“Şərq Bülbülü”nün triosu

Prezident İlham Əliyevin sərəncamı ilə fəxri ada layiq görülən mədəniyyət xadimləri arasında muğam ifaçısı Simarə İmanova da var. O, Azərbaycan mədəniyyətinin inkişafındakı xidmətlərinə görə Xalq Artisti fəxri adı ilə təltif olunub. Həyatı və yaradıcılığı haqqında “New Baku Post”a müsahibə verən xanəndə təəssüratlarını da ilk olaraq bizimlə bölüşüb.

– Təbrik edirik. Fəxri ada layiq görüldüyünüz xəbərini ilk olaraq kimdən eşitdiniz?

– Xalq Artisti Zabit Nəbizadə zəng etdi, xoş xəbəri dedi. Zabit Nəbizadə də Xalq Artisti adına layiq görüləndə bu xəbəri ona mən demişdim. Çox sevindim.

– Xalq Artisti kimi hansı yeni planlarınız var?

– Xalq və bəstəkar mahnıları, muğamlarımızdan ibarət 8-ci albom üzərində çalışırıq. 2010-cu ildə Filarmoniyada “Yar bu gecə” adlı solo konsertim oldu. Bu il daha bir solo konsert vermək niyyətindəyəm.

– Sizi müşayiət edən “Şərq bülbülü” triosudur...

– “Şərq bülbülü” ansamblında tarda Ramin Rzayev, kamançada Anar Yusup, nağarada Novruz Kərimov müşayiət edir. “Şərq bülbülü” mənə məxsus olduğundan bu adı götürdüm. Özbəkistanda “Şərq təranələri” Festivalında mənə təqdim edilən Qran-pri mükafatının adı “Şərq bülbülü”dür.

– Repertuarınız haqqında nə deyə bilərsiniz?

– Repertuarımda Şəfiqə Axundova, Ramiz Mirişli, Cahangir Cahangirov, Emin Sabitoğlu, Fikrət Əmirov kimi məşhur bəstəkarların mahnıları da var. Onların milli üslubda yazdıqları mahnılar hər zaman dinlənilir və xalq mahnıları kimi sevilir. İfa etdiyim bütün mahnılar dərya kimidir. Oxuyanda özümü dəryadakı balıq kimi hiss edirəm.

– Mədəniyyət və İncəsənət Universitetində pedaqoji fəaliyyətlə məşğul olursunuz...

– Xalq Artisti Canəli Əkbərovun başçılıq etdiyi muğam kafedrasında bir istilik var. Bu bizim universitetə rəhbərlik edən Timurçin Əfəndiyevdən irəli gəlir. Mən də əlimdən gələni etməyə çalışıram. İstedadlı tələbələrimiz var. Azərbaycan muğam ocağıdır. Çünki anamız “Segah” üstündə bizə lay-lay çalıb.

– Sizdə bu istedadı kim kəşf etdi?

– Rəhmətlik dayım Əməkdar Artist Sabir Novruzov çox gözəl səsə malik muğam ifaçısı olub. Anamın babası da gözəl tarzən idi. Ailəmiz musiqiyə meyilli olub. Lakin valideynlərim bu sənətə gəlməyimə razı deyildi. Anadan olduğum İmişli rayonunun Əliqulular kəndində o vaxt heç bir valideyn övladının musiqi ilə məşğul olmasını istəmirdi, qızlara isə qadağalar vardı. Onlar məni həkim görmək istəsələr də, mənim arzum muğam ifaçısı olmaq idi.

Sənədlərimi Tibb Universitetinə vermək adıyla İmişlidən Bakıya gəldim. Evdə heç kimin xəbəri olmadan Asəf Zeynallı adına musiqi kollecinə imtahan verib qəbul oldum. Bu işin üstü açılanda tufan qopdu. Ancaq sonradan ata-anamı elə ilk pərəstişkarıma çevirdim. Sonra Mədəniyyət və İncəsənət Universitetinə qəbul olundum. Buranın bakalavr və magistratura pilləsini bitirdim.

– Xanəndələrimizin əksəriyyəti Opera və Balet Teatrının solistidir. Siz də bir neçə dəfə “Leyli və Məcnun” tamaşasında oynamısınız. Niyə bu davamlı olmadı?

– Gənc yaşlarımda müqavilə ilə Opera və Balet Teatrında “Leyli və Məcnun” tamaşasında iştirak etdim. Ailə qurandan sonra gördüm ki, ailəmə ayırmağa vaxtım qalmır. İndi dəvət gəlsə, sözsüz ki, gedərəm.

– Simarə İmanovanın əhvalı olmayanda nədən təsəlli alır?

– Dənizi çox sevirəm. Əhvalım olmayanda dənizi seyr etmək istəyirəm, mavi sulara, ləpələrə baxanda ağrılarımı, kədərlərimi unuduram. Oğlum Məhəmməd, qızım Çinarə ilə təsəlli tapıram. Ən gözəl istirahəti ailəmlə edirəm. Onlarsız qanadsız quşam.

Ümidə Həsənli

Baku Post .- 2012.- 22 sentyabr.- S. 16.