Sənət, zaman
və məkan
Yaradıcılıq
üçün hansı yaş həddi yetkin sayıla bilər?
Bu suala hələ ki, tutarlı cavab tapılmayıb. Yəqin
ki, tapılsaydı, qəribə olardı. Çünki
yaradıcılıq, fəaliyyət növü kimi, öz
cazibə və sirlər qutusunu hər kəs üçün
həyatın ən gözlənilməz anında
açır. Peşəkar rejissor, bu gün 60
yaşını qeyd edən Namiq Qurbanovla söhbətimiz bir
daha təsdiqlədi ki, yaş anlayışı
yaradıcı insanlarda tam nisbidir.
Həmsöhbətim
həyatının 40 ilini yaradıcılığa həsr
edib. Hər zaman kamera arxasında olan N.Qurbanov televiziya rejissoru kimi tanınır. Sankt-Peterburq
(Leninqrad) Dövlət
Teatr, Kinematoqrafiya və Musiqi İnstitutunun televiziya və telefilm rejissorluğu fakültəsini
bitirdikdən sonra
1972-ci ildən televiziyada
fəaliyyət göstərir.
O vaxt yeganə televiziya kanalı olan Azərbaycan Dövlət Televiziyası
onun daimi və əvəzedilməz
iş yeridir:
– 40 ildə iş yerinizi dəyişmək fikriniz olmayıb?
– AzTV-də işıqçıdan
rejissoradək yüksəldim.
Bir müddət özəl televiziya kanallarında çalışsam da, 2006-cı
ildə yenidən AzTV-yə döndüm. Özəl kanallarda işləmək
bir az
çətindir. 57 yaşlı AzTV böyük təcrübəyə
malik məktəbdir. Bu gündə ən
nəcib ənənələri
yaşadır, çünki
burada sağlam mühit hökm sürür.
AzTV-də televiziya işçilərinin
bir neçə nəsli var. Burada işləmək mənim
üçün asandır.
Məsələn, səs rejissoruna
hansı məqamda nə etmək lazım olduğunu deməyə ehtiyac yoxdur. Özəl kanallarda isə
bəzən səs rejissorunun nəyə lazım olduğunu soruşurlar. Bu mənada AzTV professionallar üçün
münbit məkandır.
– AzTV-də gənclərin özünü ifadə etmək imkanı nə dərəcədədir?
– Etiraf etməliyəm ki, AzTV bu
mənada təqdirəlayiq
məkandır. İndi bizim
kanalda gənc baş rejissor, baş redaktorlar var. Əvvəllər bu yaşda yüksək vəzifələr verilmirdi.
Gənc yaşlarımızda
bizi heç kim öyrətmirdi,
özümüz təşəbbüs
göstərib öyrənməyə
çalışırdıq.
İndi vəziyyət başqadır. Necə deyərlər,
oyunun qaydaları tamam dəyişib. Məsələn, mənim haqqım
çatmır ki, kiməsə yaxınlaşıb
səhvlərini deyim,
məsləhət verim.
Öz assisentlərimə söz
deməyə ərkim
çatır, amma başqa rejissorlara yox, əgər lazım bilsələr onlar məndən soruşmalıdır. Gənclər yaşlı nəslə sovet dövründən qalmış adamlar kimi yanaşır. Halbuki, əsl peşəkarlar məhz o dövrdə yetişib.Təəssüf
ki, ali
məktəblərimiz gənclərə
televiziya işini kifayət qədər öyrətmir.
– Müasir televiziya vizual baxımından
çox çevikdir.
Bəs, bizim çevikliyimiz bunu balanslaşdırırmı?
– Televiziya iki məqamı tələb edir: diqqətçəkən
hadisəyə köklənməyi
və bunu vaxtında işıqlandırmağı.
Əgər operativ süjeti,
yaxud videomaterialı sabaha saxlasam, başqa kanal bunu mənim əvəzimə edəcək.
Bir də, materialı elə hazırlayıb təqdim etməlisən ki, tamaşaçı hadisəni düzgün anlasın.
Ekran qarşısında əyləşənə nağıl
danışmaq yox, canlı insanı, baş verən hadisəni tam reallığı
ilə göstərmək
lazımdır. Deməli, iş prosesi və struktur düzgün qurulmalıdır.
– Hazırda nə işlə məşğulsunuz?
– İndi “Zaman və məkan” adlı müəllif proqramı hazırlayıram. “Dünyanı yaradanlar” silsiləsini isə dünya cazmenləri ilə davam etdirəcəm. “Emalatxana” rəssam
və heykəltəraşlara
həsr ediləcək. Bundan başqa, “Kinli, xəsis, səfeh”, “Dayanacaq” və “Əsər” adlı üç qısametrajlı
bədii film çəkmişəm.
AzTV tarixində
cəmi 1-2 dəfə
qısametrajlı film çəkilib. Lakin yeni
rəhbərlik gələndən
sonra bu filmlər çəkilməyə
başlandı. Bir neçə
qısametrajlı bədii
film çəkməyi planlaşdırıram.
Əsas mövzu qadın və kişi münasibətləri
olacaq.
– Rejissor kimi özünüzü
hansı işlə təsdiq etdiniz?
– “Mən rejissoram”
demək üçün
indiyədək bütün
dünyada olan rejissorlara baxmalıyam və özümü onlarla müqayisə etməliyəm. Bu ömrün
sonunadək davam edən prosesdir. 1986-cı ildə Sovet dönəmində Ümumittifaq gənclər
proqramları və telefilmlər festivalı keçirildi, “Çoban” adlı filmə görə laureat oldum. Heç onda “rejissoram”
demədim.
– 40 ildə nəyə nail olmaq istəmisiniz?
– Daim böyük
kinoda işləmək
arzusunda olmuşam.
1972-ci
ildə kinostudiyada yer yox idi,
gözləməkdənsə televiziyaya gəldim. Kino sahəsində təhsil alaraq kinostudiyada işləmək
istədim, alınmadı.
Sovet vaxtı film çəkmək
istəyirdinsə, bunu
kinostudiyada həyata keçirmək lazım idi. Xüsusi təhsil olmadan
orada çalışa
bilməzdin. Mənə
də kinostudiyada dedilər ki, diplomun film çəkməyə
yaramır...
– Hansı mövzuda film çəkmək istərdiniz?
– Heç vaxt mövzu haqqında düşünmürəm. İdeya qəfildən,
elə bizim söhbət zamanı, yaxud sizinlə görüşdən ayrılandan
sonra da yarana bilər. İnsana ilahidən nəsə bir vəh gəlməlidir.
– Serial çəkmək
haqqında düşünürsünüz?
– Biz bu prosesin ilk pilləsindəyik. Çoxlu sayda
serial çəkmək lazımdır,
hətta zəif olsa belə, əvvəl-axır yaxşısı
yaranacaq.
Seriallar auditoriyaya hesablanmalıdır. Yaxşı rejissorun
isə öz auditoriyası olmalıdır.
Hər bir rejissor mövzunu
mütləq öz yaradıcı potensialından,
daxili aləmindən keçirib təqdim etməlidir.
Düşünürəm ki, serial çəkilməsində
bütün süni maneələr aradan qaldırılmalıdır. Əslində mənə serial çəkmək
maraqlıdır, lakin
mövzu da cəlbedici olmalıdır.
Ümidə Həsənli
Baku Post.-2013.-26 yanvar.-S.-10.