"Arazdan gələn səs"in əks sədası

Bu günlərdə AYB-nin Natəvan klubunda şair Şövkət Zərin Horovlunun "Arazdan gələn səs" romanının təqdimat mərasimi və müəllifin "imza günü" keçirildi. Əslində, 70 illik yubileyi günlərinə təsadüf edən təqdimat mərasimində Şövkət xanımın yalnız sözügedən romanından deyil, ümumən onun yaradıcılığından - poeziyası və publisistikasından da söz açıldı.

Mərasimi açan AYB katibi Rəşad Məcid Şövkət xanımın poetik istedadından, eyni zamanda, nəsr sahəsində ilk qələm təcrübəsi olan "Arazdan gələn səs" romanından danışdı. Qeyd etdi ki, bu roman Qarabağ mövzusunda, qaçqın və köçkün ağrılarını bədii həqiqət kimi ortaya qoymaq baxımından maraqlı və dəyərli bir əsərdir. Sonra məclisi idarə etmək yazıçı Elçin Hüseynbəyliyə həvalə edildi. O, təqdim olunan romanın mahiyyəti və Şövkət xanımın ümumi yaradıcılığı barədə dəyərli fikirlər söyləyib müəllifi həm bu əsərə, həm də 70 illik yubileyinə görə təbrik etdi. Təbrikin ardınca şair Elxan Zal Qaraxanlı M.Kaşğari adına Beynəlxalq fondun "Türk törə ocağı" mükafatını Şövkət xanıma təqdim etdi.

Tədbirdə şair, f.ü.fəlsəfə doktoru Adil Cəmil çıxış edərək "Arazdan gələn səs" romanının geniş təhlilini verdi və belə əsərlərin yazılmasına bir ehtiyac duyulduğunu söylədi.

Təqdimat mərasiminin digər iştirakçılarından tənqidçi Əsəd Cahangir, prof. İsmayıl Kazımov, şairlərdən İlyas Tapdıq, Oqtay Rza, Mahirə Abdulla, Rüzgar Əfəndiyeva, Fərqanə, Fəxrəddin Meydanlı, 14 saylı məktəbin direktoru Hürzad Verdizadə, jurnalist Səriyyə Xocalı çıxış edərək öz aktuallığı və maraqlı süjet olayları ilə diqqəti çəkən roman haqqında mülahizələrini auditoriya ilə bölüşdülər.

Sonda Şövkət Zərin Horovlu tədbirə qatılanlara öz təşəkkürünü bildirib yeni şeirlərini oxudu.

A.Savalan

Ədəbiyyat qəzeti.- 2011.- 22 aprel.- S.5.