Avstriyada intellektual səfərbərlik

10 il bundan əvvəl bir qrup azərbaycanlı gəncin təşəbbüsü ilə Avstriyada “Azərbaycan Akademik Birliyi” Cəmiyyəti yaradılıb. Qurumun sədri, hazırda Vyanada təhsil alan Elvin Süleymanov deyir ki, bu müddət ərzində təşkilat Azərbaycanın tanıdılması, diaspor qurumlarının əlaqələndirilməsi baxımından çoxlu iş görüb. E.Süleymanovla söhbətimiz zamanı həm Cəmiyyətin fəaliyyəti, həm də Avstriyadakı azərbaycanlı tələbələr barədə danışdıq.

– Avstriyadan qabaq Almaniyada təhsil almısınız, bu, necə oldu?

– Mən hələ orta məktəbdə oxuduğum illərdə “Şagird mübadiləsi” proqramı çərçivəsində 1 il Almaniyanın Münhen şəhəri yaxınlığındakı “Schloss Neubeuern” liseyində təhsil almışam. Azərbaycana dönəndən 1 il sonra Azərbaycan Dövlət İqtisad Universitetinə daxil oldum. Elə həmin il sınaqlardan uğurla keçib Vyana Universitetində Beynəlxalq idarəçilik fakültəsinə qəbul oldum. Hazırda Vyana Universitetində magistr pilləsində təhsilimi davam etdirirəm. Bununla yanaşı, digər bir ali təhsil ocağında – yenə də Avstriyada fəaliyyət göstərən Beynəlxalq Universitetdə (İnternational University) bakalavr pilləsində təhsil almışam. Təhsillə yanaşı, həm də işləyirəm. Avstriya və Slovakiyada fəaliyyət göstərən şəxsi firmada icraçı direktor vəzifəsində çalışıram.

– Azərbaycan Akademik Birliyi öz ətrafında kimləri və hansı məqsədlə birləşdirir?

– Ötən il Azərbaycan Akademik Birliyinin (ASAV) 10 illik yubileyini qeyd etdik. Bu müddət ərzində çoxsaylı tədbirlər həyata keçirtdik və uğurlar əldə etdik. Cəmiyyətimiz 2002-ci ildən etibarən fəaliyyət göstərir. ASAV tələbə-gəncləri özündə birləşdirən ictimai təşkilatdır. Təşkilatın əsas məqsədi Azərbaycanı Avstriyada, həmçinin digər ölkələrin tələbə-gəncləri arasında tanıtmaq, Azərbaycanın tarixi, ədəbiyyatı, mədəniyyəti və incəsənətini təbliğ etməkdir. Məqsədlərimiz sırasında Avstriyada fəaliyyət göstərən gənclər təşkilatları ilə əməkdaşlıq, onlarla informasiya və tələbələrin mübadiləsini təşkil etmək, həmçinin Dağlıq Qarabağ münaqişəsi ilə bağlı həqiqətləri, Ermənistanın işğalçılıq siyasətini Avstriya ictimaiyyətinə, dünyaya çatdırmaqdır. Bu prinsiplərlə fəaliyyət göstərən ASAV müxtəlif ölkələrin, o cümlədən Avstriyanın ictimai qurumlarının iştirakı ilə forumlar keçirir. Mən artıq 2 ildən artıqdır ki, bu təşkilata sədrlik edirəm.

– Bu keçən 10 illik dövrə baxanda Azərbaycan Akademik Birliyinin hansı nailiyyətlərindən danışmaq olar?

– Uğurlarımız danılmazdır. Artıq birliyimizin nəinki azərbaycanlılar, hətta bir sıra xarici ölkələrin vətəndaşları da olmaqla 100-dən çox üzvü var. Ötən ilin martında “Ermənistan Azərbaycan, Dağlıq Qarabağ münaqişəsi: ATƏT-in Minsk Qrupunun 20 illik ildönümü” mövzusunda konfrans keçirmişdik. Vyanadakı Vebster Universitetində təşkil olunan bu tədbirdə ATƏT-də akkreditə olunmuş xarici diplomatlar və Avstriyada təhsil alan azərbaycanlı tələbələr Dağlıq Qarabağ münaqişəsinin tarixi aspektlərindən, ATƏT-in Minsk Qrupunun fəaliyyəti barədə, danışıqlar prosesinin hüquqi, humanitar və digər aspektləri ətrafında müzakirələr apardılar. Təbii ki, davamlı olaraq 20 Yanvar hadisələri və Xocalı soyqırımına aid tədbir və yürüşlər təşkil edilib. Bu amansız əməlləri özündə əks etdirən filmlər nümayiş etdirilib. Biz bu tədbirləri keçirməzdən əvvəl Avstriyanın siyasi və ictimai təşkilatlarına məktubla müraciət etmişdik.

Bu tədbirlərlə yanaşı, Cəmiyyət tərəfindən mütəmadi olaraq ölkəmizin əlamətdar günləri və milli bayramları münasibətilə mədəniyyət günləri təşkil olunur. Belə günlərdə əsasən, ölkəmizin milli adət-ənənələri, milli dəyərləri, tarixi xarici vətəndaşlara izah olunur və geniş təbliğ olunur.

– 2013-cü il üçün hansı planlarınız var?

Biz tələbə-gənclər olaraq xarici ölkədə Azərbaycanın mədəniyyəti, ədəbiyyatı, tarixi və incəsənətini, milli dəyərləri təbliğ etməkdən qürur duyuruq və bundan sonra da bu istiqamətdə fəaliyyətimizi davam etdirəcəyik. Xüsusilə Dağlıq Qarabağla bağlı həqiqətləri bir vətəndaş kimi dünya ictimaiyyətinə çatdırmaqdan heç zaman usanmayacağıq. Bununla bağlı artıq Cəmiyyətin yeni tədbirlər planı hazırlanır. Bu 10 il ərzində bizə göstərdiyi köməyə, diqqət və qayğıya görə Azərbaycan Respublikasının Avstriyadakı səfirliyinə xüsusi təşəkkürümüzü bildirmək istəyərdim.

Fərəh Sabirqızı

Baku Post.-2013.-16 yanvar.-S.-8.