Əbülfəs Qarayevin “media tövsiyələrinə” sənət adamlarının reaksiyaları...

Azərbaycan mədəniyyətində, incəsənətində, ədəbiyyatında elə nəhəng simalar var ki, bəzən onlarla bağlı sosial şəbəkələrdə və yerli mediada xoşagəlməz yazılara, fikirlərə rast gəlirsən. Böyük sənətkarlarımızın şəxsiyyətinə kölgə salan və onlar haqqında yanlış təsəvvür yaratmağa xidmət edən bu yazılar əksər hallarda sensasiya naminə bəzi KİV-ə ayaq açır. Bəzi hallarda bir sənətkar haqqında başqa bir sənətkar öz müsahibəsində xoşagəlməz fikirlər səsləndirir.

Çoxlarımızın peşə təcrübəmizdə belə müsahiblər olub, lakin çoxlarımız o nəhəng şəxsiyyətlərin ruhuna ehtiram olaraq həmin ifadələri yazılarımızda əks etdirməmişik. Sözsüz, böyük insanın böyük, kiçik insanın kiçik nöqsanı olar. Bir də ki, o böyük sənətkarlar elə əsərlər, obrazlar, ifalar miras qoyub gediblər ki, onlar minillər yaşayacaq və xalqımızın mədəniyyət xəzinəsini daha da zənginləşdirəcək.

Mədəniyyət naziri Əbülfəs Qarayev sentyabrın 12-də Muzey Mərkəzində teatr-konsert müəssisələrində yeni mövsümün açılışına həsr olunmuş brifinqdə bu məsələyə toxunaraq deyib ki, media nümayəndələri görkəmli mədəniyyət və incəsənət xadimləri, böyük şəxsiyyətlər haqqında yazarkən ehtiyatlı olmalıdırlar.

Bununla bağlı media nümayəndələrinə də çağırış edən nazir bildirib ki, bunu əsasən sensasiya xatirinə edirlər: “Bəzən mediada sensasiya xatirinə bir material, kiminsə haqqında mənfi fikrin səsləndirilməsi, əslində, bizim bədxahlarımıza mövzu vermiş olur. Sənət adamlarının hər biri xalqımızın mənəviyyatı üçün çalışırlar, yaradıcılıq üslubları, əsərləri fərqli olsa da. Misal olaraq, bütün rəssamlar eyni cür rəsmlər çəkməlidir? Ancaq kimsə pisdir deməklə nə əldə olunur? Hər musiqiçi eyni tərzdəmi ifa edir? Hər kəsin zövqü fərqlidir. Tənqid də peşəkarlığa əsaslanmalıdır. Daxili etik senzuranı da dinləmək lazımdır. Kiminsə dediyini olduğu kimi yazmaqla iş bitdi demək olmaz. Unutmayaq ki, bizi istəməyən qüvvələr bizi öz silahımızla vurmağa çalışırlar” - deyə nazir qeyd edib.

Baba Vəziroğlu: “...media öz əsərləri, ifaları, obrazları ilə Azərbaycan mədəniyyətində, xalqımızın yaddaşında iz salan mədəniyyət, incəsənət xadimlərinin xatirəsinə həssaslıqla və ehtiramla yanaşmalıdır”

Əməkdar incəsənət xadimi, görkəmli şair Baba Vəziroğlu “Bakı-Xəbər”ə bildirdi ki, Azərbaycan mediasında bəzi hallarda tarixi şəxsiyyətlərlə, görkəmli elm, mədəniyyət, incəsənət, ədəbiyyat xadimləri ilə bağlı yazılar hazırlanarkən onların şəxsi keyfiyyətləri qabardılır, çox zaman onların xarakterindəki mənfi çalarlar önə çıxarılır. “Çox təəssüflər olsun ki, bəzən media mənsubları Azərbaycanın böyük şəxsiyyətləri haqqında yazarkən diqqətli olmurlar. Bəzən görürsən ki, elə insan haqqında onun cəmiyyətə məlum olmayan elə xarakterini qeyd edirlər, adam məəttəl qalır. Bu kimə lazımdır? Bu mənada, mədəniyyət naziri Əbülfəs Qarayevin tövsiyəsini dəstəkləyirəm. Nazirin çağırışı haqlı tövsiyədir və media öz əsərləri, ifaları, obrazları ilə Azərbaycan mədəniyyətində, xalqımızın yaddaşında iz salan mədəniyyət, incəsənət xadimlərinin xatirəsinə həssaslıqla və ehtiramla yanaşmalıdır. Bircə qüsursuz Allahdır. Hər bir insanın isə qüsuru, nöqsanı olur. Böyük şəxsiyyətlərin sənətlərinə qiymət vermək lazımdır, onların şəxsi keyfiyyətlərinin qabardılması düzgün deyil. Ümumiyyətlə, sənətkarı uzaqdan müşahidə edəndə onu qüsursuz görürsən, çünki onun sənəti qüsursuz, nöqsansızdır. Hesab edirəm ki, media, jurnalistlər tarixi şəxsiyyətlər, mədəniyyət və incəsənət xadimləri haqqında yazarkən onların şəxsi keyfiyyətlərinə toxunmamalıdırlar. Media nümayəndələri yazarkən çalışmalıdırlar ki, görkəmli mədəniyyət-incəsənət xadimlərinin şəxsiyyətinə toxunacaq, ruhlarını incidəcək hansısa fikrə yer verməsinlər. Ümumiyyətlə, media heç bir böyük şəxsiyyətin şəxsi keyfiyyətlərini təftiş etməməlidir. Elə müqəddəs dəyərlər, şəxsiyyətlər var ki, onları təftiş etmək olmaz” - deyə müsahibimiz bildirdi.

Roza Cəlilova: “Nazirin mediaya çağırışını dəstəkləyirəm”

Xalq artisti, görkəmli rəqs ustası Roza Cəlilova da hesab edir ki, Azərbaycan mədəniyyətini, musiqisini, rəqsini, ədəbiyyatını yaradan dahi şəxsiyyətlər haqqında yazılarda onların sənətləri, sənətdə qoyduqları izlər qabardılmaldır. “Əbülfəs müəllim həmişə mədəniyyət xadimlərinin, incəsənət ustalarının qədir-qiymətini bilib, onlara böyük dəyər verib. Nazir yalnız həyatda olan korifeylərin, mədəniyyət və incəsənət xadimlərinin qeydinə qalmır, həm də dünyasını dəyişmiş şəxsiyyətlərin xatirəsini əziz tutur. Çox zaman mətbuatda bəzi həmkarlarımız haqqında xoşagəlməz fikirlər yer alır, onların şəxsi keyfiyyətləri müzakirə edilir. Mən bunu qəbul etmirəm. Böyük sənətkarlar özlərindən sonra tükənməz xəzinə qoyub gediblər. Nazirin mediaya çağırışını dəstəkləyirəm və hesab edirəm ki, o bu çağırışı zamanında edib” - deyə R.Cəlilova vurğuladı.

İradə SARIYEVA

Bakı xəbər.- 2019.- 14-16 sentyabr.- S.12