Bakı Slavyan Universitetində "Rus Kitab Evi" açılıb

Bu günlərdə Bakı Slavyan Universiteti və "Avrasiya Tədqiqatları İnstitutu" İnkişaf fondu arasında elm, mədəniyyət və təhsil, rus dili və ədəbiyyatının təbliği, rus mədəniyyəti və mənəviyyatı dəyərlərinə qovuşma sahəsində əməkdaşlıq haqqında memorandum imzalanıb. Memorandumda Bakı Slavyan Universitetinin "Moskva auditoriyası" Rusiya Tədris Mədəniyyət Mərkəzinin nəzdində "Rus Kitab Evi" kitab mağazasının filialının açılması, burada müasir rus ədəbiyyatı təmsilçilərinin ədəbi və yaradıcılıq gecələrinin, universitet tələbə və müəllimlərinin Rusiyanın yazıçı və şairləri, naşirləri, yaradıcı əmək və KİV nümayəndələri ilə görüşlərinin təşkili və keçirilməsi, bədii və elmi ədəbiyyat, lüğət və məlumat kitabçaları, universitetin profilinə uyğun müxtəlif elmi sahələr üzrə dərsliklər və dərs vəsaitləri ilə zənginləşdirilməsi nəzərdə tutulub. Mərasimdə Rusiyanın Azərbaycandakı səfiri Vladimir Doroxin, Rusiyanın "Avrasiya Tədqiqatları İnstitutu" İnkişaf fondunun prezidenti Valeriy Tursunov, fondun Azərbaycandakı nümayəndəliyinin rəhbəri Rauf Həsənov və "Rusiya İnformasiya Mərkəzi" Bakı ofisinin rəhbəri Ənvər Şeyxov da iştirak ediblər. Bakı Slavyan Universitetinin rektoru, professor Kamal Abdullayev mərasimi açaraq qonaqları salamlayıb: "Əziz səfir, əziz qonaqlar, hər birinizə xoş gəlmisiniz deyirəm. Hamını bu kitab evinin açılması münasibətilə təbrik edirəm. Mən inanıram ki, bu kitab evi təkcə kitabların satışını təşkil edən yox, onları təbliğ edən mərkəz olacaq, Azərbaycan və Rusiya dövlətləri arasında mədəni ocağa çevriləcək". K.Abdullayev qeyd edib ki, bu Kitab Evi təkcə müəllim və tələbələr üçün deyil, bütün vətəndaşlar üçün xeyirli olacaq, slavyan filologiyası üzrə lazımi kitablar bu mərkəz vasitəsilə əldə ediləcək, burada rus ədəbiyyatı nümayəndələrinin ədəbi və yaradıcılıq gecələri, universitet tələbə və müəllimlərinin Rusiyanın tanınmış yazıçı və şairləri, naşirləri ilə görüşləri keçiriləcək. Rektor qarşılıqlı əməkdaşlığa görə fondun rəhbərliyinə təşəkkür edib və gələcək əməkdaşlıq üçün həmişə hazır olduğunu bildirib. Rusiyanın "Avrasiya Tədqiqatları İnstitutu" İnkişaf fondunun prezidenti Valeriy Tursunov fondla universitet arasında dostluq və əməkdaşlıq əlaqələrinin genişləndiyindən məmnun olduğunu bildirib: "Biz çalışdıq ki, "Rus Kitab Evi"nin ilk filialı məhz Bakı Slavyan Universitetində açılsın. Biz universitetinizdə fəaliyyət göstərən dil və mədəniyyət mərkəzlərinizə slavistika sahəsində nəşr olunmuş kitabların gətirilməsinə yaxından köməklik göstərmək niyyətindəyik. Çox sevinirik ki, bizim BSU-da "Evimiz" var". Mərasimdə iştirak edən Rusiyanın Azərbaycandakı səfiri Vladimir Doroxin əməkdaşlıq istiqamətində atılan yeni addımı müsbət qiymətləndirib: "Bu təkcə ikitərəfli əməkdaşlıq müqaviləsi deyil, həm də mədəni sahədə böyük hadisədir". Səfir qeyd edib ki, Rusiya tərəfi hər zaman Bakı Slavyan Universiteti ilə əməkdaşlıq etməyə hazırdı. İmzalanma mərasimindən sonra "Rus Kitab Evi" kitab mağazasının filialının təntənəli şəkildə açılış mərasimi keçirildi və tədbir iştirakçıları "Rus Kitab Evi" ilə yaxından tanış olublar.

Ədəbiyyat qəzeti.- 2010.- 24 sentyabr.- S.5.