Fikrət Qoca – 75

Şair, doğrudan da şairdirsə - onun 16 yaşında yazdığı şeirlə 46, yaxud 75 yaşında yazdığı şeirlər arasında, şübhəsiz, fərq olacaq. Amma bu fərq - əzəmətli, qollu-budaqlı, qocaman bir ağacın yarpaqlarıyla həmin ağacın çox illər, bəlkə çox əsrlər bundan qabaqkı pöhrə vaxtının yarpaqları arasındakı fərq kimidir. Ağac həmin ağacdır - qovaq, çinar, əbrişim ya palıd. Yaşı başqadır, görkəmi başqadır, illərinin sayı fərqlidir. Şair həmin şairdir, poeziyasının alın qırışları çoxalıb, şerinin başı ağarıb… amma şairin sifəti həmin sifətdir. Əsl şairin üzü olur, bu üz dəyişir, amma başqalaşmır, ya başqalaşır, amma yadlaşmır…

…Fikrət Qocanın səciyyəvi keyfiyyətlərindən çox danışmaq olar. Mən yalnız bütün yaradıcılığı boyu şairin sadiq olduğu bir cəhəti qeyd etmək istəyirəm. Bu cəhət üç ünsürün - yüksək vətədaşlıq pafosu, zərif lirik duyğu və gülüş - təbəssüm ünsürünün F.Qoca poeziyasında üzvi birləşməsi, vəhdəti, sintezidir. Fikrətin sırf ictimai motivli əsərləri də var, xalis lirik miniatürləri də, satirik - yumoristik parçaları da. Amma elə yazıları da var ki, bu ünsürün üçü də bir şerin daxilində -təbii axarda qovuşur.

Dövrün nəbzini tutmağı bacaran şairi təbii ki, doğma xalqının, ana yurdunun müasir gerçəkliyi daha çox düşündürür. Fikrət Qocanın son kitablarında respublikamızın həyatındakı mühüm dəyişikliklər poetik, obrazlı əksini tapmışdır. Şair yaxşı bilir ki, bütün uğurlarımız, fərəhlərimiz yaradıcı zəhmətin, gərgin əməyin bəhrəsidir.

İctimai təpər, fəal vətəndaşlıq mövqeyi şairin lirik qəhrəmanının əsas insan xasiyyətlərindəndir. Amma hər bir həqiqi, bütöv insan kimi şairin qəhrəmanı da mürəkkəb duyğular aləminə, mənəvi zənginliyə malikdir. Onun qəlbi ağrılardan, acılardan xali deyil, ömür yolunda qazanclarıyla yanaşı, itkiləri də olub. İnsanın mürəkkəb daxili aləminə nüfuz edərkən şair həqiqətə sadiq qaldığındandır ki, onun lirik qəhrəmanına inanır, etibar bəsləyirik.

Fikrət Qoca poeziyanın ən gözəl ənənələri zəminində ustad şairdir…

Anar

Ədəbiyyat qəzeti.- 2010.- 16 iyul.- S.3.