Deyirlər kişi ağlamaz

…Deyirlər kişi ağlamaz,

Kişi ev yıxar, eləmi?

Bir qəlbi talan eləyib

Aradan çıxar, eləmi?

Papağı qoyub başına,

Baxmaz dərya göz yaşına

Zəhəri qatıb aşına

Uzaqdan baxar, eləmi?

Yaxşıca bəhanə olub,

Yağış yağıb quyu dolub.

O qəlbin nəm yeri qalıb,

Allah bağışlar, eləmi?..

Bəlkə də havayı deyil

Öz-özümlə danışıram,

Sanki iki adam kimi.

Özümə dəstək oluram

Anam kimi, atam kimi.

Kimsədən umacağım yox,

Təkcə Allahdan savayı.

Alturist adam olmuşam -

Ömür də keçib havayı.

Bəlkə də havayı deyil,

Könlümdə bu işıq varsa.

Məni də sevən çox olar -

O işığı görən olsa…

Təəssürat

Hara getsən o yerlərdə

Sən istəyən olurmu?

Hər kəs bir nur çeşməsitək -

Axıb qəlbə dolurmu?

Lil bağlamış sular kimi,

Heç durulmur çox adam.

Mən də buzları əridən -

Çalışıram od olam.

Amma daşa dönür adam,

Ərimir ki, sevgidən.

Halbuki çox zaman ötüb -

Buralardan biz gedən…

Mina Rəşid

Ədəbiyyat qəzeti.- 2011.- 2 dekabr.- S.5.