Türkiyədə Rəsul Rzanın yubiley tədbirləri

Qəzetimizin ötən sayında xalq şairi Rəsul Rzanın anadan olmasının 100 illik yubileyi çərçivəsində Ankarada TÜRKSOY-un və "Bəngü" nəşriyyatının birgə layihəsilə şairin "Gecənin susqun nəğməsi" adlı seçmə şeirlər kitabının nəşr olunduğunu xəbər vermişdik.

Yaxın günlərdə ustad şairin 100 illik yubileyilə bağlı tədbirlər çərçivəsində Türkiyədə bir sıra layihələr də reallaşmışdır. Belə ki, Avrasiya Yazarlar Birliyinin "Kardeş kalemler" dərgisinin aprel sayının xeyli hissəsi də Rəsul Rzaya həsr edilmişdir. İmdat Əfşarın uyğunlaşdırmasında Rəsul Rzanın altı şeri və "Rənglər" silsiləsinə daxil olan bütün şeirlər, habelə Kamran Əliyevin "Rəsul Rzanın sənət yolu", Fərahim Sadıxovun "Şeir kəhkəşanının parlaq ulduzu", Qəzənfər Kazımovun "Rəsul Rzanın şeir dili" adlı geniş məqalələri dərc olunmuşdur.

Aprelin 12-də Ankarada TÜRKSOY-un toplantı salonunda şairin 100 illiyinə həsr olunmuş tədbir keçirilmişdir. Tədbirdə Türkiyənin mədəniyyət və turizm naziri Ərtoğrul Günay, TÜRKSOY-un baş katibi Düseyn Qaseinov, Avrasiya Yazarlar Birliyinin başqanı Yaqub Dəliöməroğlu, İLESAM başqanı Yəhya Akenkın, İmdat Afşar çıxış etmişlər. Beynəlxalq Rəsul Rza Fondunun sədri, xalq şairi Fikrət Qoca İmdat Afşara və Yaqub Dəliöməroğluna təltif olunduqları Rəsul Rza mükafatlarının diplomlarını təqdim etmişdir.

Gecədə TRT-nin Rəsul Rzaya aid çəkdiyi yarımsaatlıq sənədli film göstərilmiş, müğənni Cavid Təbrizli Rəsul Rzanın və Nigar Rəfibəylinin sözlərinə yazılmış mahnıları ifa etmişdir. Şairin oğlu, Azərbaycan Yazıçılar Birliyinin sədri Anar tədbirin təşkilatçılarına və iştirakçılarına dərin minnətdarlıq hisslərini ifadə etmişdir.

Yubiley tədbirləri Kayseri şəhərində davam etmişdir. "Bizim eyvan" dərgisinin imtiyaz sahibi, görkəmli həkim, iş adamı və mesenat doktor Kamal Tekdenin maddi dəstəyi və Erciyəz Universitetinin iştirakıyla təşkil edilmiş "Rəsul Rza və Azərbaycan ədəbiyyatı" simpoziumu aprelin 14-də Sabançı Kültür Mərkəzində keçirilmişdir. Şairin yaradıcılığı haqqında universitetin türk dili və ədəbiyyatı şöbəsinin müdiri, professor Nevzat Özkan məruzə etmişdir. Elə həmin gün Erciyəz Universitetinin konfrans salonunda çağdaş Azərbaycan ədəbiyyatına və Anara həsr olunan toplantıda "Bizim eyvan" dərgisinin baş redaktoru Serdar Kozan məruzə etmişdir.

Aprelin 16-da isə Kayseri Kültür müdirliyinin konfrans salonunda "Can Azərbaycan" gecəsində tələbələrin ifasında Səməd Vurğunun, Şəhriyarın, Rəsul Rzanın, Bəxtiyar Vahabzadənin şeirləri səslənmiş, onların sözlərinə yazılmış mahnılar və xalq nəğmələri ifa edilmişdir. Azərbaycan və Türkiyə bayraqlarıyla səhnəyə çıxıb ifaçılara qoşulan, rəqs edən azərbaycanlı gəncləri - Kayseridə təhsil alan tələbələri salondakılar gurultulu alqışlarla qarşılamışlar. Gecədə Kayseri valisi iştirak etmişdir.

Bundan başqa, aprelin 19-dan 25-ə kimi İzmirdə İkinci Uluslararası Türk dünyası Kültür konfransı keçirilmişdir. Türk cümhuriyyətlərindən, Rusiyadan, İrandan, Çindən, İraqdan, başqa ölkələrdən 440 nümayəndənin iştirak etdiyi konfransda aprelin 19-da Anarın "100 yaşında Rəsul Rza", aprelin 21-də Türk dünyası ədəbiyyatları seksiyasında Ayşe Atay və Əli Erolun "Rəsul Rzanın şeirlərində Ezop dili", aprelin 20-də Anarın "Çağdaş Azərbaycan nəsri" mövzularında məruzələri dinlənildi.

Ədəbiyyat qəzeti.-2010.-30 aprel.-S.3.