Şövkət Zərin Horovlu - 70

Hörmətli Şövkət xanım!

Sizi - istedadlı şairimizi yubileyiniz münasibətilə təbrik edirik.

Siz - bədii yaradıcılığa ötən əsrin yetmişinci illərində başlamısınız. İlk qələm təcrübələriniz - poetik parçalar mətbuatda dərc olunmuşdur. Ailənizlə birgə bir müddət Əfqanıstanda yaşamısınız və burada ilk nəsr əsəriniz olan "Açılmamış məktub" povestinizi qələmə almısınız. "Çinar həsrəti", "Mən Araz qızıyam", "Sözün işığı", "Dünya, səndən nigaranam", "Heykəlləşən qatar", "Ürəyim dan yeridir" və s. adlı şeir və poemalardan ibarət kitablarınız oxucuların ixtiyarına verilmiş və maraqla qarşılanmışdır. Balaca oxuculara da "Babam əyri yeriyir", "Babam iki alıb" şeir kitablarını hədiyyə etmisiniz.

Siz Bakı Dövlət Universitetinin filologiya fakültəsini bitirmisiniz. Uzun illərdir pedaqoji fəaliyyətlə məşğulsunuz. Respublika Təhsil Nazirliyinin fəxri fərman və diplomları ilə təltif olunmusunuz.

Hörmətli Şövkət xanım!

Sizi yubileyiniz münasibətilə bir daha təbrik edir, sizə cansağlığı, uzun ömür və yeni-yeni yaradıcılıq uğurları arzulayırıq.

Azərbaycan Yazıçılar Birliyi

Ədəbiyyat qəzeti.- 2011.- 8 aprel.- S.5.