Elxan İbrahimov - 90

Tanınmış ədəbiyyatşünas, tərcüməçi Elxan Xəlil oğlu İbrahimov 1921-ci il sentyabrın 29-da Bakıda qulluqçu ailəsində anadan olmuşdur. Orta məktəbin son sinfində ikən "Azərneftlayihə" trestində çertyoj çəkən yanında şagird işləmişdir.

ADU-nun filologiya fakültəsinə daxil olmuş, lakin ailə vəziyyətinə görə təhsili yarımçıq qalmışdır. 1942-ci ildə səfərbərliyə alınmış, xəstəlik üzündən hərbi xidmətdən tərxis olunmuşdur. "Azərbaycan gəncləri" qəzeti redaksiyasında ştatdankənar əməkdaşlıq etmiş, yay ayları pioner düşərgəsində işləmişdir. Bakı şəhər Komsomol Komitəsində təlimatçı vəzifəsində çalışmışdır (1943).

Lomonosov adına Moskva Dövlət Universitetinin filologiya fakültəsinə daxil olmuş, xəstələndiyindən təhsilini yarımçıq qoyub həkimlərin təkidilə Cənubda müalicə olunmuşdur. Eyni zamanda Azərbaycan Dövlət Universitetinin filologiya fakültəsində buraxılış imtahanı verib ali təhsil diplomu almışdır (1947-1948). Bakıda SSRİ Bədii Fondu Ümumazərbaycan şöbəsi bədii sərgi salonunun müdiri (1949-1950), sonra Moskvada SSRİ Baş Poliqrafiya Nəşriyyatında yerli nəşrlər şöbəsinin redaktoru (1951-1954) vəzifələrində işləmişdir. C.Cabbarlı adına "Azərbaycanfilm"in ssenari şöbəsində redaktor (1955-1958), Azərbaycan Dövlət Televiziya və Radio Verilişləri Komitəsində "Ekran" yaradıcılıq birliyində baş redaktor (1958-1962), "Literaturnıy Azerbaydjan" jurnalı redaksiyasında ədəbi işçi, tərcüməçi (1962-1963), məsul katib (1963-1966), Azərbaycan Dövlət Nəşriyyatında uşaq və gənclər ədəbiyyatı redaksiyasının şöbə müdiri (1966-1967), "Gənclik" nəşriyyatında baş redaktor (1967-1968), Xarici ölkələrlə dostluq və mədəni əlaqələr Azərbaycan cəmiyyətində nəşriyyat şöbəsinin redaktoru (1968), müdiri və baş redaktoru, "Sovetskaya türkologiya" jurnalında ədəbi şöbənin müdiri, məsul katibi (1970-1972), Azərbaycan Könüllü Kitabsevərlər Cəmiyyəti idarəsinin məsul katibi (1975-1977), "Azərbaycanfilm" kinostudiyasında dublyaj sexinin redaktoru vəzifələrində işləmişdir. Bədii tərcüməyə 1950-ci illərdən başlamış, klassik rus yazıçılarının əsərlərini doğma dilə çevirməklə yanaşı, Azərbaycan sovet ədəbiyyatından (M.Hüseyn, S.Rəhimov, Mir Cəlal, Ə.Vəliyev, İ.Şıxlı, B.Bayramov, Y.Əzimzadə, İ.Məlikzadə, Ə.Qasımov və b. əsərlərini) rus dilinə tərcümələr etmişdir. Mərkəzi qəzet və jurnallarda ("Sovetskaya jenşina", "Drujba narodov" və b.) oçerk və publisist yazıları, ssenariləri - "Bizim ikinci doğmamız" (1962), "Laqeydlik günahkarı" (1962), "Mənim qızıl Lənkəranım" (1963) və "Azərbaycanın yenilikçiləri" (1959-1964) müvəffəqiyyət qazanıb.

1981-ci il yanvarın 9-da dünyasını dəyişmişdir.

Bu ağır itki ilə bağlı həmin günlərdə Elxan İbrahimovun yaxın dostu akademik Kamal Talıbzadə ürək sözlərini qələmə alıb, "Ədəbiyyat və incəsənət" qəzetində dərc etdirib.

Ədəbiyyat qəzeti.- 2011.- 16 sentyabr.- S.4.