bütün bunların fonunda, sözügedən sərgi Azərbaycanın dünyada geosiyasi mövqeyinin möhkəmlənməsinə hansı təsiri göstərəcək?

Məsələyə münasibət bildirən “Səs” qəzetinin baş redaktoru, politoloq Bəhruz Quliyevin fikrincə, sözügedən sərgi Azərbaycanın geosiyasi mövqeyinin daha da möhkəmlənməsinə öz müsbət təsirini göstərəcək: “Nəzərə almaq lazımır ki, Azərbaycan son illər hərbi sahədə böyük nailiyyətlər əldə edib. Ölkənin hərbi sənayesi uğurla inkişaf edir. Azərbaycan Cənubi Qafqazda hərbi sahə ilə bağlı böyük maddi-texniki bazaya malikdir. Azərbaycan Ordusu dünyada nüfuzlu ordulardan biridir. Azərbaycanda ordu quruculuğu, hərbi sənayenin inkişafı sahəsində böyük uğurlar əldə edilib. Ölkəmizdə istehsal olunan bir sıra müasir silahların “ADEX-2018” Beynəlxalq Müdafiə Sərgisində nümayiş olunması, əlbəttə ki, Azərbaycanın geosiyasi mövqeyinin möhkəmlənməsinə öz müsbət təsirini götərir. Azərbaycan hərbi sənayesinin ortaya qoyduğu məhsullar qəbul olunur. Bununla yanaşı, həm də sözügedən məhsullar təqdir olunur. Azərbaycan Qafqazda öz geosiyasi gücünü artırmaqla yanaşı, hərbi nüfuzunu da artırır. Reallıq ondan ibarətdir ki, Azərbaycanın hərbi-siyasi gücü ilə hesablaşırlar. 2016-cı ilin aprelində və 2018-ci ilin mayında Azərbaycanın keçirdiyi uğurlu hərbi əməliyyatlar bunu bir daha sübut etdi. Deməyim odur ki, bütün bunlar bir-birilə bağlı olan məsələlərdir. Hərbi gücün artması Azərbaycanın dünyada geosiyasi mövqelərinin möhkəmlənməsinə birbaşa təsir göstərir. Azərbaycana göstərilən etimadın nəticəsidir ki, bir sıra dünya dövlətlərinin silah istehsalı ilə məşğul olan aparıcı şirkətləri öz məhsullarını Bakıdakı sərgidə nümayiş etdirirlər. Azərbaycanın geosiyasi vəziyyəti belədir ki, regional dövlətlərin hər biri ilə bütün sahələrdə əməkdaşlıq edir. Azərbaycan regionda həyata keçirilən beynəlxalq layihələrin konkret olaraq təşəbbüskarı və təşkilatçısıdır. Eyni zamanda, siyasi cəhətdən artıq liderliyi ələ alıb. Qarşılıqlı münasibətlərin müsbət məcraya yönəldilməsi və yüksək inkişafı naminə ciddi işlər görülüb. “ADEX-2018” Beynəlxalq Müdafiə Sərgisi göstərdi ki, Azərbaycan siyasi, iqtisadi və hərbi qüdrəti olan bir dövlətdir”.

Vidadi ORDAHALLI

Bakı xəbər.- 2018.- 28 sentyabr.- S. 4.