Azərbaycanın
memarlıq incilər
Bolşeviklər
və erməni daşnakları tarixi abidələrimizə
ağır zərbələr vurub
Azərbaycan ərazisində
müxtəlif mədəniyyətlərə aid olan abidələr
kompleksi. Azərbaycan ərazisində yaşamış qədim
insanlar tarix boyu şərəfli yaradıcılıq yolu
keçərək çoxsaylı mədəniyyət əsərləri
yaradıblar və onlardan biri də memarlıqdır. Azərbaycanda
XIX-XX əsrdə memarlığın inkişaf edib. Bu
dövrdə Azərbaycan memarlığı iki yöndə
-yaşayış məskənlərinin memarlıq-plan
quruluşunda mühüm yer tutan bina kompozisiyası prinsipləri
və Avropa memarlığı ənənələri əsasında
inkişaf edirdi. XIX yüzildə yaşayış binaları
istisna olmaqla, ən xarakterik bina tipi məhz ticarət
binaları idi. Belə binalardan çox vaxt həm ticarət
müəssisələri, həm də sənətkarlıq
emalatxanası kimi istifadə edilirdi. Bakı, Gəncə,
Şuşa və Qubadakı ticarət dükanları
sırası bu tipli tikililərin ən bitkin örnəklərindəndir.
Bu çağda Azərbaycanda xəstəxanalar və demək olar ki, bütün şəhərlərdə kiçik tibb müəssisələri də tikilibr. 1860 illərdə Salyanda memar Q. Hacıbababəyovun layihəsi ilə tikilmiş xəstəxana XX yüzilin əvvəllərinədək fəaliyyət göstəribdi.
XIX yüzilin II yarısında tikilməyə başlanmış teatr binaları Azərbaycan memarlığında tamamilə yeni qurğu tipi idi. İlk teatr binası Şamaxıda, sonralar isə Bakıda Tağıyev Teatrı və Mayılov Teatrı.
XIX yüzilin I
yarısında irihəcmli və monumental dini binalar tikilib. Bu dövrdə
Azərbaycanda keçmiş ənənələri müəyyən
dərəcədə davam etdirən məhəlli xarakterli
memarlıq məktəbləri yarandı. Məscid
binalarının xarici simasının səciyyəvi
xüsussiyyətləri Azərbaycan ərazisində
Bakı-Abşeron, Quba-Qusar, Gəncə-Qarabağ, Şəki-Zaqatala,
Lənkaran və Naxçıvan kimi yerli memarlıq məktəblərini
müəyyənləşdirməyə imkan verir.
Bakıdakı Bəy məscidi,
Qasım bəy məscidi, Təzəpir məscidi,
"İttifaq", yaxud Göy məscid, Əmircanda M.
Muxtarovun məscidi kapitalizm dövrü üçün ən
xarakterik tikililərdir.
Milli memarlıq abidələri
ilə zəngin olan və sabit memarlıq ənənələrinə
malik Qarabağ zonasında Avropa memarlığı dərin
kök sala bilməmiş, yerli üslublar arasında
itib-batıbdı. XIX yüzilin ortalarında Qarabağda
özünəməxsus memarlıq məktəbi
yaranmış və onun ən görkəmli nümayəndəsi
Kərbəlayı Səfixan Qarabaği olub. Memarlıq
üsullarında yerli ənənə və prinsiplərə
axıradək sadiq qalan Kərbəlayi Səfixan Bərdədə
İmamzadə kompleksini yenidən qurmuş (1868), Ağdamda məscid
(1868-1870), Şuşada Aşağı məscid (1874-1975),
Yuxarı məscid, yaxud Cümə məscidi (1883) və məhəllə
məscidləri, indiki Füzuli şəhərində
Hacı Ələkbər məscidi (1890), həmin rayonun
Horadiz (1891-1908) və Qoçəhmədli (1906) kənd məscidləri
Oddesada Tatar məscidi (1870 illər), Aşqabadda
Qarabağlılar məscidi (1880 illər) və s. binalar
tikilib.
İsmailiyyə Sarayı
XX əsr memarlıq abidələri
sırasında İsmailiyyə Sarayı xüsusi ilə fərqlənir. İstiqlaliyyət keçəsi
30 ünvanında olan
binada hazırda Azərbaycan Milli Elmlər
Akademiyasının (AMEA) Rəyasət Heyyəti yerləşib.
Arxitekturalı bina Azərbaycan Respublikası Mədəniyyət
və Turizm Nazirliyinə aiddir. Saray Azərbaycan
Respublikası Nazirlər Kabinetinin 2 avqust 2001-ci il
qərarı ilə ölkə əhəmiyyətli
daşınmaz tarix və mədəniyyət abidəsi kimi
qorunur. İki mərtəbəli bina Qotik
üslübunda-memarlıq quruluşunda tikilib. Binanın memarı İosif Ploşkodur.
İsmailiyyə
sarayının layihəsində sarayın iki küncündə
Azərbaycan memarlığına uyğun olaraq günbəzlərin
yerləşdirilməsi nəzərdə tutulub. Bu gün elm
ocağına çevrilən abidə zaman-zaman Azərbaycan
tarixində baş verən faciələri də özündə
yaşadıb. Azərbaycanın müstəqillik
ideyaları da ilk dəfə məhz bu binada səslənib.
Memarlıq üslubu baxımından olduqca heyrətamiz olan
"İsmailiyyə"ni Bakı
milyonçusu Musa Nağıyev dünyadan erkən
köçən oğlu İsmayılın xatirəsinə
tikdirib.
"İsmailiyyə"
binasının tikilməsinin maraqlı tarixçəsi var.
Belə ki, Ağamusanın oğlu İsmayıl vərəm
xəstəliyinə tutulur. Bakı
milyonçularının ailələrini müalicə edən
Varatapedov adlı həkim İsmayılı müayinə
etdikdən sonra Musa Nağıyevə deyir ki, oğlunun vəziyyəti
çox ağırdır. Əgər tez
tədbir görülməsə, ölə bilər.
Amma 50 min manata qədər xərci var. Hətta həkim
milyonçuya təklif edir ki, oğlunu özü
İsveçrəyə aparıb 1 il ərzində
müalicə etdirib gətirəcək. Musa
Nağıyev deyir ki, yalnız 10 min manat verə bilər.
Söhbət bununla da bitir. Lakin
İsmayılın halının gün-gündən pisləşdiyini
görən milyonçu son anda onun müalicəsi
üçün 50 min manat verməyə razı olur. Lakin Ağamusa gecikir. Belə ki,
həkim xəstəni yoxlayandan sonra xəbər verir ki,
iş-işdən keçib, indi onu heç 100 min manatla da
müalicə etmək mümkün deyil. Hacı
Zeynalabdin Tağıyevin xahişi ilə həkim Məhəmməd
Rza Vəkilov İsmayılı İsveçrəyə
aparır. Müalicədən sonra onun
halı nisbətən yaxşılaşsa da, çox
yaşamır. Ağamusaya oğlunun xatirəsinə
bina tikdirmək təklifi isə Hacı Zeynalabdin
Tağıyevdən gəlir.
Bu kədərli hadisədən bir az sonra Hacı Zeynalabdin Tağıyevin təşəbbüsü
ilə onun tərəfindən tikilmiş olan qızlar məktəbində
Novruz bayramına həsr olunmuş məclis keçirilir. Adətən bu cür bayramlar üç gün
çəkirdi və arzu edən hər bir kəs ona
qatıla bilərdi. Məclisə şəhərin
mötəbər şəxsləri də gəlirdi. Son xəbərləri Hacı ilə müzakirə
etdikdən sonra onunla məsləhətləşən qonaqlar
qərara alırlar ki, adı xəsisliyə
çıxmış Nağıyevı xeyriyyə cəmiyyəti
üçün bina tikdirməyə sövq etsinlər.
“İsmayiliyyə” ilə balı
maraqlı epizod
Tarixçi-yazıçı Manaf
Süleymanovun “Eşitdiklərim, oxuduqlarım, gördüklərim”
kitabında belə bir maraqlı epizod təsvir olunur: “Hacı
Zeynalabdin fürsət tapıb soruşur: “Ağa Musa,
oğlunun adını əbədiləşdirmək istəyirsən?
Müsəlman xeyriyyə cəmiyyətinin öz binası
yoxdur, mənim tikdirdiyim qızlar məktəbindən bir az aşağıda isə əla boş yer
var. Orada ev tikdir, “İsmailiyyə” adlandıraq. Onda sənin bəxtsiz oğlunun adı bizim
yaddaşımızdan silinməz”. Musa Nağıyev ruhlanıb deyir: “Nə deyirəm,
yaxşı təklifdir. Razıyam”.
Tikinti üçün şəhərin
mərkəzində boş buraxılmış “Qapan dibi”
adlanan meydan ayrılıb. Bu sahə lap əvvəlcədən
məscid tikintisi üçün nəzərdə tutulubdu.
Məscidin ətrafında fəvvarələrlə
bəzənən bağ salınması
planlaşdırılırdı. Lakin Rusiya imperiyası
dövründə böyük nüfuz sahibi olan xristian ruhaniləri
Aleksandr Nevski kilsəsinin - “Qızıl kilsə”nin yanında belə bir məscidin tikilməsinə
əngəl törətdilər. Məsələnin
həllini uzadan məmurların qərarını gözləyə-gözləyə
bu meydan tədricən təbii bazara çevrildi. Şəhərkənarı kəndlərdən
buraya ərzaq və başqa mallar, hətta heyvan gətirirdilər,
bu isə palçıq və üfunətlə müşayiət
olunurdu. Bu yer hakimiyyət nümayəndələri
üçün göz dağına çevrilmişdi.
Deputatlar bu palçıqlı, zibilli meydanda
şəhər bağı salmaq rəyinə gəlibdilər.
Bolşeviklər Azərbaycanı işğal etdikdən
sonra həmin yazıları siliblər
“İsmailiyyə”nin
layihələşdirilməsi üçün polşalı
memar İosif Ploşko dəvət olunub. Memar
layihəni 1910-ci ildə tərtib etdi. Binanın
özülünün qoyulması 1908-ci ilin 21 dekabrında
baş verdi, tikinti isə 1913-cü ilin əvvəlində
başa çatdı. “İsmailiyyə”nin təntənəli
açılışından sonra onun ağ daşla işlənib,
“Nikolayevski” küçəsinə açılan pəncərələrə
malik geniş akt zalında Müsəlman xeyriyyə cəmiyyəti
üzvlərinin toplantısı, müsəlman
qadınların, Bakı ziyalılarının
yığıncağı, ruhanilərin qurultayı
keçirildi. Binanın memarı
Ploşkonun etirafına görə, onun ən böyük
arzularından biri Bakının mərkəzində, Azərbaycanın
milli ornamentləri ilə bəzədilmiş əzəmətli
binanın layihəsini işləmək imiş. Arzusuna çatan memar Ağamusa Nağıyeva öz
minnətdarlığını bildirir. Binanın
divarlarında asılmış naxışları
tamaşaçıları valeh edib. Venesiya
qotikası üslubunda tikilmiş dəbdəbəli saray
çox plastikdir və yaxşı işlənib. Binanın yuxarısında Qurani-Kərimdən surələr
olub. Lakin bolşeviklər Azərbaycanı
işğal etdikdən sonra həmin yazıları silib məhv
ediblər. Tikilinin əsas arxitektura elementləri
birinci mərtəbədə yerləşir. Bakının tarix-memarlıq abidələri
sırasında bu bina özünə xüsusi yer tutub.
Ermənilər tərəfindən yandırılması
1918-ci ilin martında Bakı
qırmızı qvardiyanın atəşi altına
düşəndə, bir sıra başqa binalar kimi,
“İsmailiyyə” də zərər çəkdi: müsəlman
cəmiyyətinin dayağı olan bina müqavimət mərkəzlərindən
biri idi və aramsız hücumlara məruz qalıbdı. Bina güllə və mərmilərdən ciddi
şəkildə zədələnibdi.
Amma təsəlliverici məqam odur
ki, "İsmailiyyə"nin arxivi
yandırılsa da, özülünü məhv edə bilmədilər.
"İsmailiyyə"nin
yandırılması Musa Nağıyevin ağır
iztirablarına səbəb olur. Onun oğlu
İsmayılın şərəfinə sarayın foyesidə
ucaltdığı möhtəşəm heykəl də ermənilər
tərəfindən məhv edilir. Bina
yalnız Azərbaycan Xalq Cümhuriyyətinin dövründə
bərpa olunub. Və memarlıq abidəsi
1922-23-cü illərdə memar Aleksandr Dubovun rəhbərliyi
ilə bərpa olundu və Türk mədəniyyəti
sarayı adlandırıldı. Təəssüf
ki, restavrasiya zamanı binanın fasadındakı və
böyründəki yazılar silinibdi.
Sarayda yerləşən təşkilatlar...
Bərpa edildikdən sonra
“İsmailiyyə” binasının ətrafında Mirzə
Ələkbər Sabir adına meydan
saldılar. Bu, şəhərin həmin guşəsini
bakılıların sevimli istirahət məkanına
çevirdi. Binanın bərpa olunmasından sonra
müxtəlif illərdə burada müxtəlif təşkilatlar
və təsisatlar yerləşib: “Azərbaycanın təhqiq
olunması və öyrənilməsi cəmiyyəti”,
“Arxeologiya komissiyası”, “Türk mədəniyyəti cəmiyyəti”,
Əlyazmalar fondu, SSRİ Elmlər Akademiyasının
respublika filialı və b. Hazırda binada Azərbaycan Milli
Elmlər Akademiyasının Rəyasət Heyəti yerləşir.
Ramid İBRAHİMOV
Bizim
yol.-2014.-23 fevral.-S.13.