Şərəfli və fədakar
ömür yaşadı...
Hörmət, ehtiramsız
bir anın olmur,
Kim deyər adını
tutanın olmur,
Şəhidlər tək bircə atanın olmur,
El çəkir bu
qəmi, bu dərdi, Zahid!
Bu
misralar şair Mədət Məhbubun Daxili Qoşunların şəhid zabiti baş leytenant Mahmudov Zahid Alı oğluna həsr etdiyi şeirdəndir. Həmin şeir 1996-cı ildə
“Dəli Kür” qəzetində dərc olunub. M.Məhbubun şəhid həmkəndlisi
haqqında qələmə
aldığı şeirdə
vurğulanan dəyişməz
bir həqiqət var - şəhidlər el yaddaşında heç vaxt unudulmur!Zahid Mahmudov 1955-ci il may ayının
18-də Qazax rayonunun Yuxarı Salahlı kəndində, Mahmudovlar ailəsində anadan olub. Bu kənd
bütün Azərbaycanda
məşhurdur. Belə
ki, dahi şairlərimiz Molla Pənah Vaqif və Səməd Vurğun Yuxarı Salahlıda dünyaya göz açıblar. Bir sıra digər
görkəmli şəxsiyyətlərimiz
də bu kənddə doğulublar.
Yuxarı Salahlı vətənpərvər ruhlu,
mənəvi dəyərlərimizə
bağlı olan insanların yaşadığı
yurddur.Şəhidin valideynləri
– Alı Mahmudov və Səmayə Mahmudova el-obasını sevən, zəhmətkeş,
xeyirxah insanlar kimi xatırlanırlar. Onlar övladlarını da bu ruhda
tərbiyə etmişlər.
Mahmudovlar ailəsində
üç oğul və bir qız
övladı dünyaya
gəlib. Bu övladlardan hər biri öz müsbət
keyfiyyətləri ilə
cəmiyyətdə hörmət
qazanıblar. Z.Mahmudov
Yuxarı Salahlı kəndinin orta məktəbinin məzunudur.
1972-1973-cü illərdə əmək fəaliyyətinə
başlayaraq o vaxtkı
M.P.Vaqif adına üzümçülük sovxozunda
işləyib. Sonra Bakı Rabitə Elektrotexnikumuna (hazırda Bakı Dövlət Rabitə və Nəqliyyat Kolleci) qəbul olunub. Burada rabitəçi peşəsinin sirlərinə
yiyələnib. Təhsili
ilə yanaşı əmək fəaliyyətini
davam etdirib. Belə ki, Respublika
Rabitə Nazirliyi (hazırda Nəqliyyat, Rabitə və Yüksək Texnologiyalar Nazirliyi) Bakı Şəhər Telefon Şəbəkəsində texniki
işə götürülüb.
1975-ci ildə isə Z.Mahmudov sovet ordusu sıralarına hərbi xidmətə çağırılıb. Xidmət
etdiyi hərbi hissə Ukraynada yerləşib. Səhhəti
ilə əlaqədar
olaraq hərbi xidmətdən vaxtından
əvvəl tərxis
edilib. Hərbi xidmətdən qayıtdıqdan
sonra texnikumda təhsilini bitirib.Onun çoxşaxəli əmək
bioqrafiyasının təhlili
göstərir ki, təyin olunduğu vəzifələrdə əzmlə
çalışıb, peşəkarlıq
səviyyəsinin artırılmasına
nail olub, üzərinə düşən
vəzifələrin icrasına vicdanla yanaşıb. Əmək
fəaliyyətinin qısa
bir müddəti
(1976-cı il) Sumqayıt
Xlorlu Üzvi Məhsullar Zavodu ilə bağlıdır.
Sonrakı mərhələdə
isə (1977-1992-ci illər)
rabitə sahəsindən
ayrılmayıb. Respublikamızın
Rabitə Nazirliyi Mərkəzi Telefon Rabitəsi İB-nin Telefon Qovşağında
ona müxtəlif məsul vəzifələr
həvalə olunub. Harada işləyibsə, rəhbərliyin etimadını
doğruldub. Bunu əmək kitabçasındakı
mükafatlar barədə
qeydlər də təsdiqləyir.Z.Mahmudov 1988-1991-ci illərdə milli azadlıq hərəkatının
fəallarından olub.
O, Azərbaycanın uğurlu gələcəyini
onun müstəqilliyə
qovuşmasında görürdü.
SSRİ rəhbərliyinin Qarabağ
məsələsində ermənipərəst
mövqeyinə etiraz səsini ucaltmaqdan çəkinmirdi. 1990-cı ilin
20 Yanvar hadisələri
zamanı ölüm təhlükəsi ilə
üz-üzə qalmışdı...1991-ci
ilin oktyabr ayının 18-də
Azərbaycanın öz
dövlət müstəqilliyini
elan etməsindən sonra müstəqil dövlət quruculuğu dövrü başladı.
O, bir rabitə mütəxəssisi kimi öz sahəsi üzrə respublikamızın
inkişafına töhfə
vermək əzmi və məramı ilə çalışırdı.
1992-ci ildən başlayaraq Dağlıq Qarabağ və ətraf rayonlara erməni hərbi təcavüzünün şiddətlənməsi
şəraitində respublikadaxili
vəziyyət gərginləşmişdi.
Xocalıda ermənilərin
törətdiyi soyqırım,
Şuşa və Laçının işğal
olunması Z.Mahmudovu da dərindən
sarsıtmışdı.1992-ci ilin iyun ayında DİN-in Daxili Qoşunlarına
hərbi xidmətə
qəbul olunmaq təklifinə tərəddüd
etmədən razılıq
vermişdi. O, təcrübəli rabitə
mütəxəssisi kimi
Daxili Qoşunların
Rabitə xidmətinin
rəisi vəzifəsinə
təyin olunub. Onun Daxili Qoşunlarda
rabitə sisteminin müharibə şəraitinin
tələblərinə uyğun
qurulmasında öz əməyini əsirgəmədiyi
xüsusi qeyd edilməlidir. Bacarıqlı bir mütəxəssis
kimi o, ön cəbhədə döyüş
əməliyyatlarına cəlb
olunan, habelə dövlətin ictimai təhlükəsizliyinin keşiyində
dayanan Daxili Qoşunlar üçün
rabitənin nə qədər mühüm əhəmiyyət kəsb
etdiyini tam məsuliyyəti ilə anlayır və bu yöndə
vəzifə borcunu fədakarcasına yerinə
yetirirdi.Baş leytenant
Z.Mahmudovun iş qeydləri apardığı
bloknotu vərəqlədim.
Bloknotdakı qeydlər
onun gərgin iş rejimində fəaliyyət göstərdiyini
təsdiqləyir. Həmin
dövrdə Daxili Qoşunların hərbi hissələri ön cəbhənin ayrı-ayrı
istiqamətlərində düşmənlə
vuruşurdular. Ağdam-Ağdərə
bölgəsində vəziyyət
xüsusilə ağır
idi. Baş leytenant Z.Mahmudov rabitənin təşkili ilə bağlı tədbirlərin görülməsi
üçün döyüş
zonasına da ezam olunur, vətənpərvər
bir zabit kimi çətin sınaqlardan çəkinmirdi.
1992-ci il avqustun
6-da o, Tərtər-Ağdərə bölgəsinə ezam olunub. Avqustun 7-də isə ermənilərin Ağdərə istiqamətindən
hücumu başlayıb.
Hərbi qulluqçularımız
hücumun qarşısının
alınmasına cəlb
olunublar. Möhrətaq
(hazırkı adı
Kiçik Qarabəy) kəndi ərazisində döyüş tapşırığını
yerinə yetirərkən
baş leytenant Z.Mahmudov düşmən artilleriyasının atəşi
altında mərmi qəlpələrindən ağır
yaralanaraq şəhid
olub. O, həmin döyüşdə ağır
yaralanmış əsgər
İsmayıl Mehdiyevi
ərazidən çıxarmağa
cəhd edib, lakin yaxınlıqlarında
mərmi partlayışı
onun həyatına son qoyub, İsmayıl
isə təkrar yaralansa da, sağ
qalıb. Bu gün İsmayıl
Qazax rayonunun Yuxarı Salahlı kəndində yaşayır,
I qrup əlildir. İsmayıl mənimlə
telefon söhbətində
şəhidi qorxmaz və qeyrətli bir zabit kimi
həmişə ehtiramla
xatırladığını söylədi.Daxili Qoşunların
veteranları Səfxan
Bayramov, Ramiz Abdullayev və Vüqar Bayramov şəhid haqqında söhbət zamanı onu
ləyaqətli, öz
şərəfini uca
tutan, vətənini və xalqını sevən, döyüş sınaqları qarşısında
iradəsini itirməyən,
peşəsini mükəmməl
bilən zabit kimi xarakterizə etdilər.Baş leytenant Z.Mahmudov Qarabağ müharibəsində Yuxarı
Salahlı kəndinin ilk şəhididir. Doğma yurdunda dəfn olunub.Azərbaycan Respublikası Prezidentinin
12.03.2009-cu il tarixli,
204 nömrəli Sərəncamı
ilə baş leytenant Z.Mahmudov ölümündən sonra
“Hərbi xidmətlərə
görə” medalı
ilə təltif olunub. Bundan əlavə, o, ölümündən
sonra Azərbaycan Respublikası Prezidentinin Fəxri Fərmanı ilə mükafatlandırılıb.
Şəhidin qardaşı Fazil Mahmudov onun hərbi
xidmət yolunu davam etdirib. Daxili Qoşunların sıralarından mayor hərbi rütbəsində
ehtiyata buraxılıb.
O, mənə danışdı
ki, anası şəhid qardaşının
köynəyini uzun illər heç kəsə göstərmədən
sandıqda saxlayıb.
Vəfatından əvvəl
öləndə oğlunun
köynəyi geyindirilərək
dəfn olunmasını
vəsiyyət edib. Dəfn zamanı bunu etmək mümkün olmasa da, şəhidin köynəyini kəfənin
içinə qoyublar.Şəhid
zabitin həyat yoldaşı Gültəkin
Mahmudova xarici dil müəlliməsidir.
Bakıda 212 saylı orta məktəbdə işləyir. O, ailə
başçısının ölümündən sonra
nə qədər əzablı olsa da, mənəvi gücünü toparlayaraq,
onun ocağını
yaşadıb, övladlarını
böyüdüb, onların
xoşbəxtliyi, dövlətimizə
gərəkli vətəndaş
kimi formalaşmaları
üçün zəhmətini
əsirgəməyib.Baş leytenant Z.Mahmudovun iki oğlu var.
Böyük oğlu
Zaur Mahmudov Dövlət İqtisad Universitetinin məzunudur, iş adamıdır.
Kiçik oğlu Anar
Mahmudov isə Dövlət Bədən Tərbiyəsi və İdman Akademiyasının
məzunudur. O, Daxili
Qoşunların zabitidir,
hərbi rütbəsi
baş leytenantdır.
“N” saylı hərbi
hissənin xüsusi təyinatlı dəstəsində
layiqincə xidmət edir. Onun ən böyük
arzusu atasının şəhidlik zirvəsinə
ucaldığı kəndi
və işğal altındakı digər yurdlarımızı düşmən
tapdağından azad edəcəyimiz günə
qovuşmaqdır. Hər iki
qardaş evlidir, övladları var. Şəhidin
oğul nəvələrindən
biri onun adını daşıyır.Onu
da qeyd edim ki, Yuxarı Salahlı kəndindəki
orta məktəb şəhid zabitin adını daşıyır.
Məktəbdə şəhidin adını
əbədiləşdirmək üçün xatirə
guşəsi yaradılıb.
Bu günədək dövri
mətbuatda şəhid
hərbi qulluqçumuz
haqqında bir sıra yazılar dərc olunub.
Qəbri nurla
dolsun!
Yalçın QAYA
Bakı
xəbər.- 2018.- 30 yanvar.- S.15.