Balaş Azəroğlu – 90
Almaz kimi kəsərli
Unudulmaz
xalq şairimiz Balaş Azəroğlunun bir neçə il əvvəl
"Ədəbiyyat qəzeti"nə
ünvanladığı "Vətənsizlər…" məqaləsinin
əlyazmasını indi mən yenidən "Ömrü
sahibindən ömürlü məktub"
ağrısıyla baş-başa gözdən keçirirəm.
Hər sətir son dərəcə qəmli, eyni dərəcədə
də şərəfli bir ömrün dilmancı kimidi:
"Bizi Təbrizdə yük maşınlarına mindirib
silahlı məmurlarla sürgünə göndərəndə
haraya getdiyimizi, başımıza nə gələcəyini
bilmirdik…"
1938-ci ilin mart ayının xatirələri belə başlayır. Balaş Azəroğlu ömrünün
17-ci baharını bu cür xatırlayır: "Evimiz şəhərin
yuxarı hissəsində idi. Atam işləmək
üçün Bakıya gələndən "Dağlı
məhəlləsi" deyilən yerdə
yaşayırdı…"
O illərdən
başlayaraq tale Balaş müəllimin ömür
karvanını çox şəhərdən-şəhərə,
yoldan-yola saldı. Arzuları səmtə aparan
yolun köç-düşü uzun çəkdi.
Vur-tut ikicə
il əvvəl redaksiya
tapşırığı ilə ustad şairin
görüşünə gedəndə yenə də o,
köç üstündə idi; yaşadığı Ələsgər
Ələkbərov küçəsi 546-cı məhəllədəki
evləri məlum qəza ilə əlaqədar olaraq
sökülməliydi. Həmin günlər
Balaş müəllim bəlkə də ömrünün ən
sarsıntılı, qüssəli anlarını
yaşayırdı. Yaşadığı
binanın qəzalı vəziyyətdə olduğunu
yaxşı bilsə də, heç cür barışmaq istəmirdi
ki, o, vaxtilə unudulmaz ömür-gün yoldaşı,
tanınmış şair Mədinə Gülgünlə
şirinli-acılı günlər yaşadığı evdən
ayrıla bilər. "Bu evdə, bu divarlar arasında Mədinəli
günlərimin unudulmazlığı uyuyur - deyirdi, - lap
dünyanın ən gözəl şah sarayını mənə
versələr də, bu divarların istisini, xatirəsini dəyişmərəm
- deyirdi…"
Həmin
anında ustad şair gözlərim önündə elə
bil ki, birdən-birə qıvraqlaşmış, yaşın
ahıl yükünü bir kənara tullayıb
üsyankarcasına qabarmışdı və mən onun o
gözəl durumuna heyran kəsilmişdim. Yaddaşımda isə ustadın vaxtilə
öz sevimli Mədinəsinə
ünvanladığı şeirin
misraları dolaşmaqdaydı:
Sənin
kövrəkliyin şüşə deyil ki,
Deyəsən
toxunma, sınar, tökülər.
Sənin
kövrəkliyin bir almaz təki
Neçə
daşdan keçər, qayadan keçər.
Həmin
çağında Balaş müəllimin özü də,
onun ürəyinin alt qatındakı kövrəkliyi də
daha çox daşdan-qayadan keçəsi almaz kimi ovxarlı,
kəsərli idi.
Lap son əlyazmasında
birər-birər yada salıb, göz önünə gətirdiyi
xatirələr, duyğular kimi…
Sərvaz
Ədəbiyyat qəzeti.- 2011.- 18 noyabr.- S.1-3.