İltifat Saleh - 75

Hörmətli İltifat müəllim!

Sizi - istedadlı şairimizi andan olmanızın 75 illiyi münasibətilə təbrik edirik. Siz ötən əsrin altmışıncı illərində xalq şairimiz Rəsul Rzanın "uğurlu yolu" ilə ədəbiyyata gəlmisiniz. Ötən illərdə ustad şairimizin sizə bəslədiyi ümidləri öz yaradıcılığınızda, çap etdirdiyiniz "Səni görmək üçün", "Ay işığı", "Rənglərin səsi", "Sənə demədiklərim", "Sevgi akkordları", "Dərdin şəkli" kitabları ilə doğrultmuş və bu yazılarla özünüzü təsdiq etmisiniz. Yaradıcılığınızda Vətənə, xalqa bağlılıq, sözün bədii şəkildə ifadə edilməsi, mövzuların rəngarəngliyi diqqəti cəlb edir. Hər bir şerinizdə fikir söyləməyə, bir yeni söz deməyə çalışırsınız.

Əmək fəaliyyətinə Lənkəran rayonunun Liman şəhər bir saylı orta məktəbində müəllim kimi başlamısınız. Sonralar siz Lənkəran rayonlararası arxivinin direktoru, Lənkəran rayon XDS İcraiyyə Komitəsi sədrinin birinci müavini, Liman şəhər sovetinin sədri, Lənkəran rayon yerli radio verilişləri redaksiyasında baş redaktor, Lənkəran şəhər İcra Hakimiyyəti başçısının Liman şəhəri üzrə nümayəndəsinin müavini vəzifələrində işləmisiniz. On ildən çoxdur ki, Azərbaycan Yazıçılar Birliyi Lənkəran bölməsinin sədri vəzifəsində çalışırsınız. Bu müddət ərzində əhatə etdiyiniz rayonlarda gənc ədəbi qüvvələrin yaradıcılığının inkişafına təkan verən tədbirlər, onların yeni kitablarının təqdimat mərasimini keçirmiş, yubileylərinin təşkil edilməsində səyinizi əsirgəməmisiniz. Lənkəran bölməsinin ədəbi-bədii orqanı olan "Şəfəq" jurnalının baş redaktoru kimi fəaliyyətiniz də təqdirəlayiqdir. Sizin tərtib və çap etdirdiyiniz Cənub bölgəsində yaşayıb-yaradan yazıçıların bədii əsərlərindən ibarət "Ömürdən yarpaqlar" almanaxı maraqla qarşılanmışdır. Sizin uğurlu yaradıcılığınız Beynəlxalq Rəsul Rza mükafatına layiq görülmüşdür. Siz sovet dönəmində "Rəşadətli əməyə görə" və "Əməkdə fərqlənməyə görə" medalları, uzun illər fəal təbliğatçılıq fəaliyyətinizə görə isə Azərbaycan SSR Ali Sovetinin fəxri fərmanına və "Vektor" Beynəlxalq Elm Mərkəzinin ədəbiyyata göstərdiyiniz dəstəyə görə uluslararası ödülünə layiq görülmüsünüz.

Hörmətli İltifat müəllim!

Sizi bir daha anadan olmanızın 75 illik yubileyi münasibətilə təbrik edir, sizə uzun ömür, cansağlığı, yaradıcılıq uğurları arzulayırıq.

Azərbaycan Yazıçılar Birliyi

Ədəbiyyat qəzeti.- 2010.- 4 iyun.- S.5.