* İnsanlara doğru yol göstərən, bu yolu açıq dəlilləri ilə aydınlaşdıran və haqqı batildən ayıran Quran Ramazan ayında nazil edilmişdir.

“Bəqərə” surəsi, 185-ci ayə

* Həqiqətən, Biz Quranı Qədr gecəsi (lövhi-məhfuzdan dünya səmasına) nazil etdik!

* Qədr gecəsi (savab cəhətdən) min aydan daha xeyirlidir! (O, Ramazan ayının on doqquzuna, iyirmi birinə, iyirmi üçünə, iyirmi beşinə, əksər rəvayətə görə isə iyirmi yeddisinə təsadüf edir.)

“Qədr gecəsi” surəsi,

1 və 3-cü ayələr

Mənə bəxş edildi…

…Ona Quranı nazil etdi. Bir Kitab ki, işığı sönməz, parıltısı azalmayan çıraqdır. Dərinliyinə heç kimin vara bilmədiyi dənizdir, yolçunu azdırmayan bir yoldur. İşığı solğunlaşmayan nurdur.

Həzrət İmam Əli (ə)

Ya həbibullah! Ya xeyrül-bəşər! - müştaqinəm, -

Eylə kim, ləbtəşnələr yanıb dilər həmvarə su!..

Füzuli

Mənə bəxş edildi

Qurani-Kərim, -

Qərq oldu işığa

yorğun gözlərim!..

Qayğılar içində

təngnəfəsdim, -

Dedim bir göz açım,

bir nəfəs dərim...

Gördüm bu işıqda

ötən illəri, -

Yaşayan illəri, itən illəri.

Sanki üşüyürdüm,

gəzdi saçımda

İlahi qüdrətin isti əlləri.

Dünya həm sevincdi,

həm də iztirab, -

İnsandır gətirir

hər əzaba tab;

Yer üzündən şəri bəşər siləcək, -

Bir əlində qələm,

birində Kitab!..

Ayaz VƏFALI

8.09.2010

Ədəbiyyat qəzeti.- 2011.- 12 avqust.- S.1.