Orijinaldan tərcümə

Luçano De Kreşentso 1928-ci ildə Napolidə anadan olmuşdur. Kino rejissoru, aktyor və televiziya verilişləri aparıcısıdır. Bədii yaradıcılığa 1977-ci ildə "Bellavista belə demişdir" romanı ilə başlayıb. "Raffaelle" (1978), "Bellavistanın Napolisi" (1979), "Deyəsən, dünən axşam" (1997), "Qadınlar müxtəlifdir" (1999), "Bellavistanın düşüncələri" (2005), "Demək olar ki" (2007) və s. əsərlərin müəllifidir. "Yunan fəlsəfəsi tarixi" (1983), "Orta əsrlər fəlsəfəsi tarixi" (2002), "Müasir fəlsəfə tarixi" - Nikkolo Kuzanodan Qalileo Qalileiyə qədər" (2003), "Müasir fəlsəfə tarixi - Dekartdan Kanta qədər" (2004) kimi elmi araşdırmaları ilə məşhurlaşıb. 1977-ci ildən 2000 -ci ilə qədər - 23 ilin ərzində, 7 milyonu İtaliyada olmaqla, ümumilikdə 18 milyon tirajla 24 kitabı çap olunub. Əsərləri 22 dilə tərcümə edilib, dünyanın 25 ölkəsində yayılıb, 4 filmin rejissoru, 7 filmin ssenari müəllifi, 8 filmin aktyor kimi iştirakçısıdır, kitablarına və filmlərinə görə saysız-hesabsız mükafatlara layiq görülüb. L.De Kreşentso görkəmli qələm sahibi olmaqla yanaşı, antik fəlsəfəsinin yorulmaz təbliğatçısı kimi də tanınır, uzun müddətdir ki, Qədim Yunan mifologiyası əsasında Mediaset kanallarında yayılan məşhur televiziya proqramının müəllifidir. 1994-cü ildə Afina şəhərinin fəxri vətəndaşı seçilib.

Oxuculara təqdim olunan parçalar "Bellavista belə demişdir" əsərindən götürülüb. Əsər bir-birinə zidd iki düşüncə tərzini, - milanolu və napolitan həyat fəlsəfəsini qarşı-qarşıya qoyan, maraqlı məişət səhnələrindən ibarət orijinal romandır.

Cəmşid Cəmşidov

Ədəbiyyat qəzeti.- 2011.- 18 noyabr.- S.5.