AMEA-da dahi Nizami Gəncəvinin

870 illik yubileyi qeyd edildi

Noyabrın 30-da Azərbaycan Milli Elmlər Akademiyası (AMEA) Nizami adına Ədəbiyyat İnstitutunda dahi Azərbaycan şairi və mütəfəkkiri Nizami Gəncəvinin anadan olmasının 870 illiyinə həsr edilmiş elmi sessiya keçirildi.

AMEA-nın müxbir üzvü Teymur Kərimli Nizami Gəncəvinin 870 illik yubileyi münasibətilə ölkəmizdə və onun hüdudlarından kənarda silsilə tədbirlərin həyata keçirildiyindən danışdı. O qeyd etdi ki, anadan olmasından 870 il keçməsinə baxmayaraq, dünya ədəbiyyatının korifeyi, dahi Nizami Gəncəvinin həyat və yaradıcılığı bu gün də aktuallığını itirməmiş, daim tədqiqatçıların, ictimaiyyətin diqqət mərkəzindədir. Dünya ədəbiyyatı tarixinə yazdığı beş poemadan ibarət "Xəmsə" ("Beşlik") müəllifi kimi daxil olmuşdur.

Nizami Gəncəvinin ilkin Şərq intibahının zirvəsi olan yaradıcılığında dövrünün ən humanist, ümümbəşəri ictimai-siyasi, sosial və mənəvi-əxlaqi idealları parlaq bədii əksini tapmışdır. Dahi söz ustadı təsvir etdiyi bütün hadisələri Azərbaycanla əlaqələndirməyə, onu tərənnüm etməyə çalışmışdır. Şairin yaradıcılığında vətən məhəbbəti doğma xalq yolunda qəhrəmanlıq ideyası ilə birləşir.

Nizami Gəncəvinin yaradıcılığı humanizmi, yüksək sənətkarlığı ilə Cənubi Qafqaz, Yaxın Şərq xalqları ədəbiyyatlarının inkişafına güclü təsir göstərmiş, dünya mədəniyyəti xəzinəsinə daxil olmuşdur. Şairin əsərləri dünyanın bir sıra xalqlarının dilinə tərcümə edilmişdir. Əsərlərinin nadir əlyazma nüsxələri bir çox şəhərlərin (Moskva, Sankt-Peterburq, Bakı, Daşkənd, Təbriz, Tehran, Qahirə, İstanbul, Dehli, London, Paris və s.) məşhur kitabxana, muzey və əlyazmaları fondlarında qiymətli incilər kimi qorunub saxlanılır.

Qeyd olunmuşdur ki, ümummilli lider Heydər Əliyevin olkəyə rəhbərlik etdiyi dövrlərdə Azərbaycanın böyük şair və mütəfəkkiri Nizami Gəncəvinin ədəbi irsinin öyrənilməsini, nəşrini və təbliğini yaxşılaşdırmaq məqsədilə bir sıra tədbirlər həyata keçirilmişdir. Şairin adının əbədiləşdirilməsi, yaradıcılığının tədqiqi ən vacib məsələ kimi daim respublika rəhbərinin diqqət mərkəzində olmuşdur. Onun bu siyasəti hazırda Prezident İlham Əliyev tərəfindən uğurla davam etdirilir.

Nizami Gəncəvinin 870 illik yubileyinin Rusiya Dövlət Ermitajında təntənəli qeyd edilməsi ilə bağlı razılığın əldə edildiyi, yubiley münasibətilə Heydər Əliyev Fondu tərəfindən şairin "Xəmsə"sinin nəfis tərtibatla yenidən nəşr olunacağı vurğulanmışdır.

Tədbirdə "Nizami və müasirlik", "Nizami "Xəmsə"sində türklük konsepsiyası", "Nizami yaradıcılığında bədii sualın yeri", "Nizami Gəncəvi Həccə getmişdirmi?" mövzularında məruzələr dinlənilmişdir.

Ədəbiyyat qəzeti.- 2011.- 2 dekabr.- S.1.