Açıq qoy yuxunun qapılarını

Açıq qoy yuxunun qapılarını,

Sirli səmalardan seyrə gəlim mən.

Yozacaq yuxunu yuxu yozanlar,

Hər zaman yuxuna xeyrə gəlim mən.

Açıq qoy yuxunun qapılarını,

Mənim bəxtim kimi kilidlənməsin.

Gəlim ünvanına səssiz-səmirsiz,

Yuxun gözlərində çiliklənməsin.

Açıq qoy yuxunun qapılarını,

Alın yazım kimi cizgilənim mən.

Əksim qaçırmasın yuxularını,

Mürgülü gözündə güzgülənim mən.

Açıq qoy yuxunun qapılarını,

Qoy kimsə deməsin şayə gəlim mən.

Yandır taleyimin işıqlarını,

Sən eşqin sultanı!.. sayə gəlim mən.

Açıq qoy yuxunun qapılarını,

Qaranlıq gözümdə göyərçin olsun.

Açsın çiynimizdən qanadlarını,

Gördüyün yuxular görüm çin olsun.

Açıq qoy yuxunun qapılarını,

Al məni sevdamın al baxışından.

Nə sən bir söz soruş, nə mən danışım,

Asılaq sükutun lal baxışından.

Açıq qoy yuxunun qapılarını,

Göylər gizlədibdi dan köynəyini,

Qaranlıq gecələr üşüdər səni,

Geyinmə əyninə can köynəyini.

Açıq qoy yuxunun qapılarını,

Bir gəzək dünyanı biz başdan-başa.

Dünyanın üzünə çəkilək… qalsın

Eşqin göylərində rəsmimiz qoşa.

Açıq qoy yuxunun qapılarını,

Gerçəyə cala sən yalan ömrümü.

Mənim səndən başqa kimim var axı,

Sənə qurban verim qalan ömrümü.

Açıq qoy yuxunun qapılarını,

Köksümdə dəfn eylə, bük ahımızı.

Yerdə yerim yoxdu ayaq qoymağa,

Qoy göylər bağlasın nikahımızı.

Açıq qoy yuxunun qapılarını,

Bu gerçək aləmdə bayılmayaq biz.

Görmüşəm dünyanın etibarını,

Açıq qoy yuxunun qapılarını,

Daha yuxulardan ayılmayaq biz.

Səni kiritməyin

min bir yolu var

Səni kiritməyin min bir yolu var -

Dərdini dərindən bilməkdir biri.

Ölüncə dərdini, dönüb başına

Dolana-dolana bölməkdir biri.

Səni kiritməyin min bir yolu var,

Ölən gümanını qaytarım diri.

Hamının gedəni gəlsin, sevdiyim,

Gedib də yenidən gəlməkdir biri.

Səni kiritməyin min bir yolu var -

Həm dardı, həm edam, həm ilmək yeri.

Hökmün ölüm doğsa anın içində,

Sorğusuz-sualsız ölməkdir biri.

Səni kiritməyin min bir yolu var -

Ağrım ağrın çəkir, ağlama, kiri.

Gedib ağladanın özünə qədər,

Ağlaya-ağlaya gülməkdir biri.

Səni kiritməyin min bir yolu var -

Zaman gözlərində görməz bu tiri.

Silsəm əllərimlə əlim quruyar,

Gözünü gözümdə silməkdir biri.

Səni kiritməyin min bir yolu var -

Bir sən biləcəksən, bir mən bu sirri.

Yolunda gedib də Allaha qədər,

Sonra da, bax, sənə dönməkdir biri.

Sevgidən başladı

bu ayrılıqlar

Ağladın, gözündə yaşa qısqandım,

Gəldin kölgən ilə qoşa, qısqandım,

Yaşadın ömrünü, yaşa qısqandım,

“Sevgidən başladı bu ayrılıqlar.”

Düşdüm qəm oduna, külə yazarsan,

Nə çəkdim - söyləyib elə, yazarsan,

Könül dəftərinə belə yazarsan:

Sevgidən başladı bu ayrılıqlar.

Qıymaram üşüdə qar məzarını,

Boyunu gizləyən dar məzarını.

Qazmışam köksümdə yar məzarını,

Sevgidən başladı bu ayrılıqlar.

Deyən olmadı ki,

son qəmin olsun

Matəm içindəyəm neçə zamandır,