Xalq yazıçısı Mirzə İbrahimovun anadan olmasının 100 illiyinə həsr edilmiş konfrans

Oktyabrın 28-də Azərbaycan Dövlət Mədəniyyət və İncəsənət Universitetində (ADMİU) xalq yazıçısı, dramaturq, ədəbiyyatşünas və publisist, Sosialist Əməyi Qəhrəmanı, Dövlət mükafatları laureatı, akademik Mirzə İbrahimovun 100 illik yubileyinə həsr olunmuş konfrans keçirildi.

Tədbirdə universitetin prorektoru, professor Rafiq Sadıqov Prezident İlham Əliyevin xalq yazıçısı Mirzə İbrahimovun 100 illik yubileyinin keçirilməsi haqqında imzaladığı 19 iyul 2011-ci il tarixli Sərəncamını xatırladaraq, bununla əlaqədar respublikada bir sıra tədbirlərin həyata keçirildiyini bildirdi.

R.Sadıqov görkəmli dövlət xadimi və ədəbiyyatşünas M.İbrahimovun çoxşaxəli fəaliyyətindən, müasir Azərbaycan ədəbiyyatının inkişafındakı misilsiz xidmətlərindən söz açdı, onun ictimai, bədii və elmi fəaliyyətinin gənc nəslə tanıdılmasının vacibliyini vurğuladı. ADMİU-da yazıçının yaradıcılığına həsr olunmuş diplom işlərinin və dissertasiyaların yazıldığını dedi.

Sonra M.İbrahimovun həyat və fəaliyyətini əks etdirən sənədli film nümayiş etdirildi.

Konfransda professor Aqşin Babayevin "Mirzə İbrahimov şəxsiyyəti" mövzusunda məruzəsi dinlənildi.

Tədbirdə çıxış edən "Ədəbiyyat qəzeti"nin baş redaktoru, əməkdar incəsənət xadimi Ayaz Vəfalı redaksiyada işlədiyi uzun illər ərzində, - Mirzə müəllim Yazıçılar İttifaqının sədri olanda da, olmayanda da, - onu həmişə eyni dərəcədə səmimi, diqqətli və ədalətli gördüyünü yubilyarın ruhuna dərin ehtiramla xatırladı. O dedi: “Böyük ədib və şəxsiyyət, görkəmli ictimai xadim, akademik Mirzə İbrahimovun zəngin həyat və sənət yolu sözün həqiqi mənasında bir məktəbdir.

Onun əlyetməz ucalığı, necə deyərlər, hamıya yetəcək sadəliyi və müdrikliyi ilə vəhdətdədir.

Mirzə müəllim gəncliyə ata qayğısı ilə yanaşar, hətta bəzən özünün yazılarını ədəbiyyata yenicə gəlmiş cavan bir qələm adamının da çapdan əvvəl oxumasını istər və onun rəyinə olduqca həssaslıq göstərərdi. Çox zəngin həyat təcrübəsi, geniş dünyagörüşü, həm də geniş ürək sahibi olan Mirzə müəllimə tam etibar etmək mümkün idi. Əsas məsələ ədəbi-elmi həqiqətin qorunmasıydı. Bəzən haqsız irad tutan səlahiyyət sahiblərinə ipək kimi yumşaq, ipək kimi də möhkəm Mirzə müəllim, əlbəttə, özünə yaxşı məlum vacib elmi faktlarla lazımi cavabı verirdi.

Bu məktəbdən öyrənməyə bizim hamımızın həmişə ehtiyacımız var."

Daha sonra yazıçı-publisist Flora Xəlilzadə Mirzə İbrahimovun ədəbi irsinin müasirliyindən söz açdı və pyeslərindən birinin tamaşaya qoyulmasının ölməz ədibin minlərlə oxucuları üçün bir yubiley hədiyyəsi olacağını dedi.

Daha sonra əməkdar jurnalist Zakir Abbas və başqaları M.İbrahimovun elmi fəaliyyətindən, natiqlik qüdrətindən, ana dilimizin qorunmasında xidmətlərindən bəhs etdilər.

Sonda yazıçının qızı, xalq artisti bəstəkar Sevda İbrahimova atasının xatirəsinə göstərilən hörmət və ehtirama görə ailə üzvləri adından tədbirin təşkilatçılarına və iştirakçılarına minnətdarlığını bildirdi.

Ədəbiyyat qəzeti.- 2011.- 4 noyabr.- S.3.