Nizami rayonunun sosial-iqtisadi inkişafı:

real vəziyyət və perspektivlər

"Bakı şəhərinin və onun qəsəbələrinin sosial-iqtisadi inkişafına dair qəbul edilmiş dövlət proqramlarının ("Bakı şəhərinin qəsəbələrinin 2006-2007-ci illər üzrə sosial-iqtisadi inkişafının sürətləndirilməsinə dair Tədbirlər Proqramı"nın və "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"-red) icrası nəticəsində Bakının qəsəbə və kəndlərində uğurlu infrastruktur layihələri həyata keçirilmiş, kommunal və sosial xidmətlərin həcmi və keyfiyyəti daha da yaxşılaşmış, abadlıq işləri geniş vüsət almış, əhalinin həyat səviyyəsi daha da yüksəlmişdir. Bu gün başlıca vəzifələrdən biri müvafiq dövlət proqramları çərçivəsində görülmüş işlərin davam etdirilməsindən və şəhərətrafı qəsəbələrin və kəndlərin sakinlərinin həyat səviyyəsinin daha da yaxşılaşdırılmasından ibarətdir. "2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı" qarşıda duran vəzifələrin davamlı yerinə yetirilməsi məqsədi ilə hazırlanıb".

Bu sözlər 17 yanvar 2014-cü il tarixdə imzalanan "2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"nın təsdiq edilməsi haqqında Prezidentin sərəncamında qeyd olunub. Dövlət Proqramında Bakı şəhərinin Nizami rayonu üzrə 39 tədbir nəzərdə tutulub. Bu tədbirlər əsasında Gimnastika Kompleksinin, onun yanında məşq zalının və köməkçi qurğuların tikintisi başa çatdırılıb, Milli Sağlamlıq Mərkəzinin tikintisi davam etdirilib.

Sakinlər danışdılar

Nizami rayonunda olarkən şahidi olduq ki, yerli icra hakimiyyəti tərəfindən Q.Qarayev prospektində təmir və abadlıq işləri davam etdirilir. İş icraçısı bildirdi ki, rayonun Ə.Vəliyev küçəsi də əsaslı təmir edilərək abadlıq işləri görülüb.

Metronun "Neftçilər" stansiyasının yanında rayon sakinlərilə söhbət etdik. Burada həmsöhbətimiz ev alqı-satqısı və taksi fəaliyyəti ilə məşğul olan Nizami sakinləri oldu.

"Mən taksi sürücüsüyəm. İşimlə əlaqədar olaraq rayonumuzu qarış-qarış gəzmişəm, sakinlərlə tez-tez ünsiyyətdəyəm. Əhali çox az hallarda su və kanalizasiya təminatı, elektrik enerjisi, qaz və istilik təchizatı ilə bağlı problemdən şikayətlənirlər. Adətən qış mövsümündə kommunal xidmətdə problemlər yaşanır. Demək ki, bu sahədə işləri daha da yaxşılaşdırılmalıdır. Rayonun mərkəzində yerləşən yol və nəqliyyat infrastrukturunda problemlə qarşılaşmamışam. Amma mərkəzdən kənar ərazilərdə müəyyən işlər görülməlidir. İnsanlar əsasən işsizlikdən əziyyət çəkirlər",-deyə Əli Məmmədov bildirdi.

Metrostansiyanın yaxınlığında olan parka cəm olan evlərini kirayə verməyə çalışan sakinlərlə söhbət etdik. Onlar bildirdilər ki, sosial-iqtisadi tələblərini qarşılamaq üçün evlərini kirayə verməyə çalışırlar.

"Təqaüdçüyəm. Bəlkə də yaşlanma səbəbindən səhhətimdə tez-tez problemlər yaranır və mən mütəmadi olaraq həkimlərə müraciət etməli oluram. Bilirsiniz, dərmanların qiyməti qalxıb. Tək yaşayıram. Mənimlə eyni evdə yaşamaq istəyən adam axtarıram. Ailəli olsa yaxşı olar. Bir nəfər razı idi. Evə apardım ki, baxsın. Evimin olduğu bina sovet dövründən inşa edilmiş beşmərtəbəlidir. Birinci mərtəbədə yaşayıram. Müştəri zirzəmidə ürəkaçan vəziyyətin olmaması səbəbindən evimdə qalmaqdan imtina etdi. Zirzəmidə olan bu vəziyyət əksər binalarda var. Belə ki, buraya yağış suları dolub qalıb, qrunt suları, zibil yığıntıları, məişət tullantıları var. İsti günlərdə vəziyyət daha dözülməz həddə çatır. Bu səbəbdən müxtəlif heyvanlara və həşəratlara rast gəlirik. Kaş ki, bu problem həll olunsaydı. Binanın da bünövrəsi sıradan çıxmazdı",-deyə Sevil Həsənova bildirdi.

Sakinlərlə söhbət zamanı o da məlum oldu ki, qış fəslində onlar evlərini elektrik enerjisindən istifadə etməklə isidirlər. Bu xidmətdən istifadə isə onlara çətin başa gəlir. Onlar evlərinin mərkəzləşmiş istilik təchizatı isidilməsini ciblərinə uyğun hesab edirlər.

Qurumlar cavab verdilər

Sakinlərin dedikləri məsələlərlə bağlı müvafiq dövlət qurumlarına sorğu göndərdik. "Azəristiliktəchizat" ASC-dən isə bildirildi ki, "2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"na əsasən Nizami rayonunda yeni qazanxana tikintisi, binalarının aşağı paylanma istilik sisteminin bərpası, qazanxananın modernləşməsi və qazlaşdırılması layihəsi həyata keçirilir.

"Nizami rayonunda işsizliyin və iqtisadi inkişafın əsas meyarlarından biri olan yoxsulluğun səviyyəsinin azaldılması, əhalinin məşğulluq səviyyəsinin artırılması istiqamətində görülən işlərdi". Bu sözlər Əmək və Əhalinin Sosial Müdafiəsi Nazirliyinin (ƏƏSMN) sorğumuza verdiyi cavabda qeyd olunub.

"Əmək ehtiyatlarından səmərəli istifadənin təmin olunması və əhalinin məşğulluq səviyyəsinin yüksəldilməsi ölkəmizdə aparılan sosial-iqtisadi siyasətin əsas məqsədlərindən biridir. Odur ki, işsizlik probleminin aradan qaldırılmasına yönələn tədbirlər nəticəsində 2015-ci ildə Nizami rayon Məşğulluq Mərkəzi tərəfindən 610 nəfər vətəndaş münasib iş yeri ilə təmin edilib. Onlardan 237 nəfərini 29 yaşadək olan gənclər təşkil edib. Mərkəz işsiz və işaxtaran vətəndaşların münasib iş yerləri ilə təminatını həyata keçirərkən işəgötürənlərin işçi qüvvəsinə olan tələblərini də nəzərə alır. Çünki boş iş yerlərinə göndərilən şəxslərin həmin iş yerlərində işə qəbul edilmələri üçün onların peşə və ixtisas bacarıqlarının işəgötürənlərin tələblərinə uyğun olması vacib şərtlərdən biridir. Rayonun əmək bazarında ümumi vəziyyət stabildir və həyata keçirilən aktiv məşğulluq tədbirləri də tələb və təklif arasında uyğunluğun təmin olunmasına yönəlib",-deyə ƏƏSMN bildirib.

Sorğuda cavabda o qeyd olunur ki, 2015-ci ildə Nizami rayon Məşğulluq Mərkəzinin mütəxəssisləri tərəfindən 815 nəfər gəncə gələcək peşə və ixtisas seçimində köməklik üçün peşəyönümlü məsləhətlər verilib: "Eləcə də 120 nəfər şəxs (onlardan 107 nəfəri 29 yaşadək gənclər olub) əmək bazarının tələblərinə uyğun peşələr üzrə peşə hazırlığı və əlavə təhsil kurslarına cəlb olunublar. Kursları başa çatdırandan sonra həmin insanların yeni yiyələndikləri peşələr üzrə münasib iş yerləri ilə təminatı üçün də müvafiq işlər aparılıb.

Qeyd etmək yerinə düşər ki, son illərdə ƏƏSMN tərəfindən peşə hazırlığı işinin maddi-texniki bazasının gücləndirilməsi yönündə də mühüm işlər aparılır. Nazirliyin Bakı və Göyçay Regional Peşə Tədrisi Mərkəzlərində yenidənqurma işləri nəticəsində yeni sinif otaqları yaradılıb. Hazırda nazirliyin Gəncə şəhərində də Regional Peşə Tədrisi Mərkəzi yaradılır.

Bakının digər rayonları kimi, Nizami rayonu üzrə peşə hazırlığına cəlb olunan şəxslər də Bakı Regional Peşə Tədrisi Mərkəzində peşəkar mütəxəssislərin iştirakı ilə təlim kursu keçirlər və burada onların yeni peşələrə yiyələnmələri üçün bütün lazımi şərait vardır.

İşaxtaran və işsiz vətəndaşların münasib işlərlə təmin olunması sahəsində həyata keçirilən aktiv məşğulluq tədbirlərindən biri də əmək yarmarkalarıdır. Mərkəz tərəfindən ötən il işaxtaran və işsiz vətəndaşlar üçün 10 dəfə əmək yarmarkası keçirilib və bu tədbirlər nəticəsində 30 nəfərədək şəxs münasib işlə təmin olunub.

Bununla yanaşı, Bakı şəhərindəki ali təhsil müəssisələrində tələbə və məzunlar üçün "Karyerada ilk addım" devizi altında təşkil edilən aktiv məşğulluq tədbirlərində Nizami rayon Məşğulluq Mərkəzi də mütəmadi olaraq iştirak edir və Nizami rayonu üzrə işəgötürənlərin də boş (vakant) iş yerləri ilə bu tədbirlərdə iştirakını təmin edir. Həmin tədbirlər zamanı tələbə və məzunlar mövcud əmək bazarı, müəssisə, idarə və təşkilatlarda onların ixtisaslarına olan tələbat barədə məlumatlanırlar. Onlar işəgötürənlərlə bilavasitə qarşılıqlı ünsiyyət imkanı əldə edir, gələcəkdə işə qəbul olunmaq istədikləri müəssisələrin nümayəndələrinə özləri barədə şəxsi məlumatları (CV) təqdim edirlər. İşəgötürənlər isə bu tədbirlər vasitəsilə qısa vaxt ərzində müasir tələblərə cavab verən ixtisaslı kadrların seçiminin aparılması imkanı qazanırlar.

Bu gün Nizami rayon Məşğulluq Mərkəzi tərəfindən boş iş yerləri barədə məlumatların toplanmasında hər hansı problem yoxdur və bu sahədə işəgötürənlərlə səmərəli əməkdaşlıq həyata keçirilir, dövlət məşğulluq strategiyasının uğurlu icrası sahəsində birgə səylər daim artırılır".

ƏƏSMN vurğulayır ki, aztəminatlı vətəndaşlara diqqət və qayğını daha da artırmaq üçün müntəzəm tədbirlər həyata keçirir: "Əhalinin aztəminatlı təbəqəsinin sosial müdafiəsinin gücləndirilməsi ilə bağlı bir sıra fərman və sərəncamlar imzalanıb. Azərbaycan Respublikasının Prezidenti 16 yanvar 2016-cı il tarixli fərmanı ilə bu ilin fevralın 1-dən 1990-cı ilin 20 Yanvar hadisələri ilə əlaqədar əlil olmuş şəxslərə Prezidentinin təqaüdünün aylıq məbləği 10 faiz, "Şəhid ailəsi üçün Azərbaycan Respublikası Prezidentinin təqaüdü"nün aylıq məbləği 10 faiz artırılır.

Eyni tarixdə imzalanmış sərəncamla isə yaşa görə əmək pensiyasının baza hissəsinin məbləği 2016-cı il fevralın 1-dən 10 faiz artırılır.

Dövlət tərəfindən edilən belə yardımlar sırasında ünvanlı sosial yardım adlanan müavinətlər də mövcuddur. 01 yanvar 2016-cı il tarixdə Nizami rayonu üzrə 1438 ailəyə ünvanlı dövlət sosial yardımı ödənilir. 4618 nəfər isə aylıq sosial müavinətlə təmin olunur".

Dövlət Sosial Müdafiə Fondundan isə bildirildi ki, Nizami rayonunun 23 min 500-ə yaxın sakini əmək pensiyaçısıdır: "Pensiyalar da indiyədək hər ay vaxtından əvvəl verilib".

Ramid İBRAHİMOV

Yazı Suraxanı Rayon İcra Hakimiyyəti və Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun birgə keçirdiyi müsabiqəyə təqdim edilir.

Bizim Yol.- 2016.- 20 yanvar.- S.11.