Aşıq sənəti qanuniləşdirilir...

“Aşıq sənətinin qorunması haqqında” qanun Milli Məclisin payız sessiyasında qəbul ediləcək

Məhərrəm Qasımlı: “Bu layihədə aşıq sənətilə bağlı bütün məsələlər, məqamlar öz əksini tapıb”

“Bu, aşıq sənətinin qorunması, təbliği sahəsində etibarlı bir qanunvericilik bazası, istinad ünvanı olacaq”“Aşıq sənəti haqqında ayrıca qanunun olması zəruri məsələdir. Azərbaycan Aşıqlar Birliyi olaraq hər zaman bildirmişik ki, bu barədə qanun hazırlanmasına ciddi ehtiyac var. Bildiyiniz kimi, hazırda Milli Məclisin Mədəniyyət komitəsində aşıq sənətilə bağlı qanun layihəsi hazırlanıb.Layihənin hazırlanmasında Aşıqlar Birliyi yaxından iştirak edib. Azərbaycan Aşıqlarının VI Qurultayında belə bir qanun layihəsinin hazırlanması məsələsini gündəmə gətirdik və qurultaydan dərhal sonra bu istiqamətdə işə başladıq. Bu layihə aşıq sənətilə bağlı məsələlərin qanunla tənzimlənməsinə geniş imkan yaradacaq. Olduqca yüksək səviyyəli bir layihədir. Hesab edirəm ki, bu layihədə aşıq sənətilə bağlı bütün məsələlər, məqamlar öz əksini tapıb.Dövlətin aşıq sənətinin inkişafı üçün həyata keçirdiyi bütün proqram və tədbirlər təqdirəlayiqdir” - bunu “Bakı-Xəbər”ə Azərbaycan Aşıqlar Birliyinin (AAB) sədri, professor Məhərrəm Qasımlı Milli Məclisin Mədəniyyət komitəsi tərəfindən hazırlanan “Aşıq sənətinin qorunması haqqında” qanun layihəsinə münasibət bildirərkən deyib.M.Qasımlı onu da bildirdi ki, “Aşıq sənətinin qorunması haqqında” qanun layihəsi parlamentin payız sessiyasında qəbul ediləcək.AAB sədri onu da vurğuladı ki, layihədə əks olunan bütün maddələr aşıq sənətinin mövcud problemlərinin həll edilməsində mühüm rol oynayacaq. “Bu layihə ürəklə hazırlanıb. Yəni burada yer alan hər bir bənd, maddə aşıq sənətinin inkişafına xidmət edir. Bu gün müəyyən problemlər var ki, bu sahədə qanunvericilik bazası olmadığı üçün, biz onun qarşısını almaqda çətinlik çəkirik. Xüsusən də efir məsələsində. Qanun qəbul edildikdən sonra artıq bu problemlər geridə qalacaq. “Aşıq sənətinin qorunması haqqında” qanun qəbul edildikdən sonra bu, aşıq sənətinin qorunması, təbliği sahəsində etibarlı bir qanunvericilik bazası, istinad ünvanı olacaq” - deyə M.Qasımlı bildirdi.

İradə SARIYEVA

Bakı xəbər.- 2019.- 20 fevral.- S.15