"Yujnıy Kavkaz"

Noyabrın 2-də Yazıçılar Birliyinin Natəvan klubunda Avropa Birliyinin maliyyələşdirdiyi "Yujnıy Kavkaz" almanaxının təqdimat mərasimi keçirildi. Tədbiri almanaxın Azərbaycan təmsilçisi və redaktoru, "Ulduz" jurnalının baş redaktoru Elçin Hüseynbəyli açdı.

Sözügedən almanaxın yaranması barədə qərar bu ilin yanvarında Amsterdamda keçirilmiş toplantıda qəbul edilib.

Cənubi Qafqazın beş ədəbiyyatını (Azərbaycan, gürcü, erməni, osetin, abxaz) birləşdirən almanaxın ildə iki dəfə rus dilində nəşri nəzərdə tutulur. Bu ilin sonuna kimi almanaxın ikinci sayı çapdan çıxacaq. Nəşr 70x100 formatda, 250 səhifədən ibarətdir.

Dərginin ilk sayına azərbaycanlı müəlliflərdən Səlim Babullaoğlu, Elxan Zal Qaraxanlı, Rafiq Tağı, Məqsəd Nur və Elçin Hüseynbəylinin əsərlərindən nümunələr daxil edilib.

Almanaxın nəşri Avropa Birliyinin "Güney Qafqazda dialoq və psixoloji sədlərin keçilməsi" layihəsi çərçivəsində həyata keçirilir. Təşkilatçı İngiltərənin "İnterneşinel Alyort" Qeyri Hökumət təşkilatıdır və layihə "Ədəbiyyat millətləri ayırmır, barışdırır" prinsipinə və xalq diplomatiyasına əsaslanır.

Azərbaycan təmsilçisi və redaktoru "Ulduz" jurnalının baş redaktoru Elçin Hüseynbəyli olan almanaxın təqdimat mərasimində Səlim Babullaoğlu, Yunus Oğuz, Mahirə Abdulla, Abbas Abdulla, Əvəz Həsənov, Kərim Kərimov, Əli Kərimbəyli çıxış edərək təqdim olunan almanax haqqında öz fikirlərini açıqladılar.

Sərvaz

Ədəbiyyat qəzeti.- 2011.- 4 noyabr.- S.4.