Regionlarımızın daha
bir qalxınma göstəricisi – qədim abidələrin bərpası…
Azərbaycan tarixinin, milli
memarlığının nadir incilərindən olan türbələr
böyük mədəni irsdir. Mədəni irsimizin canlı
nümunələri olan türbələrə dövlət tərəfindən
hər zaman qayğı, diqqət göstərilir. Azərbaycan
dövlətinin səyləri nəticəsində respublika ərazisində
mövcud olan türbələr restavrasiya edilir. İndiyə
qədər bir neçə qədim tarixə malik türbə
bərpa edilərək əvvəlki vəziyyətinə gətirilib.
Bu günlərdə Bərdə türbəsində
aparılan təmir-bərpa işləri başa
çatıb.
Qeyd etdiyimiz kimi, ölkəmizdə tarix və
mədəniyyət abidələrinin təmir-bərpa
olunması, mühafizəsi və tədqiqi daim diqqət mərkəzində
saxlanır. Xalqımızın yaratdığı digər
maddi mədəniyyət nümunələri kimi, orta əsrlər
Azərbaycan memarlığının ən qiymətli abidələrindən
olan Bərdə türbəsi qayğı ilə əhatə
olunan tarix yadigarlarındandır.
Qeyd edək ki, türbənin bərpası Mədəniyyət
və Turizm Nazirliyinin sifarişi əsasında “Azərbərpa”
Elmi-Tədqiqat Layihə İnstitutu tərəfindən həyata
keçirilib. Mədəniyyət və Turizm
Nazirliyinin rəsmi saytında verilən məlumata görə,
bərpa prosesinə respublikanın tanınmış bərpaçıları,
həmçinin, İranın Ərdəbil şəhərindən
dəvət olunan mütəxəssislər cəlb edilib:
“1322-ci ildə inşa edilən türbənin üzərindəki
əski əlifba ilə həkk olunmuş yazılar sovet
hakimiyyətinin ilk illərində dağıdılaraq
yararsız hala salınıb. Bundan başqa,
1957-1958-ci illərdə aparılan təmir işləri
zamanı tarix və mədəniyyətimizə qənim kəsilmiş
erməni millətindən olan layihəçi, mühəndis
və bərpaçılar tərəfindən türbənin
günbəzinə betondan tonlarla çəkisi olan konusşəkilli
qüllə inşa edilib. Ağır beton abidənin
milli-tarixi görkəmini dəyişməklə
yanaşı, türbənin sol tərəfə maillənməsinə
səbəb olub. Odur ki, yeddi əsrin yadigarı olan abidənin
bərpasına ehtiyac yaranmışdı”.
Qeyd edilənə görə, türbənin ətrafında
yerləşən Torpaqqalada da bərpa və konservasiya
işləri görülüb. Hazırda abidənin bərpası
yekunlaşıb və ərazidə abadlıq işləri
görülür.
Nazirliyin saytı qeyd edir ki, Bərdə rayonu
tarixi memarlıq abidələri ilə zəngindir. Qeyd edək
ki, Bərdə türbəsi yeraltı və yerüstü
hissədən ibarətdir. Yeraltı hissəni o dövr
üçün xarakterik olan sərdabə təşkil edir.
Türbənin yerüstü hissəsi xatirə abidəsidir və
monumental xarakter daşıyır. Kürsülüyü
daşdan, gövdəsi isə silindrik şəkildə
bişmiş kərpicdən hörülüb. Damı
günbəz şəklindədir. Gövdəsinin xarici
diametri 10 metr, hündürlüyü isə 12,5 metr təşkil
edir. Türbənin divarları adi və üzərinə
firuzəyi rəngli kaşı çəkilmiş kərpiclərlə
üzlənib. Adi qırmızı kərpiclər
üfüqi, kaşılanmış kərpiclər isə
şaquli vəziyyətdə düzülüb. Bu cür orijinal
hörgünün kərpiclə düzülmüş
naxışlarında bütün gövdə boyu çoxlu
sayda “Allah” sözü yazılıb. Bu səbəbdən də
Bərdə türbəsinə xalq arasında “Allah-Allah
türbəsi” də deyilir. Abidənin gövdəsini örtən
yazılı səthdən sonra ornament, daha sonra isə bir metr
hündürlüyündə geniş kitabə
qurşağı yerləşir. Türbənin 700 ilə
yaxın yaşı olduğu bildirilir.
Qeyd etdiyimiz kimi, sovet hakimiyyətinin ilk illərində
türbənin üzərindəki əski əlifba ilə həkk
olunan yazılar dağıdıldığından, Bərdə
türbəsinin kimin şərəfinə ucaldıldığı
məlum deyil. Abidənin Elxanilər sülaləsinin üzvlərindən
biri üçün tikildiyi ehtimal edilir. Türbənin üzərində
“Əməli Əhməd bin Eyyub əl-Hafiz Əlbənnayi ən-Naxçıvani”
sözləri yazılıb. Bu isə tikilinin
naxçıvanlı memar Əhməd Əyyub oğlu tərəfindən
inşa olunduğunu göstərir.
Memar Talıb Məmmədovun sözlərinə
görə, Azərbaycanda mövcud olan qədim türbələrin
əsaslı şəkildə təmir-bərpa edilməsi
dövlətin mədəni irsimizin qorunmasına göstərdiyi
qayğının nəticəsidir. Memar vurğuladı ki, bu
türbələrin qiymətli abidələr kimi gələcək
nəsillərə ötürülməsi dövlətin
marağındadır: “Azərbaycan dövləti tarixi mədəniyyət
abidlərinin, qalaların, türbələrin restavrasiya edilməsini
həyata keçirir. Son bir neçə ildə bu sahədə
xeyli iş görülüb. Bir neçə türbə
artıq restavrasiya edilərək xalqımızın
ixtiyarına verilib. Qeyd edim ki, Azərbaycan ərazisində
mövcud olan türbələrə sovet illərində birmənalı
münasibət olmayıb, bu türbələrin bir çoxu
dağıdılıb, bəzilərinin üzərindəki
yazılar məqsədli şəkildə pozdurulub və s. Bu
gün isə o türbələr Azərbaycan dövlətinin
himayəsindədir. Dövlət mədəni irsimizin xəzinəsinə
daxil olan türbələri yenidən xalqımıza
qaytarır. Düşünürəm ki, bu çox müsbət
işdir. Əsaslı təmir və bərpa edilən
türbələr ölkəmizə gələn turistlər
üçün də böyük maraq doğurur. Onlar bu
türbələri ziyarət edərkən heyrətlənirlər.
Həm o türbələrin tarixi, gözəlliyi, yenidən
bərpa edilməsi onların diqqətini çəkir, həm
də dövlətin bu sahəyə böyük maraq göstərməsi
onların heyrətinə səbəb olur. Bilirsiniz ki,
respublika ərazisində Bərdə türbəsindən əvvəl
də bir neçə türbə restavrasiya olunub. Biz onlardan
Naxçıvanda yerləşən qədim Qarabağlar
türbəsini qeyd edə bilərik. Bilirik ki,
Naxçıvan qədim memarlıq abidələri ilə zəngindir.
Onu da vurğulayım ki, bu qədim diyar 2018-ci il
üçün “İslam mədəniyyətinin paytaxtı”
seçilib. Burada şəhərsalma mədəniyyətinin
5 min il yaşının olduğu artıq sübut edilib.
Naxçıvanda Azərbaycan memarlığının
özünəməxsus orijinal sənət üslubu
yaranıb. Bu üslub sonralar geniş yayılaraq
“Naxçıvan memarlıq məktəbi” adı ilə
tariximizə daxil olub. Bu yurdda tarixən Əcəmi Əbubəkr
oğlu Naxçıvani, Əmirəddin Məsud
Naxçıvani, Əhməd ibn Əyyub əl-Hafiz
Naxçıvani kimi dahi memarlar yetişib.
Məlumdur ki, Naxçıvan Muxtar
Respublikasında tarix və mədəniyyət abidələrinin
qorunması və bərpası istiqamətində
ardıcıl tədbirlər görülür. Naxçıvan Muxtar Respublikası Ali Məclisi sədrinin
“Naxçıvan Muxtar Respublikası ərazisindəki tarix və
mədəniyyət abidələrinin qorunması və
pasportlaşdırılması işinin təşkili
haqqında” 2005-ci il 6 dekabr tarixli sərəncamından sonra
tarix və mədəniyyət abidələri tədqiq edilərək
pasportlaşdırılıb. Abidələrin bərpası
da həyata keçirilən təqdirəlayiq işlər
sırasındadır. Son illər Naxçıvanqala,
Xanlıqlar kəndindəki Parçı imamzadəsi,
Gülüstan türbəsi, Əlincəqala və digər
onlarla abidə bərpa olunaraq ziyarətçilərin istifadəsinə
verilib. Zəngin tarixi-mədəni irsin
daşıyıcısı olan 1200-dən artıq tarixi abidənin
57-si dünya əhəmiyyətli abidələr
sırasındadır. Dünya memarlığının inciləri
siyahısına daxil edilən abidələr sırasında
Qarabağlar Türbə Kompleksi də yer tutur. Bu abidə orta
əsr Azərbaycan memarlığının nadir sənət
əsərlərindəndir.
Kəngərli rayonunun
Qarabağlar kəndində yerləşən və Azərbaycan
xatirə memarlığının mütərəqqi ənənələrini
yaşadan bu abidə memarlıq quruluşuna, oxşar cəhətlərinə
görə Əcəmi Naxçıvani memarlıq məktəbinin
davamı, memar Əhməd Naxçıvani
yaradıcılığının nümunəsi hesab
olunur. Naxçıvan Muxtar Respublikası Ali Məclisi
sədrinin “Qarabağlar Türbə Kompleksinin bərpası və
tədqiq olunması haqqında” 2016-cı il 4 iyul tarixli sərəncamına
uyğun olaraq, dünya əhəmiyyətli Qarabağlar
Türbə Kompleksində bərpa işlərinə
başlanıb. Türbədə bərpa işlərinin
elmi əsaslarla aparılması məqsədilə Azərbaycan
Milli Elmlər Akademiyası Naxçıvan Bölməsinin əməkdaşlarından
ibarət tədqiqat qrupu yaradılıb. Tarixi mənbələrin
verdiyi məlumata görə, Qarabağlar orta əsrlərdə
Azərbaycanın əsas şəhərlərindən biri,
mühüm ticarət və sənətkarlıq mərkəzi
olub. Qarabağlar ətrafında böyük
orta əsr yaşayış yerlərinin, karvansarayların
aşkar olunması onun tarixi İpək Yolunun üzərində
yerləşməsi ilə bağlıdır. Şəhərin
Yaxın Şərq ölkələri ilə Avropanı birləşdirən
mühüm karvan yollarının üstündə yerləşməsi
sayəsində burada sənətkarlıq, ticarət,
iqtisadi həyat xeyli tərəqqi etmişdi. Bəzi mənbələrin
məlumatlarına görə, şəhərin əsası
XII əsrdə Şirvanşah Mənüçöhr tərəfindən
qoyulub. Şəhərin Elxanilər dövründə
(1256-1353) salınıb inkişaf etməsi ilə də
bağlı məlumatlar var. Qarabağlar türbəsinin də
tikilməsi həmin dövrə təsadüf edir”.
Ekspert qeyd etdi ki, Qarabağlar Türbə
Kompleksi qoşa minarə, onlar arasındakı baştağ,
qoşa minarələrə birləşən dini binanın
qalıqları və türbədən ibarətdir. O
vurğuladı ki, mütəxəssislər qoşa minarələrin
XII-XIII əsrlərdə, baştağın isə XIV əsrdə
tikildiyini qeyd edirlər.
Məlumatımıza görə, Əlincəqala
tarixi abidəsi və Gülüstan türbəsinin bərpası
uğurla həyata keçirilib.
Mütəxəssis qeyd etdi ki,
Şəki abidələrinə də dövlət tərəfindən
diqqət göstərilir. Şəki sakinlərinin şəhərin
tarixi hissəsinin qorunmasını Azərbaycan dövlətinin
milli-mənəvi dəyərlərimizin, tarixi
keçmişimizin, maddi mədəniyyət abidələrimizin
qorunmasına yüksək
qayğısının bariz nümunəsi kimi dəyərləndirdiyini
vurğulayan memar bildirdi ki, son illər Azərbaycanın
regionlarının dinamik inkişafı fonunda ayrı-ayrı
bölgələrdə yerləşən tarixi mədəniyyət
abidələrinin qorunması və bərpası istiqamətində
görülən işlər təqdirəlayiqdir: “Prezident İlham Əliyevin siyasi iradəsinə
uyğun olaraq, respublikamızın bütün
regionlarındakı tarixi-dini və mədəniyyət abidələrinin
qorunması, təbliği və elmi cəhətdən
araşdırılması istiqamətində böyük
iş həcmi yerinə yetirilib və görülən məqsədyönlü
tədbirlərin nəticəsi olaraq ayrı-ayrı abidələrimiz
UNESCO-nun Dünya mədəni irs siyahısına daxil edilib.
Gəncədəki İmamzadə kompleksində
də əsaslı bərpa-yenidənqurma işləri həyata
keçirilib. Məlumatıma görə, Gəncədə
504 tarixi abidə siyahıya alınıb. Bunlardan 288-i dövlət
tərəfindən qorunur. VIII əsrə aid tarixi memarlıq
abidəsi - xalq arasında Göy günbəz, Göy məscid,
yaxud Göy İmam kimi tanınan İmamzadə kompleksi isə
Gəncə şəhərinin və bütövlükdə
ölkənin ən maraqlı memarlıq abidələrindən
biridir. Türbə bu kompleksin ən qiymətli abidəsidir.
Burada beşinci imam Məhəmməd Bağırın
oğlu İbrahim dəfn olunub. Memarlıq quruluşuna görə
türbənin XIV əsrin sonu - XV əsrin əvvəllərində,
ətrafındakı kompleksin isə XVII əsrdə tikildiyi
ehtimal edilir. Türbə sonralar ziyarətgaha çevrilib və
onun ətrafında müxtəlif binalar inşa edilib. Orta əsr Azərbaycan memarlığının dəyərli
nümunələrindən olan İmamzadə piri Şərqin
qədim karvan-ticarət yolunun üzərində yerləşib.
İmamzadə əsrlərdən bəri Azərbaycanın
müxtəlif bölgələrindən, eləcə də
başqa ölkələrdən gələn müsəlmanların
ziyarətgahına çevrilib. Bu dini abidə Gəncənin
qədimliyini sübut etməklə yanaşı, şəhərin
İslam aləmindəki yerini və nüfuzunu da göstərir.
Prezident İlham Əliyev bu abidə-ziyarətgahın da təmiri
və bərpası ilə bağlı xüsusi sərəncam
imzalayıb. Sərəncama əsasən, 2010-cu
ildən kompleksin əsaslı şəkildə yenidən
qurulması davam etdirilir. İmamzadənin bərpası və
təmiri üçün dövlət
başçısı İlham Əliyevin müvafiq sərəncamlarına
əsasən, Prezidentin ehtiyat fondundan 9 milyon manat, 2014-cü
ilin mayında isə daha 3 milyon manat vəsait ayrıldı.
Dövlət başçısı burada görülən
işlərlə şəxsən bir neçə dəfə
tanış olub, müvafiq tapşırıq və tövsiyələrini
verib”.
Qeyd edək İmamzadə türbəsində
bərpa işləri “Gəncəkörpütikinti-2” Səhmdar
Cəmiyyəti tərəfindən həyata keçirilib.
Mütəxəssislər
bildirirlər ki, Azərbaycan ərazisində mövcud olan
tarixi abidələrə, türbələrə dövlət
tərəfindən göstərilən həssas münasibət
o abidələrin gələcək nəsillərə layiqincə
ötürüləcəyini deməyə əsas verir.
Maddi-mədəni irsimizin dövlət səviyyəsində qorunmasının
böyük hadisə olduğunu vurğulayan mütəxəssislərin
fikrincə, bu abidələr dünya turistlərinin də diqqətini
cəlb edir.
İradə SARIYEVA
Bakı
xəbər.- 2017.- 31 yanvar.-
S.15.