Yaponiyanın azərbaycanlı həkimi
Dünyada 20 milyona yaxın insan böyrək çatışmazlığı xəstəliyindən əziyyət çəkir. Elə təxminən bu qədəri də risk altındadır. Həkimlər çıxış yolları axtarırlar. Yaponiyada tibbi təhsil almış, hazırda Yaponiya Tibb Akademiyasının fəlsəfə doktoru Elnur Fərəcov Azərbaycanda da böyrək xəstəliklərini azaltmaq üçün olduqca maraqlı təkliflərlə çıxış edir. Nefroloq E.Fərəcov Azərbaycan Tibb Universitetini bitirib. İnternatura dövründə Parisdə bir xəstəxanada təcrübə keçmək imkanını dəyərləndirib.
– Elə həmin vaxt Qərb
və köhnə sovet təbabəti
arasında böyük bir
uçurum olduğunu
gördüm. Ona
görə də nəyin bahasına olursa-olsun
təhsilimi xaricdə davam etdirmək qərarına
gəldim. 2003-cü ildə Yapon dövləti
tərəfindən ayrılan təqaüd proqramını qazandım.
Sendai şəhəri, Tohoku
Universitetində həm təhsilimi davam etdirdim, həm də rezidentura
keçdim. Bu universitet imperatorun təsis etdiyi təhsil müəssisəsidir, qədim
tarixə malikdir. Universitet məzunları
sırasında kimya üzrə Nobel laureatı
var. 2009-cu ildə Azərbaycana
qayıtdım və Mərkəzi Neftçilər
Xəstəxanasında işə
başladım.
Burada ilk milli transplantasiya
komandasına qoşuldum.
Həmin
ərəfədə Türkiyədə
– əvvəlcə İzmirdə,
daha sonra dünyada ən çox transplantasiya edilən Antalyadakı
“Medical Park”da təlim
keçdim. Bu xəstəxanada ildə
500-550 böyrək köçürülməsi
reallaşdırılır.
– Müxtəlif ölkələrin
təcrübəsi ilə
yaxından tanışsınız.
Bəlkə elə əvvəlcə Yaponiyadan
danışaq. Yapon və Azərbaycanda səhiyyə sahəsində
hansı köklü fərqlər var?
– Fərqlər böyükdür.
Amma fərqlər xəstələrin sayında
yox, onların vaxtında müalicə alması, sağalması,
yaşayış ömrü,
orta ömür həddindədir. Məlum
olduğu kimi, əhalinin orta yaş həddinə görə Yaponiya öndədir. Bu da səhiyyənin inkişaf
göstəricisidir. Yaponiyada
125 milyon əhali sayına görə 128
min hemodializ müalicəsini
qəbul edən xəstə var, bəlkə də bu ölkədə daha çox dializ xəstəsi ola bilərdi. Amma Yaponiyada bu sahədə xüsusi bir proqram icra edirlər.
Çox sadə, amma effektiv bir
proqramdır. Sadəcə,
işə qəbul olan, universitetlərə daxil olan, məktəblərə
girən, hətta bəzən uşaq bağçalarına qəbulda
da sidiyin ümumi analizi tələb olunur. Bu, böyrək xəstəliklərini
erkən aşkarlamağa
imkan verir.
Axı, dializ – böyrək çatışmazlığı xəstəliyinin müalicəsində
son çıxış yolu,
məcburi bir mərhələdir. Böyrək
xəstəlikləri 90-95 faiz
hallarda özünü
büruzə vermir.
– Yəni, adi sidik analizi ilə
xəstəliyin inkişafının
qarşısını almaq
mümkündür?
– Bəli, çünki xəstəlikdən 7-8 il əvvəl, hətta 10 il əvvəl böyrəkdə
dəyişiklik olur. Bu dəyişikliyi analizin nəticəsindən
görmək mümkündür.
Bizdə
təəssüf ki, həkimlər əksər
hallarda sidik analizi tələb etmirlər. Qanın ümumi analizini
hamı istəyir, sidiyi isə yox. Analizdə zülal, leykositin,
bəzi hallarda qanın olması artıq dəyişiklikdən
xəbər verir.
Bu, çox tez,
başlanğıc mərhələdə
aşkarlanır. Onda xəstə
də yaxşı müalicə olunur və yüngül dərmanlar yazılır.
Xəstəyə verilən
dərmanın miqdarı
da az
olur, yan təsirləri də. Böyrək qorunur və bu adama nə böyrək
köçürülməsi ehtiyac olmur, nə də dializ xəstəsinə çevrilmir. Beləliklə, çox ucuz
bir müayinə çox böyük fəsadların qarşısını
alır.
Mən bilirəm ki,
Azərbaycanda tibbi sığorta sisteminin olmaması, xəstənin
vaxtında həkimə
müraciət etməməsi
bu prosesin pisləşməsinə səbəb
olur. Ona görə də
həmkarlarımla yanaşı,
əhaliyə müraciət
etmək istəyirəm
ki, özləri analiz versinlər. Yaxud, apteklərdə hazır
strip-testlər vasitəsilə
evdə də analiz keçirmək olar.
Bu proqramın
tətbiqi həmçinin
iqtisadi baxımdan da sərfəlidir. Çünki dializ bahalı
müalicədir, dövlət
üçün ağır
yükdür. Hazırda rəsmi
rəqəmlərə görə,
bir dializ xəstəsinin saxlanması
dövlətə ildə
16 min manata başa gəlir. Nəzərə almaq lazımdır
ki, bir xəstə
illərlə dializdə
qalır. Digər tərəfdən,
xəstənin həyat
səviyyəsi aşağı
düşür, əmək
fəaliyyəti pozulur,
əlil statusu alır, kiminsə qulluğuna ehtiyacı olur.
– Bəs, böyrək çatışmazlığı olan xəstələrin müalicəsində alternativ
variant yoxdur?
– Böyrək çatışmazlığı
olan insanı yaşatmaq üçün
2 yol var: ya dializ, ya
da köçürmə.
Bu zaman həm
iqtisadi baxımdan, həm yaşamaq müddəti, həm həyat keyfiyyəti baxımından böyrək
transplantasiyası daha
sərfəlidir. Əslində, hemodializlə müqayisədə
transplantasiya insan ömrünü 3-4 dəfə
artırmış olur.
Köçürmə aparılan insan
əlillik statusundan çıxır, sağlam
insan kimi cəmiyyətə qayıdır.
Köçürmə böyrəklə yaşayan, işini davam etdirən bir neçə məşhur idmançı
var. Azərbaycanda gimnastika
üzrə milli komandanın üzvü Ləman Hacızadə transplantasiya olunsa da, karyerasını uğurla davam etdirir.
Bu bir neçə il
ərzində Mərkəzi
Neftçixlər Xəstəxanasında
55 böyrək, 39 qaraciyər
köçürmə əməliyyatı
aparılıb. MDB-də ilk dəfə olaraq bir xəstədə
həm qaraciyər, həm də böyrək köçürülməsini
həyata keçirmişik.
8 yaşlı uşaqda da transplantasiya uğurlu olub. Uşaqlar birmənalı olaraq
hemodializə getməməlidir.
Çünki onlar məktəbdən
məhrum olur, inkişafdan geri qalır.
– Azərbaycanda böyrəyində
problemləri olanlar daha çox ot, bitki
çaylarına üstünlük
verir. Doğrudanmı, böyrək müalicəsində
türkəçarələrin köməyi olur?
– Böyrəklə bağlı
problemlərdə həkimə
müraciət mütləqdir.
Xəstəyə adi görünən narahatlıq
ciddi xəstəliyin bünövrəsi ola bilər. Yaponiya Şərq ölkəsi olsa belə, heç orada da türkəçarə,
alternativ təbabətdən
çox istifadə olunmur. Əgər Şərq təbabəti
effektiv olsaydı, Qərb təbabəti belə geniş yayılmazdı. Elə Çinin
özündə də
müasir kliniki, elmi araşdırma nəticəsində ortaya
çıxan müalicəyə
üstünlük verirlər.
Axı, hər hansı bir dərman heçdən yaranmır,
xeyli araşdırmalar
sayəsində ortaya çıxır.
– Yeri gəlmişkən, təhsil aldığınız
Sendai şəhəri, deyəsən,
zəlzələnin episentri
olmuşdu?
– Mən ora ayağımı
qoyduğum andan orada böyük bir zəlzələ gözlənməsi haqda xəbərdarlıqlar olunurdu.
Orada olduğum illərdə 30-a yaxın
zəlzələ keçirmişəm,
ən yüksək olanı 6,5-7 bal idi. 3 aydan bir stabil olaraq
zəlzələ olurdu.
Uzun müddət yer titrəməyəndə, artıq
insanlar həyəcanlanmağa
başlayırdı. Çünki hamı güclü zəlzələni gözləyirdi.
Sendai kiçik, amma çox gözəl, mənzərəli
yerləri olan bir şəhərdir.
Mən bu şəhərin dağıntıdan sonrakı
halını görəndə
çox pis oldum.
Lakin yaponlar öz
intizamlı davranışlarına,
hər şeyə hazırlıqlı olduqlarına
görə Sendaini tezliklə bərpa edə bildilər. Yaponların əsas xüsusiyyəti işlərinə məsuliyyətli
yanaşmasıdır. Hər kəs bilir ki, bu ölkədə
istehsal olunan hər hansı bir məhsul mütləq keyfiyyətli
olur. Onlar hər işlərini
keyfiyyətli görməyə
məcburdurlar, bu, onlar üçün həyat tərzinə çevrilib.
P.S. Facebook-da axtarış yerinə
nefroloq.az yazmaqla Elnur Fərəcovun xüsusi səhifəsinə daxil olmaq mümkündür. Yaponiyada təhsil almış tibb alimi orada
oxucuları maraqlandıran
suallara cavab verə bilər.
Fərəh Sabirqızı
Baku Post.-2013.-18 may.-S.11.