"Əhməd haradadır?"

Əməkdar artist Elxan Qasımovun Milli.Az-a müsahibəsi.

- Elxan müəllim, səhhətiniz necədir?

- Babatam. Bir neçə il əvvəl əməliyyat olundum, indi şükür yaxşıyam. Çalışıram ki, özümü xəstəlikdən qoruyum. Amma nə qədər qorusam da xəstəlik gəlib məni tapır. Bu günlərdə sənət dostum Amaliya xanımın ölümü məni çox sarsıtdı. Dostlarımın dünyadan köçməsi mənə çox pis təsir edir. Bütün bu itkilərə baxmayaraq yenə də həyat mənim üçün maraqlıdır.

- Geriyə baxanda nə kimi hisslər keçirirsiniz?

- Geriyə baxanda çox sevinməsəm də xəcalət də çəkmirəm. Çünki mən sənət üçün nələrsə etmişəm. Ən böyük çatışmayan cəhətim var ki, onu da istəmirəm aradan qaldırım. Daha da çox çalışıb, öz məqsədimə çata bilərdim. Amma buna heç vaxt cəhd etməmişəm.

- Özünüz filmlərdə çox çəkilmək istəməmisiz, yoxsa mane olublar deyə həvəsdən düşmüsüz?

- Xeyr, sənətdə mənə heç kəs mane olmayıb. Mənim dostlarım da var idi, istəsəydim, çəkilərdim, dəvətlər də gəlirdi. Sadəcə, o dəvətlərdən mən heç vaxt istifadə etməmişəm.

- "Əhməd haradadır?" filmində sürücü Əhməd obrazını oynamısız. Maraqlıdır, tamaşaçılar Əhmədi bu gün yolda görərkən tanıyıb, yaxınlaşır?

- Bir dəfə 20 yanvarda qırmızı işıqdan keçərək yol hərəkəti qaydasını pozdum. Polis səs ucaldıcı ilə dedi ki, "Nərgiz xala elə düz edib səni "Kamaz"ın arxasınca qaçırdıb" (gülür). Mən xalqın içində olan insanam, insanların mənə Əhməd obrazı ilə bağlı dediyi sözlər çox xoşdur. Əhməd rolu mənim üçün bağlı qapı qoymayıb.

- Bir rejissor kimi bu gün çəkilən filmlərdən razısınız?

- İndiki filmlərimiz də əvvəlki filmlər kimi çəkilir. Film deyəndə mən kinostudiyada istehsal olunan filmləri nəzərdə tuturam. Bəzən festivallara da gedir həmin filmlər, yerlər də tutur. O dövrdə tənqid olunan filmlər var idi ki, 5-10 ildən sonra şedever sayıldı. Axır vaxtlar çəkilən seriallar da peşəkarlığı ilə seçilir. Əsas odur ki, ildən-ilə peşəkarlıq daha da artır.

- Sizcə, aktyorun yaxşı rol oynaması üçün ona, ilk növbədə, nə lazımdır?

- Aktyora gərək yaxşı qonorar verəsən ki, yaxşı oynasın. Sənət adamı maddiyatı fikirləşməli deyil.

- Bəzi sənətkarlarımız var ki, sırf qonorara görə bugünkü filmlərə çəkilmir...

- Əslində, onlar layiq olduqlarından da aşağı qiymət, qonorar deyirlər. Necə olur ki, müğənniyə iki saata iki min verirlər, aktyor min manat istəyəndə deyirlər ki, çox istəyir? Halbuki, müğənni oxuyub gedir, aktyor iki ay sərasər çəkiliş meydançasında olur.

- Həyatda ən çox nədən qorxursunuz?

- Çox qorxuram ki, axıra qədər yaşadığım kimi yaşaya bilməyim. Bir addım da atanda ehtiyat edirəm. İstəmirəm ki, kiminsə könlünü sındırım.

Bizim Yol.- 2018.- 21 noyabr.- S.15.