Aşıq Ələsgər Muzeyinin “əsir edilmiş” eksponatları - Mədəniyyət Nazirliyindən giley-güzar…

Aşıq Ələsgər Muzeyinin yaradıcısı qəzetimiz vasitəsilə muzeyin bərpa edilməsi üçün ölkə başçısından kömək istəyir

img

Əslən Göyçə mahalından olan Hüseyn Həsənovun 2002-ci ildə şəxsi büdcəsi hesabına Bakıdakı mənzilində yaratdığı Aşıq Ələsgər Muzeyinin hazırkı taleyi narahatlıq doğurur. Bu barədə muzeyin yaradıcısı olan 92 yaşlı Hüseyn Həsənov Azərbaycan Respublikasının Prezidenti İlham Əliyevə, Birinci vitse-prezident Mehriban Əliyevaya, mədəniyyət naziri Əbülfəs Qarayevə və digər rəsmi şəxslərə ünvanladığı müraciətdə bildirir.

H.Həsənov sözügedən müraciətin bir nüsxəsini də qəzetimizə ünvanlayıb. “2002-ci ildə öz 5 otaqlı mənzilimdə Aşıq Ələsgər adına muzey yaratdım. Bu muzey 2018-ci ilə qədər Azərbaycan aşıq sənətinin zirvəsi olan Dədə Ələsgərin adına layiq bir muzey kimi fəaliyyət göstərdi. Muzey Nərimanov rayonu, Atatürk prospekti, bina 37, mənzil 75-də fəaliyyət göstərirdi. Mən muzeyi yaratdıqdan 3 il sonra Mədəniyyət Nazirliyinə və digər rəsmi qurumlara bu barədə məlumat verdim. Məni qəbul etməsi üçün mədəniyyət nazirinə müraciət etdim və o, 2007-ci ildə mənimlə görüşdü. Mədəniyyət Nazirliyinun Musiqi Mədəniyyəti Muzeyindən Rəna və Təranə adlı iki əməkdaşını mənzilimdə yaratdığım muzeyin fəaliyyəti, burada olan eskponatlarla tanış olmaq üçün evimə göndərdilər. Onlar 20 gün ərzində muzeydə topladığım bütün eksponatları, əşyaları siyahıya aldılar və nazirliyə təqdim etdilər. Mədəniyyət Nazirliyindən mənə müraciət etdilər ki, muzeyi dövlətə sat. Nazirlik məndən almaq istədiyi eksponatlara, ümumilikdə, 38 min manat qiymət qoymuşdu. Mən də onlara cavab verdim ki, bu muzey xalq üçündür və mənim onu satmaq niyyətim yoxdur, siz muzeyin dövlət statusu almasına və bina ilə təmin olunmasına yardım edin”.

H.Həsənov qeyd edir ki, muzeyə dövlət statusu verilməsi və ona ayrıca bina ayrılması ilə bağlı əlaqədar qurumlara etdiyi müraciətlər cavabsız qalıb. Mədəniyyət Nazirliyinin muzeyin fəaliyyət göstərməsi üçün heç bir dəstək vermədiyini deyən H.Həsənovun sözlərinə görə, muzey eksponatlarının, əşyalarının Azərbaycan Dövlət Musiqi Mədəniyyəti Muzeyində baxımsız qalması onu ciddi narahat edir. O, eksponatların ayrıca bir fondda yerləşdirilmədiyini də bildirir. Onun sözlərinə görə, nazirlik muzeyin eksponatları üçün ona 38 min manat pul ödəyib. Muzeyin yaradılmasına şəxsi büdcəsindən 75 min manat xərc çəkdiyini deyən H.Həsənovun yazdığına görə, 16 il ərzində 5 otaqlı mənzilini muzeyə həsr edib. “Mən bu muzeyi yaratmağa 75 min manat xərc çəkmişəm. Fəxr edirəm ki, belə bir muzey yaratmışam. Mən çəkdiyim xərci dövlətimizdən tələb etmirəm, bu vəsaiti şöhrətli adına bağışlayıram.

Mən eksponatlar, əşyalar satmamışam. Onu məndən təhvil alıb muzeyə apardılar və mənə 38 min manat pul ödədilər, həmin vəsaiti bank yolu ilə aldım. Mənim istəyim odur ki, həmin eksponatlar o muzeydə baxımsız vəziyyətdə qalmasın, Aşıq Ələsgər Muzeyi bərpa edilsin və ona dövlət statusu, ayrıca bina verilsin. Ümid edirəm ki, cənab Prezident 92 yaşlı bir ağsaqqalın arzusunun gerçəkləşdirilməsi üçün əlaqədar qurumlara tapşırıq verəcək”.

H.Həsənov bildirir ki, muzeyin dövlət statusu almasına və ona bina ayrılmasına nazirliyin bəzi əməkdaşları, o cümlədən də Mədəniyyət Nazirliyinin aparat rəhbəri Fikrət Babayev və Aşıqlar Birliyinin sədri Məhərrəm Qasımlı mane olub.

“Mən eşitdim ki, çox hörmətli Prezidentimiz İlham Əliyev cənabları Tovuz aşıq mühitinin görkəmli nümayəndəsi Hüseyn Bozalqanlı adına aşıq muzeyinin yaraılmasına 3 milyon manat vəsait ayrılması ilə bağlı sərəncam imzalayıb. Mən bunun üçün cənab Prezidentə öz təşəkkürümü bildirirəm. Hüseyn Bozalqanlı da Azərbaycanın ustad aşıqlarından biri olub. Amma unutmaq olmaz ki, Aşıq Ələsgər də aşıq dünyasının sultanıdır, günəşidir. Aşıq dünyasında hələ aşıq Ələsgər zirvəsinə qalxan olmayıb” -deyə H.Həsənov qeyd edir.

Məhərrəm Qasımlı: “Mənim o muzeyə nə maneçiliyim ola bilərdi ki?”

H.Həsənovun səsləndirdiyi ittihamlarla bağlı Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı ilə əlaqə saxladıq. M.Qasımlı “Bakı-Xəbər”ə açıqlamasında barəsində deyilənlərin həqiqətə uyğun olmadığını bildirdi.

“Mədəniyyət Nazirliyindən mənə bildirdilər ki, Hüseyn Həsənovdan evində saxladığı materiallar alınıb və ona bunun müqabilində 40 min manat ödənilib”

“Azərbaycan Aşıqlar Birliyinin elə imkanı, yeri, şəraiti yoxdur ki, orada muzey yaratsın. Mənim o muzeyə maneçiliyim ola bilərdi ki? Mənim bu məsələ ilə heç bir əlaqəm yoxdur. Elə bir muzey yoxdur. Mədəniyyət Nazirliyindən mənə bildirdilər ki, H.Həsənovdan evində saxladığı materiallar alınıb və ona bunun müqabilində 40 min manat ödənilib. O materialların isə əsasən köhnə vallar və aşıqların şəkillərinin surətləri olduğu deyilir. O əşyalar hazırda Azərbaycan Dövlət Musiqi Mədəniyyəti Muzeyindədir”.

Mədəniyyət Nazirliyindən və Azərbaycan Dövlət Musiqi Mədəniyyəti Muzeyindən isə H.Həsənovun səsləndirdiyi fikirlərlə bağlı məlumat ala bilmədik.

İradə Sarıyeva

Bakı xəbər.- 2019.- 3 may.- S.14